మట్కా.. అందరి ఫోకస్ వరుణ్ పైనే..

ఎన్ని బాక్సాఫీస్ హిట్స్ అందుకున్నా కూడా నటుడిగా ప్రూవ్ చేసుకునే అవకాశం అన్నీ కథల్లో ఉండదు. ఈ విషయం మెగా హీరో వరుణ్ తేజ్ కు బాగా తెలుసు. అందుకే కాంటెంట్ ఉన్న కథలు వచ్చినప్పుడు చాలా హార్డ్ వర్క్ చేస్తున్నాడు. గతంలో గద్దల కొండ గణేష్ టైమ్ లో అతను నటించిన విధానం బాగా హైలెట్ అయ్యింది. ఆ తరువాత మాస్ కథలకు అనుకోకుండా దూరమైన వరుణ్ ఇప్పుడు మట్కా సినిమాతో ఫుల్ ట్రీట్ ఇవ్వబోతున్నట్లు తెలుస్తోంది.

వరుణ్ ఇప్పుడు తన కెరీర్‌లో మరో బిగ్ హిట్ అందుకునేందుకు సిద్ధంగా ఉన్నాడు. కరుణ కుమార్ దర్శకత్వంలో, ఎస్ఆర్‌టి ఎంటర్‌టైన్‌మెంట్స్ - వైరా ఎంటర్‌టైన్‌మెంట్స్ నిర్మాణంలో భారీ స్థాయిలో తెరకెక్కిన “మట్కా” సినిమా నవంబర్ 14న ప్రపంచవ్యాప్తంగా గ్రాండ్ రిలీజ్ కు సిద్ధమవుతోంది. ఈ సినిమా ట్రైలర్ మరియు టీజర్ విడుదలైన క్షణంలోనే సోషల్ మీడియాలో ట్రెండింగ్ టాపిక్‌గా మారాయి.

ఇక వరుణ్ తేజ్ గత చిత్రాల్లో ఈ స్థాయిలో క్రేజ్ పొందిన చిత్రం మరొకటి లేదని చెప్పాలి. ముఖ్యంగా, వరుణ్ తేజ్ మట్కా వాసు క్యారెక్టర్ ఇందులో అనేక వయసుల్లో కనిపించబోతున్నట్లు ట్రైలర్‌లోని సన్నివేశాలు చూపించాయి. ఇందులో వివిధ వయసుల క్రమంలో వరుణ్ తన డబ్బింగ్‌ విషయంలో కూడా జాగ్రత్తలు తీసుకున్నాడు. ఒక పేద స్థాయి యువకునిగా ఉన్నప్పుడు ఎలా డబ్బింగ్ చెప్తే బావుంటుంది, ఆ తర్వాత అతను ఉన్నత స్థాయికి చేరుకునే ప్రాసెస్‌లో డబ్బింగ్ శబ్దం ఎలా ఉండాలి.. అనే పాయింట్స్ ను చాలా జాగ్రత్తగా డీల్ చేశారు.

చివరగా, నగరాన్ని పాలించే స్థాయికి చేరుకున్న వృద్ధుడిగా కనిపించే సమయంలోనూ అతను తన డబ్బింగ్‌ను మరింత పర్యవేక్షిస్తూ మార్చుకోవడం జరిగిందట. కేవలం డబ్బింగ్‌లోనే కాదు, తన పాత్రకు తగిన విధంగా దుస్తులు, శరీర భాష, ముఖభావాలను సైతం వరుణ్ తేజ్ పూర్తి శ్రద్ధతో మార్చుకోవడం జరిగింది. ఒక పేద యువకునిగా కనిపించే సమయంలో మట్కా వాసు పాత్రలో వరుణ్ తన స్వరంలో స్వల్ప మార్పులు చేశారు.

అలాగే, వ్యక్తిత్వం పెరుగుతూనే ఆ పాత్రకు తగ్గట్లు శరీర భాష, అభినయాన్ని కూడా తీర్చిదిద్దుతూ, ఆ పాత్రను సంపూర్ణంగా ప్రాణం పోశాడని అర్ధమవుతుంది. వివిధ వయసులలో నటించడం మాత్రమే కాకుండా, వాటి డబ్బింగ్‌కు కూడా విభిన్నమైన మాడ్యులేషన్స్ అవసరమవుతాయి. ఈ క్రియేటివిటీకి తగిన విధంగా వరుణ్ తేజ్ చేసిన కృషి ఇప్పుడు ఇండస్ట్రీలో అందరి ప్రశంసలు అందుకుంటోంది.

ఇండస్ట్రీలోని ప్రముఖులు కూడా అతని కష్టాన్ని చూసి “ఇది వరుణ్ తేజ్ కెరీర్‌లోనే బెస్ట్ పెర్ఫార్మెన్స్ అవుతుందని” అంటున్నారు. ఈ ప్రాజెక్ట్‌లో అతని అభినయం అన్ని వర్గాల ప్రేక్షకులను ఆకట్టుకుంటుందని ఫ్యాన్స్ భావిస్తున్నారు. ముఖ్యంగా, మట్కా వాసు పాత్రలో మూడు విభిన్న వయసుల భిన్నతను చూపించడం ద్వారా వరుణ్ తేజ్ తన నటనలో కొత్త గంభీరతను ఆవిష్కరించారు. ఇదే విషయం ఇండస్ట్రీలో చర్చనీయాంశంగా మారింది. ఇప్పుడు ప్రేక్షకులు ఆ పాత్రలో వరుణ్ తేజ్ ఎలా మెరవబోతున్నాడో చూసేందుకు ఆసక్తిగా ఎదురు చూస్తున్నారు.