మట్కా.. ఈసారి గట్టిగా కొట్టేలా ఉన్నాడే!

ఎప్పటికప్పుడు వైవిధ్యమైన సినిమాలు, కంటెంట్ ఓరియెంటెడ్ కమర్షియల్ చిత్రాలు చేయడానికి ప్రయత్నించే హీరోలలో మెగా ప్రిన్స్ వరుణ్ తేజ్ ఒకరు. ఆయన కథానాయకుడిగా నటించిన పాన్ ఇండియా మూవీ "మట్కా" మరో పది రోజుల్లో ప్రేక్షకుల ముందుకు రాబోతోంది. ఆల్రెడీ బయటకు వచ్చిన ప్రమోషనల్ మెటీరియల్ కు మంచి రెస్పాన్స్ వచ్చింది. ఇటీవల రిలీజైన ట్రైలర్ మిలియన్ల వ్యూస్ తో, యూట్యూబ్ లో ట్రెండింగ్‌లో దూసుకెళ్తోంది.

కరుణ కుమార్ దర్శకత్వంలో తెరకెక్కుతున్న పీరియాడిక్ డ్రామా "మట్కా". 1950-80 బ్యాక్ డ్రాప్ లో సాగే ఈ కథలో వాసు అనే పవర్ ఫుల్ పాత్రలో వరుణ్ తేజ్ కనిపించనున్నారు. నాలుగు భిన్నమైన గెటప్స్ లో కనువిందు చేయబోతున్నారు. ముఖ్యంగా యువకుడిగా, వయసు మీద పడిన వ్యక్తిగా కనిపించడానికి అతను చాలా కృషి చేసినట్లు తెలుస్తోంది. సినిమాలో వరుణ్ తన ఇంటెన్స్ పెర్ఫార్మెన్స్ తో కట్టిపడేశారని ఇన్సైడ్ వర్గాలు చెబుతున్నాయి. అతని డిఫరెంట్ క్యారెక్టరైజేషన్, గెటప్స్ ఆడియన్స్ ను మెస్మరైజ్ చేస్తాయని అంటున్నారు. మెగా హీరో ఈసారి కచ్ఛితంగా బ్లాక్ బస్టర్ కొట్టే సూచనలు కనిపిస్తున్నాయనే మాట బలంగా వినిపిస్తోంది.

రతన్‌ ఖత్రి అనే గ్యాంబ్లర్‌ స్టోరీని ఆధారంగా చేసుకొని రాసుకున్న ఫిక్షనల్‌ కథతో 'మట్కా' మూవీ తీసినట్లు దర్శకుడు కరుణ కుమార్ తెలిపారు. 1958లో చిన్నతనంలోనే శరణార్థిగా బర్మా నుంచి వైజాగ్‌కు వచ్చిన వాసు.. ఒక్కో మెట్టు ఎక్కుతూ మట్కా కింగ్‌లా ఎలా ఏదిగాడనే కథాంశాన్ని ఈ సినిమాలో చూపించబోతున్నారు. ఆ టైంలోని వైజాగ్ ప్రాంతాన్ని కళ్ళకు కట్టినట్లు చూపించడానికి భారీగా ఖర్చు చేసి స్పెషల్ గా సెట్లు రూపొందించారు. వింటేజ్ ఫీల్ ను కలిగించే విజువల్స్, బ్యాగ్రౌండ్ స్కోర్ ప్రధాన ఆకర్షణగా నిలుస్తాయని మేకర్స్ చెబుతున్నారు.

'మట్కా' సినిమా నవంబర్ 14న ప్రపంచ వ్యాప్తంగా గ్రాండ్ గా రిలీజ్ కానుంది. ట్రెయిలర్ విడుదలైన తర్వాత ఈ సినిమాపై అంచనాలు రెట్టింపు అయ్యాయి. ఈ నేపథ్యంలో తెలుగులో దూకుడుగా ప్రమోషన్స్ చేస్తున్న టీమ్.. ఈ మధ్యనే ముంబైలో హిందీ ప్రమోషన్‌లను ప్రారంభించారు. త్వరలో తమిళం, మలయాళం, కన్నడ ప్రమోషన్స్ మొదలుపెట్టనున్నారు. రానున్న రోజుల్లో మరింత అగ్రెసివ్ గా ప్రచార కార్యక్రమాలు నిర్వహించడానికి మేకర్స్ ప్లాన్ చేస్తున్నారు.

'మట్కా' మూవీలో లక్కీ బ్యూటీ మీనాక్షి చౌదరి, బాలీవుడ్ భామ నోరా ఫతేహి హీరోయిన్లుగా నటించారు. సలోని, నవీన్ చంద్ర, అజయ్ ఘోష్, కన్నడ కిషోర్, రవీంద్ర విజయ్, పి.రవి శంకర్ కీలక పాత్రలు పోషించారు. వైరా ఎంటర్టైన్మెంట్స్, SRT ఎంటర్టైన్మెంట్స్ బ్యానర్స్ పై భారీ బడ్జెట్ తో ఈ చిత్రాన్ని నిర్మించారు. జివి ప్రకాష్ కుమార్ సంగీతం సమకూర్చిన ఈ సినిమాకి ఎ.కిషోర్ కుమార్ సినిమాటోగ్రఫీ నిర్వచించారు.