వరుణ్ తేజ్.. ఈసారి మామూలు హిట్టు సరిపోదు!

మెగా ప్రిన్స్ వరుణ్ తేజ్ ‘మట్కా’ సినిమాతో నవంబర్ 14న ప్రేక్షకుల ముందుకి రాబోతున్నారు. కరుణ కుమార్ దర్శకత్వంలో పాన్ ఇండియా చిత్రంగా ఈ మూవీ సిద్ధం అయ్యింది. ప్రస్తుతం పోస్ట్ ప్రొడక్షన్ దశలో మూవీ ఉంది. భారీ బడ్జెట్ తో రజిని తాళ్లూరి, విజయ్ కుమార్ తీగల సంయుక్తంగా ఈ చిత్రాన్ని నిర్మిస్తున్నారు. వైజాగ్ బ్యాక్ డ్రాప్ లో మాఫియా కథాంశంతో ఈ చిత్రాన్ని దర్శకుడు కరుణ కుమార్ రెడీ చేస్తున్నాడు. ఇప్పటికే ప్రేక్షకుల ముందుకొచ్చిన టీజర్ కి కొంత పాజిటివ్ రెస్పాన్స్ వచ్చింది.

అయితే తరువాత రిలీజ్ అయిన సాంగ్ ఆశించిన స్థాయిలో రీచ్ కాలేదు. ‘మట్కా’ సినిమా పైన వరుణ్ తేజ్ చాలా హోప్స్ పెట్టుకున్నారు. ఈ సినిమాలో మూడు డిఫరెంట్ లుక్స్ లో వరుణ్ తేజ్ కనిపించబోతున్నాడు. 3 టైమ్ పీరియడ్స్ లో మామూలు రౌడీ నుంచి ‘మట్కా’ కింగ్ గా వరుణ్ తేజ్ ఎలా ఎదిగాడు అనేది ఈ చిత్రంలో చూపించబోతున్నట్లు తెలుస్తోంది. మీనాక్షి చౌదరి ఈ చిత్రంలో హీరోయిన్ గా నటించింది.

ఇదిలా ఉంటే వరుణ్ తేజ్ కి ఈ సినిమాతో సక్సెస్ చాలా అవసరం అని చెప్పాలి. వరుణ్ తేజ్ నుంచి చివరిగా వచ్చిన ‘గని’, ‘గాండీవదారి అర్జున’, ‘ఆపరేషన్ వాలంటైన్’ సినిమాలు బిగ్గెస్ట్ డిజాస్టర్ గా మారాయి. భారీ బడ్జెట్ లతో తెరకెక్కిన ఈ సినిమాలు చాలా తక్కువ కలెక్షన్స్ సాధించాయి. బ్రేక్ ఈవెన్ లో సగం కూడా అందుకోలేదు. ఈ సినిమాల ప్రభావంతో వరుణ్ తేజ్ మార్కెట్ కూడా డ్రాప్ అయిపొయింది. అయితే ‘మట్కా’ మూవీ మరల తనని మార్కెట్ లో స్ట్రాంగ్ గా నిలబెడుతుందని వరుణ్ తేజ్ అనుకుంటున్నారు.

ఎదో మామూలు హిట్ కొడితే సరిపోదు. స్ట్రాంగ్ గా డబుల్ ప్రాఫిట్స్ అంధించి తన స్టార్ ఇమేజ్ ని నిరూపించుకోవాల్సిన అవసరం ఉంది. ప్రస్తుతం అందరికి కనెక్ట్ అయ్యే మాఫియా బ్యాక్ డ్రాప్ కథాంశంతో వస్తోన్న చిత్రం కావడంతో మూవీపైన కొంత బజ్ క్రియేట్ అయ్యింది. అయితే ఈ బజ్ అతనికి భారీ ఓపెనింగ్స్ ని తీసుకొచ్చే రేంజ్ లో లేదని ట్రేడ్ వర్గాలలో వినిపిస్తోంది. కనీసం మెగా ఫ్యాన్స్ దృష్టిని కూడా ఈ మూవీ ఆకర్షించలేదని కొంతమంది అంటున్నారు. మరో వైపు నవంబర్ 14న కోలీవుడ్ నుంచి వస్తోన్న మోస్ట్ అవైటెడ్ మూవీ ‘కంగువా’ రిలీజ్ అవుతోంది.

ఆ సినిమాని తట్టుకొని ‘మట్కా’ ఎంత వరకు నిలబడుతుందనేది కూడా ఇప్పుడు పెద్ద ప్రశ్నగా మారింది. ‘కంగువా’ మూవీ పైన భారీ హైప్ నెలకొని ఉంది. ఇది కోలీవుడ్ ఇండస్ట్రీకి చాలా ప్రెస్టీజియస్ ప్రాజెక్ట్. తమిళనాట ‘కంగువా’ ని కాదని ‘మట్కా’ ని ఎంకరేజ్ చేసే ఛాన్స్ ఉండదని సినీ విశ్లేషకుల మాట. ఈ ప్రతికూలతని తట్టుకొని వరుణ్ తేజ్ బాక్సాఫీస్ పరీక్షలో ఈ సారి పాస్ అవుతాడా లేదా అనేది చూడాలి.