రామా టాకీస్ ర్యాంప్.. 'మట్కా' ఫోక్ సాంగ్ మేకింగ్ చూశారా?

మెగా ప్రిన్స్ వరుణ్‌ తేజ్‌ ''మట్కా'' సినిమాతో ప్రేక్షకుల్ని అలరించడానికి రెడీ అయ్యారు. ఆయన హీరోగా నటించిన ఈ పీరియడ్ యాక్షన్ చిత్రానికి కరుణ కుమార్‌ దర్శకత్వం వహించారు. ఇందులో మీనాక్షి చౌదరి, నోరా ఫతేహి హీరోయిన్లుగా నటించారు. రిలీజ్ డేట్ దగ్గర పడటంతో మేకర్స్ జోరుగా ప్రచార కార్యక్రమాలు నిర్వహిస్తున్నారు. ఓవైపు ఆఫ్ లైన్ ప్రమోషన్స్ చేస్తూనే, మరోవైపు ఒక్కటొక్కటిగా ప్రమోషనల్ కంటెంట్ ను వదులుతూ ఆన్ లైన్ లోనూ సందడి చేస్తున్నారు. తాజాగా ఈ సినిమా నుంచి 'రామా టాకీస్ ర్యాంప్' అనే సాంగ్ ని విడుదల చేసారు.

''రామా టాకీస్ రోడ్డు మీద రంగురాళ్లు అమ్మేవాడా.. రాతిలో ఏమున్నది.. నీ చేతిలో ఉన్నదీ పనితనం..'' అంటూ సాగిన ఈ ఫోక్ సాంగ్ ఆకట్టుకుంటోంది. హార్మనీ, తబలా లాంటి ఇన్స్ట్రమెంట్స్ తో మ్యూజిక్ డైరెక్టర్ భవానీ రాకేష్ క్యాచీ ట్యూన్ ను కంపోజ్ చేసినట్లు తెలుస్తోంది. దర్శకుడు కరుణ కుమార్‌ స్వయంగా ఈ పాటకు సాహిత్యం అందించడం విశేషం. జానపదం శైలిలో అందరూ పాడుకునేలా లిరిక్స్ రాశారు. సింగర్ సాయి దేవ్ హర్ష ఉత్సాహంగా ఈ పాట పాడారు.

'రామా టాకీస్ ర్యాంప్' సాంగ్ ను రెగ్యులర్ లిరికల్ వీడియో మాదిరిగా కాకుండా, 'మట్కా' ప్రపంచాన్ని పరిచయం చేసే విజువల్స్‌తో ఈ మేకింగ్ వీడియోని రిలీజ్ చేసారు. కొరియోగ్రాఫర్ విజయ్ బిన్నీ వేసిన సింపుల్ మాస్ స్టెప్పులు ఆకట్టుకుంటున్నాయి. 1960-80స్ కాలానికి తగ్గట్టుగా, అప్పటి వైజాగ్ ప్రాంతాన్ని రీక్రియేట్ చేయడానికి వేసిన భారీ సెట్స్ ను ఈ వీడియోలో మనం చూడొచ్చు. ఎర్ర బస్సులు, పాత మోడల్ కార్లు, సినిమా టాకీస్, ఆ రోజుల్లో వినియోగంలో ఉన్న నోట్లు, నాణేలు.. వంటివి వింటేజ్ ఫీల్ ను తీసుకొస్తున్నాయి. ఈ వీడియో మనకు 'మట్కా' ప్రపంచాన్ని పరిచయం చేస్తోంది.

వరుణ్ తేజ్ తో పాటుగా మీనాక్షి చౌదరి, నోరా ఫతేహి, సలోని, నవీన్ చంద్ర, అజయ్ ఘోష్, కన్నడ కిషోర్ వంటి ఇతర ప్రధాన పాత్రధారులను కూడా ఈ మేకింగ్ వీడియోలో చూపించారు. ఇప్పటికే 'మట్కా' మూవీ గ్లింప్స్, టీజర్, ట్రైలర్, సాంగ్స్.. ఆడియన్స్ ను విశేషంగా ఆకట్టుకున్నాయి. లేటెస్టుగా వచ్చిన 'రామా టాకీస్ ర్యాంప్' పాట కూడా ఆద్యంతం అలరించేలా సాగింది. ప్రస్తుతం ఈ వీడియో ప్రస్తుతం సోషల్ మీడియాలో ట్రెండ్ అవుతోంది.

1950-80 బ్యాక్ డ్రాప్ లో కొన్ని వాస్తవ సంఘటనల్ని ఆధారం చేసుకుని రూపొందించిన పీరియడ్ యాక్షన్‌ డ్రామా 'మట్కా'. రతన్‌ ఖత్రి అనే గ్యాంబ్లర్‌ స్టోరీని ఆధారంగా చేసుకొని ఈ ఫిక్షనల్‌ స్టోరీ రెడీ చేసుకున్నట్లు దర్శకుడు ఇప్పటికే క్లారిటీ ఇచ్చారు. బర్మా నుంచి శరణార్థిగా వైజాగ్‌కు వచ్చిన ఓ యువకుడు.. మట్కా కింగ్‌లా ఎలా ఏదిగాడనే కథాంశాన్ని ఈ సినిమాలో చూపించబోతున్నారు. ఇందులో వాసు అనే పాత్రలో, నాలుగు భిన్నమైన గెటప్స్ లో వరుణ్ తేజ్ కనిపించనున్నారు.

''మట్కా'' చిత్రాన్ని వైరా ఎంటర్టైన్మెంట్స్, SRT ఎంటర్టైన్మెంట్స్ బ్యానర్స్ పై భారీ బడ్జెట్ తో నిర్మించారు. విజేందర్‌ రెడ్డి తీగల, రజనీ తాళ్లూరి నిర్మాతలుగా వ్యవహరిస్తున్నారు. జీవీ ప్రకాశ్‌ కుమార్ సంగీతం సమకూర్చారు. ఎ.కిషోర్ కుమార్ సినిమాటోగ్రఫీ నిర్వచించారు. నవంబరు 14న ప్రపంచ వ్యాప్తంగా తెలుగు తమిళ మలయాళ కన్నడ హిందీ భాషల్లో ఈ పాన్ ఇండియా సినిమా విడుదల కానుంది.