'మట్కా' వాసు కోసం వరుణ్‌ మేకోవర్‌ ఇలా..!

మెగా హీరో వరుణ్‌ తేజ్‌ మట్కా సినిమాతో మరికొన్ని గంటల్లో ప్రేక్షకుల ముందుకు రాబోతున్నాడు. కరుణ కుమార్‌ దర్శకత్వంలో రూపొందిన ఈ సినిమాలో వరుణ్ తేజ్ లుక్‌ కి మంచి స్పందన వచ్చింది. పీరియాడిక్‌ మూవీ అంటే లుక్‌ విషయంలో చాలా జాగ్రత్తలు తీసుకోవాల్సిన అవసరం ఉంటుంది. వరుణ్‌ తేజ్‌ లుక్‌ని చూస్తే ఇదో మంచి పీరియాడిక్‌ మూవీ అనే ఫీలింగ్‌ కలుగుతుంది. నాలుగు విభిన్నమైన ఏజ్‌ గ్రూప్‌ లో వరుణ్‌ కనిపించబోతున్నాడు. అందుకు తగ్గట్లుగా వేసిన మేకోవర్‌ అద్భుతం అని చెప్పుకోవచ్చు. వరుణ్‌ లుక్ సినిమాపై అంచనాలు పెంచింది అనడంలో సందేహం లేదు.

పాత సినిమాల్లో చిరంజీవి మాదిరిగా ఉన్నాడంటూ కొందరు కామెంట్స్ చేస్తే, తండ్రి నాగబాబు కెరీర్‌ ఆరంభంలో ఎలా ఉండేవాడో అలాగే మట్కాలో వరుణ్‌ ఉన్నాడు అంటూ కామెంట్స్ చేస్తున్నారు. మొత్తానికి మట్కా వాసు మేకోవర్‌ టాక్‌ ఆఫ్‌ ది ఇండస్ట్రీ అయింది. మేకప్‌ గురించి ఇంతగా చర్చ జరుగుతున్న నేపథ్యంలో చిత్ర యూనిట్‌ సభ్యులు వరుణ్‌ తేజ్‌ ఎలా మట్కా వాసుగా మారాడు అనే విషయాన్ని చూపించడం కోసం మేకోవర్‌ వీడియోను షేర్‌ చేయడం జరిగింది. ఆ వీడియో ప్రస్తుతం సోషల్‌ మీడియాలో వైరల్‌ అవుతోంది. నెట్టింట చక్కర్లు కొడుతోన్న ఆ వీడియో చూస్తే బాబోయ్‌ వరుణ్‌ చాలా కష్టపడ్డాడు అనే అభిప్రాయం వ్యక్తం అవుతోంది.

మీనాక్షి చౌదరి హీరోయిన్‌గా నటించిన ఈ సినిమాలో బాలీవుడ్‌ బ్యూటీ నోరా ఫతేహీ కీలక పాత్రలో కనిపించబోతుంది. మీనాక్షి చౌదరి ఇటీవల లక్కీ భాస్కర్‌ సినిమాతో మంచి విజయాన్ని సొంతం చేసుకుంది. కనుక ఈ సినిమా మరో విజయాన్ని ఆమెకు కట్టబెట్టే అవకాశాలు ఉన్నాయి. వరుణ్‌ తేజ్‌ లుక్‌ తో పాటు మీనాక్షి చౌదరి లుక్‌ కి మంచి స్పందన దక్కింది. మొత్తానికి పీరియాడిక్‌ డ్రామాకు అత్యంత కీలకమైన మేకప్‌ విషయంలో మట్కా టీం సక్సెస్ అయ్యారు. సెట్స్‌, పాటల విషయంలోనూ ఇప్పటికే మంచి స్పందన దక్కింది.

గత కొంత కాలంగా వరుణ్‌ తేజ్ నటిస్తున్న సినిమాలు బాక్సాఫీస్‌ వద్ద ఆశించిన స్థాయిలో ఆకట్టుకోలేక పోతున్నాయి. అందుకే కాస్త ఎక్కువ సమయం తీసుకుని, అదనపు శ్రద్ద పెట్టి ఈ సినిమాను వరుణ్ చేయడం జరిగింది. విభిన్న చిత్రాల దర్శకుడిగా పేరు దక్కించుకున్న కరుణ కుమార్‌ దర్శకత్వంలో రూపొందిన ఈ సినిమా బాక్సాఫీస్‌ వద్ద కచ్చితంగా భారీ వసూళ్లు నమోదు చేస్తుందని, వరుణ్‌ కి సోలో హీరోగా వంద కోట్లకు పైగా వసూళ్లు సాధించి కొత్త రికార్డులను తెచ్చి పెడుతుందనే నమ్మకంతో మెగా ఫ్యాన్స్ ఉన్నారు. ఓల్డ్‌ ఏజ్ మట్కా వాసు పాత్ర కోసం వరుణ్‌ తేజ్‌ పడ్డ కష్టం చూస్తూ ఉంటే ఆయనకు కచ్చితంగా ఈ సినిమా భారీ విజయాన్ని తెచ్చి పెడుతుందనే నమ్మకం వ్యక్తం అవుతోంది.