టుస్కానీలో కొణిదెల-కామినేని సెలవుదినం!

అంద‌మైన ప్రేమ ప‌క్షులు వరుణ్ తేజ్ - లావణ్య త్రిపాఠి నవంబర్ -1న ఇటలీలో వివాహం చేసుకోనున్నారు. వధూవరులు ఇప్పటికే తమ అతిథులతో పాటు ఇట‌లీ టుస్కానీలో వెన్యూ వ‌ద్ద‌కు చేరుకున్నారు. ఈ వేడుక‌కు ఇప్ప‌టికే కొణిదెల‌- కామినేని కుటుంబాలు హాజ‌ర‌య్యాయి. మెగా హీరోల్లో ప‌లువురు ఇప్ప‌టికే వేడుక‌లో సంద‌డి చేస్తున్నారు. అందుకు సంబంధించిన హింట్ గా కొన్ని ఫోటోలు వెబ్ లో వైర‌ల్ అవుతున్నాయి. తాజాగా వెన్యూ నుంచి ఓ ఫోటో అంత‌ర్జాలంలోకి రిలీజైంది.

మెగాస్టార్ చిరంజీవి, ప‌వ‌న్ క‌ల్యాణ్ స‌హా రామ్ చరణ్- ఉపాస‌న దంప‌తులు తన కుటుంబంతో పాటు, అల్లు అర్జున్ అత‌డి కుటుంబం ఈ పెళ్లి వేడుకకు హాజ‌ర‌య్యారు. నితిన్ -షాలిని స‌హా చాలా మంది విమానాశ్రయంలో కనిపించారు. ఈరోజు రామ్ చరణ్ భార్య ఉపాసన టుస్కానీ నుండి ఫ్యామిలీ ఫోటోను షేర్ చేసారు. ఉపాస‌న త‌న అధికారిక ఇన్‌స్టాగ్రామ్ లో ఇలా రాసింది, ``టుస్కానీలో కొణిదెల కామినేని సెలవుదినం! హృదయమంతా ఒకే ఫ్రేమ్‌లో. ఈ చిరస్మరణీయ అనుభవానికి సాల్వటోర్ ఫెర్రాగామోకు ధన్యవాదాలు`` అని రాసారు.

ఈ ఫోటోలలో ఉపాసన, రామ్ చరణ్ వారి కుమార్తె, చిరంజీవి స‌హా కొణిదెల‌- కామినేని కుటుంబం కెమెరాకు పోజులివ్వ‌డం క‌నిపిస్తోంది. రెండవ- మూడవ ఫోటోలో రామ్ చరణ్ ఇతర సభ్యులతో పోజులిచ్చాడు. ఈ ఫోటోలను షేర్ చేసిన వెంటనే చాలా మంది అభిమానులు కామెంట్ సెక్షన్‌లో వారిని ప్రశంసించారు. చాలా మంది హార్ట్ ఎమోజీలను షేర్ చేసారు. నిజానికి ఈ వివాహ వేడుకకు ముందు శుభ‌లేఖ ఆన్‌లైన్‌లో లీక్ అయిన సంగ‌తి తెలిసిందే. ప్రస్తుతం ఇది వైరల్ అవుతోంది. ప్రీ వెడ్డింగ్ వేడుకలు ఈ సోమ‌వారం నుంచి ప్రారంభం కానున్నాయి. ఈ పెళ్లికి అల్లు-కొణిదెల ఫ్యామిలీ అంతా హాజర‌య్యారు. పెళ్లి అనంత‌రం రిసెప్షన్ తేదీ ఫిక్స‌యింది.

వరుణ్ - లావణ్య 2016 నుండి స్థిరమైన సంబంధంలో ఉన్నారు. జూన్ 9న లావణ్య త్రిపాఠి - వరుణ్ తేజ్ ఒక ప్రైవేట్ వేడుకలో నిశ్చితార్థం చేసుకున్నారు. ఈ జంట పెళ్లి అనంత‌రం నవంబర్ 5 న హైదరాబాద్‌లో పరిశ్రమలోని వారి స్నేహితులు, సహచరులు.. పెద్ద కుటుంబ సభ్యుల కోసం విలాసవంతమైన వివాహ రిసెప్షన్‌ను నిర్వహించనున్నారు. లీకైన ఇన్విటేషన్ కార్డ్ ప్రకారం, ఈవెంట్ మాదాపూర్‌లోని ఎన్ కన్వెన్షన్‌లో జరుగుతుంది. ఈ వేడుక‌కు ప్ర‌ముఖ సెల‌బ్రిటీలు హాజ‌రు కానున్నారు.