సుశాంత్ సింగ్ ఈ డెబ్యూ న‌టుడి స్ఫూర్తి

బుల్లితెర నుంచి పెద్ద తెర‌ హీరోగా.. సైన్స్ ప్ర‌యోగాల‌ ఔత్సాహికుడుగా.. గొప్ప విద్యాధికుడిగా.. వీట‌న్నిటినీ మించి ఒక ఔట్ సైడ‌ర్‌గా బాలీవుడ్ లో పోరాడి ఎదిగిన హీరో సుశాంత్ సింగ్ రాజ్ పుత్. ఎం.ఎస్.ధోని బ‌యోపిక్‌లో అత‌డి ఆహార్యాన్ని అభిమానుల ఇంకా మ‌ర్చిపోలేదు. ఎంపిక చేసుకున్న పాత్ర‌లోకి ప‌రకాయం చేయ‌గ‌ల ప్ర‌తిభావంతుడు. అందుకే మ‌ర‌ణానంత‌రం కూడా ఇంకా హృద‌యాల్లో జీవించే ఉన్నాడు. అత‌డు లేక‌పోయినా, అత‌డి ఫాలోయింగ్ చెక్కు చెద‌ర‌లేద‌నేందుకు బాలీవుడ్‌ ఆరంగేట్ర న‌టుడు వీర్ ప‌హారియా చెప్పిన విష‌యాలు ప‌రిశీలిస్తే చాలు.

స్కైఫోర్స్ చిత్రంతో బాలీవుడ్‌లోకి అడుగుపెట్టిన వీర్ పహారియా తాను దివంగ‌త న‌టుడు సుశాంత్ సింగ్ రాజ్‌పుత్‌కు పెద్ద అభిమానినని అని తెలిపాడు. పవిత్ర రిష్టా టీవీ సీరియ‌ల్ నుంచి, పెద్ద‌తెర‌ న‌టుడిగా 'కై పో చే' మొద‌లు, తన చివరి సినిమా దిల్ బెచారా వరకు సుశాంత్ జ‌ర్నీని తాను చూసాన‌ని తెలిపాడు. ఒక న‌టుడిగా సుశాంత్ నుంచి చాలా స్ఫూర్తిని పొందుతాన‌ని అన్నాడు. వీర్ తో పాటు నేటిత‌రం న‌టుల్లో చాలామంది సుశాంత్ సింగ్ కి అభిమానులు.

దేశ‌భ‌క్తి, వార్ డ్రామా నేప‌థ్యంలో రూపొందించిన 'స్కై ఫోర్స్' జనవరి 24న విడుద‌ల కాగా ఈ చిత్రం ఇప్ప‌టివ‌ర‌కూ 80 కోట్లు వ‌సూలు చేసింది. ఇందులో అక్షయ్ కుమార్, వీర్ ప‌హారియా, సారా అలీ ఖాన్, నిమ్రత్ కౌర్ త‌దిత‌రులు న‌టించారు. రెండో వారంలోను ఈ సినిమా ఆడితే 100 కోట్లు వ‌సూలు చేస్తుంద‌ని భావిస్తున్నారు. ఒక డెబ్యూ హీరోకి ఇది ఫ‌ర్వాలేద‌నిపించే ఆరంగేట్రం. స్కై ఫోర్స్ అక్ష‌య్ స్టార్ డ‌మ్ రేంజులో వ‌సూళ్ల‌ను సాధించ‌లేక‌పోయినా ఫర్వాలేద‌నే టాక్ వినిపిస్తోంది.

దివంగ‌త సుశాంత్ సింగ్ న‌టించిన సినిమాలు యువ‌త‌రంలో స్ఫూర్తిని నింపే క‌థాంశాల‌తో రూపొందాయి. న‌టుడిగా అత‌డు వంద‌శాతం రాణించాడు. అందుకే వీర్ ప‌హారియా లాంటి చాలా మంది ఔత్సాహిక న‌టులు అత‌డిని అభిమానిస్తారు. ఇలాంటి అభిమానం కొంద‌రికి మాత్ర‌మే సాధ్యం.