వెంకీ మామకు ఇప్పుడు అసలైన పరీక్ష..!
చాలా కాలం తర్వాత వచ్చిన హిట్‌ను నిలుపుకోవడం కోసం వెంకటేష్ కథల ఎంపిక విషయంలో చాలా జాగ్రత్తలు తీసుకోవాల్సిన అవసరం ఉంది. ఈ
By: Tupaki Desk | 30 Jan 2025 5:37 AM GMT
వెంకటేష్ సాలిడ్ కమర్షియల్‌ సక్సెస్ కొట్టి చాలా కాలం అయ్యిందని ఫ్యాన్స్ ఆవేదన వ్యక్తం చేస్తున్న సమయంలో వచ్చిన 'సంక్రాంతికి వస్తున్నాం' సినిమా రికార్డ్‌లు బ్రేక్ చేసింది. ఫ్యాన్స్ కోరుకున్న సాలిడ్ కమర్షియల్‌ హిట్‌కి రెండు మూడు రెట్ల అధికంగానే వసూళ్లు సాధించింది. ఇతర హీరోలు వందల కోట్ల వసూళ్లు సాధిస్తూ దూసుకు పోతుంటే వెంకటేష్ మాత్రం వరుస ఫ్లాప్స్‌తో నిరాశ పరుస్తూ వచ్చారు. సీతమ్మ వాకిట్లో సిరిమల్లె చెట్టు, ఎఫ్‌ 2 సినిమాలు వంద కోట్ల వసూళ్లు సాధించినా అవి మల్టీస్టారర్‌ సినిమాలు కావడంతో వెంకీకి పూర్తి స్థాయి క్రెడిట్‌ దక్కలేదు. అందుకే వెంకీ వంద కోట్ల సినిమా కోసం ఫ్యాన్స్ ఎదురు చూశారు.
వంద కోట్ల సినిమా కోసం ఎదురు చూస్తున్న వెంకటేష్ ఫ్యాన్స్‌కి దర్శకుడు అనిల్‌ రావిపూడి ఏకంగా రూ.300 కోట్ల వసూళ్లను ఇచ్చాడు. సీనియర్‌ హీరోల్లో అత్యధిక వసూళ్లు సాధించిన హీరోగా వెంకటేష్ రికార్డ్‌ సొంతం చేసుకున్నారు. చిరంజీవి వద్ద ఉన్న పలు రికార్డ్‌లను వెంకటేష్ ఒకే ఒక్క సినిమాతో దక్కించుకున్నారు. సంక్రాంతి కానుకగా వచ్చిన సంక్రాంతికి వస్తున్నాం సినిమా ఫ్యామిలీ ఆడియన్స్‌ని అలరించింది. థియేటర్ల వద్ద అన్ని వయసుల వారు క్యూ కట్టారు. ఏళ్ల తరబడి సినిమాకు వెళ్లని వారు సైతం ఈ సినిమా థియేటర్‌లో చూసేందుకు బాక్సాఫీస్‌ వద్ద నిల్చున్నారు. అంతటి విజయాన్ని సొంతం చేసుకున్న ఈ సినిమా వెంకీ మామకి మరింత బాధ్యత పెంచింది.
చాలా కాలం తర్వాత వచ్చిన హిట్‌ను నిలుపుకోవడం కోసం వెంకటేష్ కథల ఎంపిక విషయంలో చాలా జాగ్రత్తలు తీసుకోవాల్సిన అవసరం ఉంది. ఈ సినిమా కంటే ముందు యాక్షన్‌తో పాటు పలు జోనర్‌లలో సినిమాలను చేసిన వెంకటేష్‌కి ఫ్యామిలీ ఎంటర్‌టైనర్‌తోనే సక్సెస్ దక్కింది. కనుక ముందు ముందు కూడా ఫ్యామిలీ ఆడియన్స్‌ని దృష్టిలో ఉంచుకుని సినిమాలు చేస్తే బాగుంటుంది అనే అభిప్రాయంను ఫ్యాన్స్ వ్యక్తం చేస్తున్నారు. వెంకటేష్ సన్నిహితులు సైతం అదే ఉద్దేశ్యంతో ఉన్నట్లు తెలుస్తోంది. అయితే వెంకీ నిర్ణయం ఏంటి అనేది మాత్రం క్లారిటీ రావాల్సి ఉంది.
ఇప్పటికే సంక్రాంతికి వస్తున్నాం సినిమాకు సీక్వెల్‌ ఉంటుందని అధికారికంగా ప్రకటన వచ్చింది. అయితే అది రావడానికి చాలా సమయం ఉంది. ఆ గ్యాప్‌లో వెంకటేష్ కనీసం రెండు సినిమాలు చేయాల్సి ఉంది. కనుక ఈ సక్సెస్‌ను కంటిన్యూ చేయడం కోసం వెంకటేష్ ఎంచుకునే కథలు కీలకంగా మారనున్నాయి. వెంకటేష్‌కి పలువురు దర్శకులు కథలు చెప్పి ఉన్నారు. గతంలో పలు కథలకు ఓకే చెప్పిన వెంకటేష్ ఇప్పుడు సందిగ్దంలో పడ్డట్లుగా తెలుస్తోంది. ఈ ఏడాది మరో సినిమాతో రావాలని భావిస్తున్న వెంకటేష్ త్వరలోనే ఏదో ఒక కథకి గ్రీన్ సిగ్నల్‌ ఇచ్చే అవకాశాలు ఉన్నాయి. ఆ కథ ఏంటి, ఆ దర్శకుడు ఎవరు అనేది చూడాలి. సంక్రాంతికి వస్తున్నాం సక్సెస్‌ని కంటిన్యూ చేసే స్థాయిలో వెంకీ మామ తదుపరి సినిమా ఉండాలంటే అద్భుతమైన మరో ఫ్యామిలీ స్టోరీ కావాలి. మరి ఆ స్థాయి స్టోరీని ఎవరు తీసుకు వస్తారు అనేది చూడాలి.
