పొల్లాచ్చి లో ఇద్ద‌రు భామ‌ల ముద్దుల ప్రియుడు!

'సంక్రాంతికి వ‌స్తున్నాం' అంటూ విక్ట‌రీ వెంక‌టేష్‌-అనీల్ రావిపూడి సినిమా ప్రారంభానికి ముందే ప్ర‌క టించిన సంగ‌తి తెలిసిందే. ఆ త‌ర్వాత కొన్ని రోజుల‌కి నెమ్మ‌దిగా రెగ్యుల‌ర్ షూటింగ్ మొద‌లు పెట్టారు.

చాలా కాలం త‌ర్వాత అనీల్ మ‌ళ్లీ వెంకీలో రొమాంటిక్ హీరోని త‌ట్టి లేపుతుప్పాడు. ఇద్ద‌రు భామ‌ల ముద్దుల ప్రియుడిగా హైలైట్ చేస్తున్నారు. ఇంట్లో ఇల్లాలు వంటిట్లో ప్రియురాలు అన్న త‌ర‌హాలోనే సినిమా ఉంటుంద‌ని ప్ర‌చారంలో ఉంది.

మాజీ ప్రేయ‌సి, అంద‌మైన భార్య మ‌ధ్య న‌లిగిపోయే హీరోగా వెంక‌టేష్ క‌నిపిస్తార‌ని స‌మాచారం. ఇదొక ట్రయాంగిల్ ల‌వ్ క‌మ్ క్రైమ్ స్టోరీగా మ‌లుస్తున్నాడు. ఇప్ప‌టికే హైద‌రాబాద్ లో ఓ షెడ్యూల్ కూడా పూర్త‌యింది. ఇందులో వెంక‌టేష్ స‌హా ప్ర‌ధాన తారాగ‌ణంపై కీల‌క స‌న్నివేశాలు చిత్రీక‌రించారు. ఈ నేప‌థ్యంలో తాజాగా రెండ‌వ షెడ్యూల్ కి రంగం సిద్ద‌మ‌వుతోంది.

ఆగ‌స్టు 9నుంచి పొల్లాచ్చిలో ఈ షెడ్యూల్ ప్రారంభ‌మ‌వుతుంది. నెల రోజుల‌పాటు ఈ షెడ్యూల్ జ‌రుగుతుంది. వెంక‌టేష్, ఐశ్వ‌ర్యా రాజేష్‌, మీనాక్షి చౌద‌రి ఈ షెడ్యూల్ లో పాల్గొంటారు. పొల్లాచ్చిలో ముగ్గురి మ‌ధ్య రొమాంటిక్ స‌న్నివేశాలు చిత్రీక‌రించ‌నున్నార‌ని స‌మ‌చారం. పొల్లాచ్చి షెడ్యూల్ లో ఈ స‌న్నివేశాలు హైలైట్ గా ఉంటాయ‌ని చిత్ర వ‌ర్గాల స‌మాచారం.

ఇద్ద‌రు హీరోయిన్ల‌తో వెంక‌టేష్ చాలా కాలం త‌ర్వాత నటిస్తోన్న సినిమా ఇదే కావ‌డం విశేషం. ఇంత‌వ‌ర‌కూ అనీల్ తో వైఫ‌ల్యం కూడా ఎదుర‌వ్వ‌లేదు. చేసిన రెండు సినిమాలు 'ఎఫ్ -2', 'ఎఫ్ -3' మంచి విజ‌యాలు సాధించాయి. వెంకీ-అనీల్ కాంబినేష‌న్ లో సోలో సినిమా ఇదే కావ‌డంతో అంచ‌నాలు భారీగా ఉన్నాయి. వాళ్ల‌కి స‌క్సెస్ పుల్ ప్రొడ్యూస‌ర్ దిల్ రాజు కూడా తోడవ్వ‌డంతో సంక్రాంతికి కొట్టడం ఖాయ‌మ‌నే అంచ‌నాలు రెట్టింపు అవుతున్నాయి.