వేణు స్వామి రాంగ్ ప్రెడిక్షన్… శోభిత జన్మరాశితో దొరికిపోయారా?

తెలుగు రాష్ట్రాలలో గత కొంతకాలంగా బాగా వినిపించిన ఆస్ట్రాలజర్ పేరు వేణు స్వామి. సెలబ్రెటీ ఆస్ట్రాలజర్ గా తనని తాను హైలెట్ చేసుకున్న వేణుస్వామి ఇంటర్వ్యూలు ఇస్తూ ప్రముఖుల జాతకాలు చెబుతూ పాపులర్ అయ్యారు. అడగకపోయిన పలానా సెలబ్రెటీ జాతకం ఇలా ఉందంటూ ఆయన ఒక ప్రెడిక్షన్ ఇచ్చేస్తారు. ఒక వేళ ఆయన చెప్పిన దాంట్లో నిజం ఉంటే నేను ముందే చెప్పాను అని దానిని మళ్ళీ హైలైట్ చేస్తారు.

ప్రభాస్ జాతకం ప్రకారం ఆయనకి హిట్స్ రావడం కష్టం అని వేణుస్వామి గతంలో చెప్పారు. కానీ తరువాత సలార్, కల్కి చిత్రాలతో రెండు సాలీడ్ హిట్స్ వచ్చాయి. తెలంగాణ ఎన్నికలలో మళ్ళీ బీఆర్ఎస్ అధికారంలోకి వస్తుందని, డైరెక్ట్ గా కేటీఆర్ ముఖ్యమంత్రి అవుతారని అన్నారు. కానీ దానికి విరుద్ధంగా కాంగ్రెస్ అధికారంలోకి వచ్చింది.

ఏపీలో మరల వైసీపీ గెలుస్తుంది రాసిపెట్టుకోండి అంటూ ఎలక్షన్స్ కి ముందు చాలా యుట్యూబ్ ఛానల్స్ లో వేణు స్వామి ఇంటర్వ్యూలు ఇచ్చారు. ఇవి చాలా వైరల్ అయ్యాయి. అయితే అనూహ్యంగా ఏపీలో వైసీపీ దారుణంగా ఓడిపోయింది. కూటమి అఖండ మెజారిటీతో గెలిచింది. దీని తర్వాత రాజకీయ జ్యోతీష్యం చెప్పానని వేణు స్వామి వీడియో రిలీజ్ చేశారు.

ఇదిలా ఉంటే తాజాగా అక్కినేని నాగ చైతన్య, హీరోయిన్ శోభిత దూళిపాళ్ల నిశ్చితార్ధం జరిగింది. అయితే నిశ్చితార్ధం అయిన రెండో రోజే వేణు స్వామి వీడియో రిలీజ్ చేశారు. నాగ చైతన్య, శోభిత జాతక చక్రం వేసి వారిద్దరూ విడిపోతారంటూ సంచలన వ్యాఖ్యలు చేశారు. వారి గ్రహాలు అనుకూలంగా లేవని, మూడేళ్ళకి మించి కలిసి ఉండరని చెప్పారు.

ఈ సందర్భంగా శోభిత దూళిపాళ్ల జాతకం విషయంలో వేణుస్వామి రాంగ్ చెప్పారని ఇప్పుడు సోషల్ మీడియాలో ట్రోలింగ్ నడుస్తోంది. శోభితది ధనస్సు రాశిగా వేణు స్వామి జాతకచక్రం వేశారు. నిజానికి ఆమె జన్మరాశి వృషభం అని తెలుస్తోంది. దీంతో తప్పుడు జాతకాలు చెబుతున్నారంటూ అక్కినేని ఫ్యాన్స్ వేణు స్వామి మీద సీరియస్ అవుతున్నారు.

ఎప్పటిలాగే ఈ సారి కూడా వేణు స్వామి రాంగ్ కాలిక్యులేషన్ వేశారని విమర్శిస్తున్నారు. ప్రస్తుతం సోషల్ మీడియాలో వేణు స్వామి చెప్పిన రాంగ్ ప్రెడిక్షన్ మీద ఇంటరెస్టింగ్ చర్చ నడుస్తోంది. దీనిపై ఆయన ఇప్పటి వరకు రియాక్ట్ కాలేదు. అయితే నాగ చైతన్య మాత్రం వేణు స్వామి జాతకాన్ని లైట్ తీసుకున్నట్లు తెలుస్తోంది. మరి ఈ తరహా విమర్శలకు వేణు స్వామి ఎలాంటి క్లారిటీ ఇస్తారో చూడాలి.