జస్లీన్‌తో విజయ్ దేవరకొండ సర్‌ప్రైజ్

తెలుగు సినిమా రంగంలో ప్రత్యేకమైన ఇమేజ్‌ను అందుకోవడంతో పాటు మార్కెట్‌ను పెంచుకుంటూ సత్తా చాటుతున్నాడు క్రేజీ హీరో విజయ్ దేవరకొండ. కెరీర్ ఆరంభంలోనే వరుసగా హిట్లు మీద హిట్లను అందుకున్న అతడు.. ఈ మధ్య కాలంలో మాత్రం ఆశించిన రీతిలో ఫలితాలను రాబట్టలేకపోతున్నాడు. దీంతో సరికొత్త ప్రయోగాలు చేస్తూ ముందుకు సాగుతున్నాడు.

విజయ్ దేవరకొండ ప్రస్తుతం గౌతమ్ తిన్ననూరి దర్శకత్వంలో ఓ పవర్‌ఫుల్ మూవీ చేస్తున్నాడు. దీనికి సంబంధించిన షూటింగ్ శరవేగంగా సాగుతోంది. ఇప్పటికే చాలా వరకూ టాకీ పార్టును కూడా కంప్లీట్ చేసుకున్నారు. దీనితో పాటు విజయ్ దేవరకొండ తన 14వ సినిమాను కూడా లైన్‌లో పెట్టేసుకున్నాడు. దీన్ని రాహుల్ సాంకృత్యాన్ తెరకెక్కించబోతున్నాడు. ఇప్పటికే దీనికి సంబంధించిన ప్రకటన కూడా వెలువడింది.

వరుసగా సినిమాల మీద సినిమాలు ప్రకటిస్తూ ముందుకు సాగుతోన్న విజయ్ దేవరకొండ తన 15వ సినిమాను రవి కిరణ్ కోలా దర్శకత్వంలోనూ ఓ మూవీ చేయబోతున్నాడు. ఇలా చేతి నిండా ప్రాజెక్టులతో తీరక లేకుండా గడుపుతోన్న విజయ్ దేవరకొండ.. ఇప్పుడు ఓ మ్యూజిక్ ఆల్బమ్‌లో సందడి చేయబోతున్నాడు. ఇప్పటికే దీనికి సంబంధించిన న్యూస్ తెలుగు రాష్ట్రాల్లో హాట్ టాపిక్ అయిన సంగతి తెలిసిందే.

'హీరియే హీరియే' అంటూ గతంలో పాటను కంపోజ్ చేసి దేశం మొత్తం సెన్సేషన్ అయిన జస్లీన్ రాయల్‌తో విజయ్ దేవరకొండ ఓ మ్యూజిక్ ఆల్బమ్ చేసినట్లు తాజాగా ఒక వార్త వైరల్ అవుతోంది. ఇందులో వీళ్లిద్దరూ జంటగా సందడి చేసినట్లు సమాచారం వైరల్ అవుతోంది. ఇప్పటికే దీనికి సంబంధించిన షూటింగ్ కూడా పూర్తైనట్లు తెలిసింది. దీనికి జస్లీన్ రాయల్ బలాన్ని చేకూర్చేలా తాజాగా పోస్ట్ చేసింది.

సోషల్ మీడియాలో ఎంతో యాక్టివ్‌గా ఉండే జస్లీన్ రాయల్ 'నా సూపర్ స్టార్ ఫ్రెండ్ దుల్కర్ సల్మాన్‌తో నేను గ్లోబల్ చార్ట్‌బస్టర్ 'హీరియే'ను రూపొందించాను. మీరందరూ చాలా ఆదరించారు. కానీ, ఇప్పుడు మా వెనుక ఎవరున్నారు?' అంటూ ఓ ఫొటోను షేర్ చేసింది. ఇందులో దుల్కర్, జస్లీన్ ముఖాలు కనిపించగా.. వాళ్ల వెనుక మరొకరు ఉన్నారు. అతడే విజయ్ దేవరకొండ.

జస్లీన్ షేర్ చేసిన ఈ ఫొటోను చూసిన తర్వాత అందరూ అతడు మ్యూజిక్ వీడియోలో కనిపించేది నిజమే అని అంచనాకు వచ్చేస్తున్నారు. దీంతో ఇప్పుడు విజయ్ దేవరకొండ అభిమానులు దీని కోసం ఆసక్తిగా ఎదురు చూస్తున్నారు. అదే సమయంలో బస్లీన్ కంపోజ్ చేయబోతున్న కొత్త పాటపై అందరిలోనూ అంచనాలు కూడా భారీగా ఏర్పడుతున్నాయి.