దేవరకొండ పెండింగ్ ప్రాజెక్ట్ కు వేళాయే

టాలీవుడ్ యంగ్ హీరో విజయ్ దేవరకొండ.. ప్రస్తుతం ఫ్యామిలీ స్టార్ సినిమా చేస్తున్న విషయం తెలిసిందే. వేసవి కానుకగా ఏప్రిల్ 5వ తేదీన విడుదల అవ్వనున్న ఈ మూవీలో మృణాల్ ఠాకూర్ హీరోయిన్ గా నటిస్తోంది. గీతా గోవిందంతో విజయ్ కు సూపర్ హిట్ ఇచ్చిన పరశురామ్ ఈ సినిమాను తెరకెక్కిస్తున్నారు. శ్రీ వెంకటేశ్వర క్రియేషన్స్ బ్యానర్ పై దిల్ రాజు నిర్మిస్తుండగా.. గోపీసుందర్ మ్యూజిక్ అందిస్తున్నారు.

ఈ క్రేజీ ఫామిలీ యాక్షన్ ఎంటర్టైనర్ మూవీ నుంచి ఇప్పటికే రిలీజ్ అయిన ఫస్ట్ లుక్ టీజర్, పోస్టర్స్ తోపాటు నందనందనా సాంగ్ సినీ లవర్స్ ను తెగ ఆకట్టుకున్నాయి. సినిమాపై మంచి బజ్ క్రియేట్ చేశాయి. త్వరలోనే ఈ మూవీలోని సాంగ్స్ షూటింగ్ కంప్లీట్ చేయనున్నారట మేకర్స్. ఇటీవల విజయ్ తన డబ్బింగ్ పార్ట్ ను పూర్తి చేసేశారట. త్వరలోనే ఈ సినిమా ప్రమోషన్లను చిత్ర బృందంతో కలిసి ప్రారంభించనున్నారట.

ఇప్పుడు విజయ్ దేవరకొండ పెండింగ్ ప్రాజెక్ట్ కు సంబంధించి సినీ వర్గాల్లో వార్తలు వినిపిస్తున్నాయి. గౌతమ్ తిన్ననూరితో విజయ్ చేస్తున్న సినిమా షూటింగ్ త్వరలోనే రీస్టార్ట్ కానుందట. మార్చి చివరిలో VD12 సెట్స్ లో విజయ్ అడుగుపెట్టనున్నారట. అయితే ఈ సినిమా కొత్త షెడ్యూల్ శ్రీలంకలో జరగనున్నట్లు తెలుస్తోంది. తొలిసారి పోలీస్ రోల్ లో విజయ్ నటిస్తున్న ఈ మూవీ.. 2024లో విడుదలయ్యే అవకాశం ఉంది.

మరోవైపు, ఈ సినిమా షూటింగ్ కు ఫ్యామిలీ స్టార్ కోసం విజయ్ బ్రేక్ ఇవ్వడంతో.. గౌతమ్ తిన్ననూరి సితార ఎంటర్టైన్మెంట్స్ నిర్మాణంలో మ్యాజిక్ సినిమా చేస్తున్నారు. సెన్సిబుల్ టీనేజ్ డ్రామాగా రాబోతున్న ఈ మూవీ షూటింగ్ ఇప్పటికే పూర్తి చేసుకుంది. ప్రస్తుతం పోస్ట్ ప్రొడక్షన్ పనులు జరుపుకుంటోంది. అయితే మ్యాజిక్ పెండింగ్ వర్క్స్ ను కంప్లీట్ చేసి గౌతమ్ తిన్ననూరి కూడా ఈ వీక్ లో ఫ్రీ అవ్వనున్నారట.

అయితే VD12 మూవీలో హీరోయిన్ ఇంకా ఫిక్స్ కాలేదు. యంగ్ బ్యూటీ శ్రీలీల ఫిమేల్ లీడ్ రోల్ పోషించాల్సి ఉండగా.. ఆమె తప్పుకున్నట్లు ఎప్పటి నుంచో వార్తలు వస్తున్నాయి. ఇప్పుడు యానిమల్ మూవీతో తో లైమ్ లైట్ లోకి వచ్చిన త్రిప్తి డిమ్రీని మేకర్స్ సంప్రదిస్తున్నట్టు సమాచారం. సప్త సాగరాలు దాటి ఫేమ్ రుక్మిణీ వసంత్ ను కూడా అప్రోచ్ అయినట్లు తెలుస్తోంది. మరి ఈ ప్రాజెక్ట్ లో హీరోయిన్ గా ఎవరు నటిస్తారో చూడాలి.