విజయ్ GOAT.. ఆ విషయంలో భయం భయంగా..
కోలీవుడ్ స్టార్ హీరో విజయ్ దళపతికి తమిళంతో పాటు తెలుగులో కూడా మంచి క్రేజ్ ఉన్న విషయం తెలిసిందే.
By: Tupaki Desk | 24 Aug 2024 10:33 AM GMT
కోలీవుడ్ స్టార్ హీరో విజయ్ దళపతికి తమిళంతో పాటు తెలుగులో కూడా మంచి క్రేజ్ ఉన్న విషయం తెలిసిందే. ఆయన నటించిన సినిమాలను టాలీవుడ్ సినీ ప్రియులు కూడా ఆదరిస్తుంటారు. విజయ్ కు ఇక్కడ స్పెషల్ ఫ్యాన్స్ ఉన్నారు. ఆయన నటించిన అన్ని సినిమాలు తమిళంతో పాటు తెలుగులోనూ రిలీజ్ అవుతాయి. వాటిలో చాలా చిత్రాలు.. ఇక్కడ భారీ వసూళ్లు సాధించాయి. అయితే ప్రస్తుతం విజయ్ నటిస్తున్న సినిమా GOAT (ది గ్రేటెస్ట్ ఆఫ్ ఆల్ టైమ్).
పొలిటికల్ ఎంట్రీ విషయంలో పూర్తిగా క్లారిటీ ఇచ్చిన తర్వాత విజయ్ నటిస్తున్న ఈ చిత్రానికి వెంకట్ ప్రభు దర్శకత్వం వహిస్తున్నారు. ఇప్పటికే షూటింగ్ పూర్తి చేసుకున్న ఈ సినిమాలో తండ్రీకొడుకులుగా కనిపించనున్నారు విజయ్. ప్రస్తుతం పోస్ట్ ప్రొడక్షన్ వర్క్ జరుపుకుంటున్న గోట్ మూవీ.. సెప్టెంబర్ 5వ తేదీన విడుదల కానుంది. రిలీజ్ టైమ్ దగ్గర పడుతున్న కొద్దీ మేకర్స్ ప్రమోషన్స్ లో స్పీడ్ పెంచారు. అందులో భాగంగా ఇటీవల ట్రైలర్ ను రిలీజ్ చేశారు మేకర్స్.
సినిమా ఓ మిషన్ కోసం వర్క్ చేసే స్పై రోల్ లో విజయ్ కనిపించబోతున్నట్లు ట్రైలర్ ద్వారా క్లారిటీ వచ్చేసింది. మిషన్ లో ఎదురయ్యే సవాళ్లు, తండ్రికి కొడుకు హెల్ప్ చేయడం వంటి పలు ఎమోషనల్ సీన్స్ తో ట్రైలర్ కట్ చేశారు మేకర్స్. అయితే ట్రైలర్ టాలీవుడ్ సినీ ప్రియులను అనుకున్నంత స్థాయిలో మెప్పించలేకపోయింది. చెప్పాలంటే అనౌన్స్మెంట్ నుంచి కూడా తెలుగులో అంత బజ్ క్రియేట్ చేసుకోలేకపోయింది మూవీ. అప్డేట్స్ కూడా యావరేజ్ రెస్పాన్స్ అందుకున్నాయి.
అయితే సెన్సార్ బోర్డు ద్వారా యూఏ సర్టిఫికెట్ అందుకున్న GOAT మూవీ.. రన్ టైమ్ 3 గంటలని సినీ వర్గాల్లో టాక్ వినిపిస్తోంది. గోట్ మూవీ నిడివి 2 గంటల 59 నిమిషాల 39 సెకన్లుగా తెలుస్తోంది. దీంతో అంత రన్ టైమ్ ఉంటే సినీ ప్రియులకు కాస్త కష్టంగా అనిపిస్తుందని నెటిజన్లు అభిప్రాయపడుతున్నారు. లాంగ్ రన్ టైమ్ తో వచ్చిన అలరించని సినిమాలను కొందరు గుర్తు చేస్తున్నారు. ప్రేక్షకుల ఇంట్రెస్ట్ అండ్ పేషెన్స్ బాగా తగ్గిపోయిందని మరికొందరు చెబుతున్నారు.
ప్రస్తుత రోజుల్లో ఆడియన్స్.. ఫోన్స్ చూడకుండా మూవీపై ఫోకస్ చేసేలా సినిమా తీయడం సవాలుగా మారిందని చెబుతున్నారు. అయినప్పటికీ కొందరు డైరెక్టర్స్.. తమ సత్తా చాటుతున్నారని కొనియాడుతున్నారు. లాంగ్ రన్ టైమ్ ఉన్నా.. తమ టాలెంట్ తో మెప్పిస్తున్నారని అంటున్నారు. యంగ్ హీరో నాగచైతన్యతో వెంకట్ ప్రభు చేసిన కస్టడీ ఫ్లాప్ అయిన విషయం తెలిసిందే. ఇప్పుడు లాంగ్ రన్ టైమ్ తో ఆయన తీసుకొస్తున్న గోట్ మూవీ ఎలా ఉంటుందో వేచి చూడాలి.
