ఆ రోజు అన్ని థియేటర్లలో ఒక్కటే సినిమా..!

తమిళ సూపర్‌ స్టార్‌ విజయ్ రాజకీయ రంగ ప్రవేశం చేసేందుకు ఏర్పాట్లు చేసుకుంటున్నాడు. ఇప్పటికే పార్టీ ని ప్రకటించిన విజయ్ వచ్చే తమిళనాడు అసెంబ్లీ ఎన్నికల వరకు పూర్తి స్థాయిలో రాజకీయ నాయకుడిగా మారేందుకు సిద్ధంగా ఉన్నాడు. అందుకు సబంధించిన బ్యాక్ గ్రౌండ్‌ వర్క్‌ స్పీడ్‌ గా జరుగుతున్నట్లుగా తమిళ మీడియా వర్గాల్లో చర్చ జరుగుతోంది. మరో వైపు ఆయన సినిమాలకు సంబంధించిన విషయాలు కూడా అందరి దృష్టిని ఆకర్షిస్తున్నాయి. ప్రస్తుతం వెంకట్ ప్రభు దర్శకత్వంలో 'ది GOAT' సినిమాను చేస్తున్న విషయం తెల్సిందే.

విజయ్ కి ది GOAT సినిమా చివరి సినిమా అయ్యే అవకాశాలు ఉన్నాయి. ఆయన రాజకీయాల్లో సక్సెస్‌ అయ్యి ఉన్నత పదవులు దక్కించుకుంటే మళ్లీ సినిమాల వైపు చూసే అవకాశాలు లేవు అని తమిళ సినీ వర్గాల్లో చర్చ జోరుగా సాగుతోంది. అందుకే ది GOAT సినిమాకు సాధ్యం అయినంత ఎక్కువ గ్రాండ్‌ రిలీజ్ అవకాశాలు ఇచ్చి, ఆ సినిమా భారీ వసూళ్లు దక్కించుకుని రికార్డ్‌ లు నమోదు చేసే విధంగా చూడాలని చిత్ర యూనిట్‌ సభ్యులతో పాటు , ఆయన ఫ్యాన్స్ కూడా చాలా పట్టుదలతో ఉన్నారు. అందుకోసం చాలా ప్రిపరేషన్స్ జరుగుతున్నాయని చిత్ర యూనిట్‌ సభ్యుల ద్వారా సమాచారం అందుతోంది.

ముఖ్యంగా సినిమాను తమిళనాడులోని నూటికి నూరు శాతం అన్ని థియేటర్‌ లలో విడుదల చేయబోతున్నారు. అంటే సింగిల్ స్క్రీన్‌ మల్టీప్లెక్స్ లు అన్నింటిలో కూడా ది GOAT సినిమా విడుదల రోజు ఆ ఒక్క సినిమా తప్ప మరే సినిమా కూడా ఉండబోదు. అంటే ఆ ఒక్క రోజులోనే సాధ్యం అయినంత ఎక్కువ వసూళ్లు నమోదు అయ్యే అవకాశం ఉంది. బీస్ట్‌ సినిమా తమిళనాడు లో భారీ ఎత్తున రిలీజ్ అవ్వడం వల్ల మొదటి రోజు అత్యధిక వసూళ్లు దక్కించుకుని ఇండస్ట్రీ టాప్‌ గా నిలిచింది. ఇప్పుడు ది GOAT సినిమా విషయంలో కూడా అదే పునరావృతం అవ్వబోతుంది.

సినిమాకు పాజిటివ్ టాక్ వస్తే మూడు రోజులు కూడా థియేటర్లలో అలాగే సినిమాను కంటిన్యూ చేసే అవకాశాలు లేకపోలేదు. అదే నిజం అయితే వసూళ్లు సంచలనంగా నిలిచే అవకాశాలు ఉన్నాయి. తమిళ బాక్సాఫీస్ వద్ద ఇప్పటికే విజయ్ సినిమాలకు ఎన్నో రికార్డులు ఉన్నాయి. వాటితో పోల్చితే ది GOAT సినిమా సాధించబోతున్న రికార్డ్‌ అంతకు మించి అన్నట్లుగా ఉండటం ఖాయం అన్నట్లుగా విజయ్ ఫ్యాన్స్ చాలా నమ్మకంతో ఉన్నారు. ఈ సినిమాలో విజయ్ కి జోడీగా మీనాక్షి చౌదరి హీరోయిన్‌ గా నటిస్తున్న విషయం తెల్సిందే.

ఇంకా ఈ సినిమాలో స్నేహా, లైలా, ప్రశాంత్‌, ప్రభుదేవా, యోగిబాబు తో పాటు పలువురు ప్రముఖ తమిళ నటీనటులు నటిస్తున్నారు. విజయ్ గత చిత్రాలు తమిళంతో పాటు ఇతర భాషల్లో కూడా భారీగా వసూళ్లు సాధించాయి. కనుక ది GOAT సినిమాను తెలుగు, హిందీ ఇంకా ఇతర సౌత్‌ భాషల్లో కూడా డబ్‌ చేసి విడుదల చేసే విధంగా ప్లాన్‌ చేస్తున్నారు. విజయ్ కి స్పెషల్‌ సినిమా అంటూ ప్రచారం చేయడం ద్వారా ఇతర భాషల్లో కూడా మంచి వసూళ్లు ఈ సినిమా దక్కించుకునే అవకాశాలు ఉన్నాయి అంటూ సినీ విశ్లేషకులు అభిప్రాయం వ్యక్తం చేస్తున్నారు.