'అతడు' తో విజయ్ సేతుపతి రిలేషన్‌
ఇంటర్వ్యూలో విజయ్ సేతుపతి మాట్లాడుతూ.... తాను కెరీర్‌ లో ఇబ్బందులు ఎదుర్కొంటున్న సమయంలో మహేష్ బాబు హీరోగా త్రివిక్రమ్‌ దర్శకత్వంలో రూపొందిన 'అతడు' సినిమాను ఎక్కువగా చూసేవాడిని.
By: Tupaki Desk | 12 Aug 2024 6:18 AM GMT
కోలీవుడ్‌ తో పాటు టాలీవుడ్‌ ఇంకా బాలీవుడ్‌ లో కూడా వరుసగా సినిమాలు చేస్తున్న విజయ్ సేతుపతి పాన్‌ ఇండియా స్టార్‌ గా గుర్తింపు దక్కించుకున్నాడు. ఏడాదికి మూడు నాలుగు సినిమాలు చేస్తున్న విజయ్ సేతుపతి ఇటీవల మహారాజా సినిమాతో ప్రేక్షకుల ముందుకు వచ్చాడు. ఆ సినిమా తమిళనాట బాక్సాఫీస్ వద్ద భారీ వసూళ్లు రాబట్టడంతో పాటు ప్రస్తుతం నెట్‌ ఫ్లిక్స్ లో కూడా రికార్డ్‌ లను క్రియేట్‌ చేస్తుంది. విదేశాల్లో కూడా మహారాజా సినిమాకు మంచి రెస్పాన్స్ వస్తున్న నేపథ్యంలో సుదీర్ఘ కాలంగా ఈ సినిమా టాప్ లో కొనసాగుతుందని నెట్‌ ఫ్లిక్స్ అధికారికంగా ప్రకటించింది.
ఇండస్ట్రీలో అడుగు పెట్టిన తక్కువ సమయంలోనే 50 సినిమాలు పూర్తి చేసుకున్న విజయ్ సేతుపతి రాబోయే నాలుగు అయిదు సంవత్సరాల్లోనే వంద మార్క్ ను క్రాస్ చేసినా ఆశ్చర్యం లేదు అంటూ తమిళ సినీ వర్గాల వారు మరియు మీడియా సర్కిల్స్ వారు అభిప్రాయం వ్యక్తం చేస్తున్నారు. విజయ్ సేతుపతి ఒక వైపు హీరోగా నటిస్తూ మరో వైపు క్యారెక్టర్ ఆర్టిస్టుగా, విలన్ గా సినిమాలు చేస్తున్నాడు. తాజాగా ఒక మీడియా సంస్థకు ఇచ్చిన ఇంటర్వ్యూలో విజయ్ సేతుపతి తన కెరీర్‌ ఆరంభంలో ఎదుర్కొన్న సవాళ్లను మరియు ఇబ్బందులను గురించి చెప్పుకొచ్చాడు.
ఇంటర్వ్యూలో విజయ్ సేతుపతి మాట్లాడుతూ.... తాను కెరీర్‌ లో ఇబ్బందులు ఎదుర్కొంటున్న సమయంలో మహేష్ బాబు హీరోగా త్రివిక్రమ్‌ దర్శకత్వంలో రూపొందిన 'అతడు' సినిమాను ఎక్కువగా చూసేవాడిని. ఆ సినిమాలో మహేష్ బాబు ఎంట్రీ సీన్‌ నుంచి ముగింపు వరకు చాలా ప్రత్యేకంగా ఉంటుంది. హీరో మరియు హీరోయిన్ పాత్రతో పాటు, సినిమాలోని ప్రతి ఒక్క పాత్ర ను కూడా దర్శకుడు చాలా బాగా రూపొందించారు. సినిమాలోని పాత్రల భావోద్వేగాలను అద్భుతంగా త్రివిక్రమ్‌ చూపించారు. హీరో, హీరోయిన్ మధ్య సన్నివేశాలను కూడా ఆయన బాగా చూపించారు.
కమర్షియల్‌ గా అతడు సినిమా అంతగా ఆడకున్నా కూడా ఎంతో మందికి ఇప్పటికి కూడా ఫేవరెట్‌ మూవీగా నిలిచింది. మహేష్ బాబు కెరీర్‌ లో ఎన్నో సూపర్‌ హిట్ సినిమాలు వచ్చినా కూడా 'అతడు' చాలా ప్రత్యేకమైన సినిమా అంటూ ఆయన ఫ్యాన్స్ అంటూ ఉంటారు. అందుకే విజయ్ సేతుపతి కూడా తనకు అతడు సినిమా చాలా ప్రత్యేకం అని, కెరీర్‌ లో ఒడిదొడుకులు ఎదుర్కొన్న సమయంలో అతడు సినిమాను చూశాను అంటూ చెప్పుకొచ్చాడు. అతడు సినిమాలోని బ్రహ్మానందం కామెడీ గురించి ఎంత చెప్పినా తక్కువే. త్రిష అందంతో పాటు నటనతో మెప్పించింది.
ప్రస్తుతం మహేష్ బాబు సినిమాల విషయానికి వస్తే రాజమౌళి దర్శకత్వంలో సినిమా కోసం రెడీ అవుతున్నాడు. గతంలో ఎప్పుడు లేని విధంగా మహేష్ బాబు గుబురు గడ్డం పెంచాడు. అంతే కాకుండా హెయిర్ స్టైల్ ను కూడా మార్చాడు. ఈ ఏడాదిలోనే రాజమౌళి, మహేష్ బాబు కాంబో మూవీ పట్టాలెక్కుతోంది. అతి త్వరలోనే సినిమాకు సంబంధించిన అధికారిక ప్రకటన నిర్మాత నుంచి వచ్చే అవకాశాలు ఉన్నాయి. 2026 వరకు సినిమా విడుదల చేయాలని రాజమౌళి భావిస్తున్నాడట.
