కొత్త బాస్‌... ఆ పుకార్లు నిజమే

తెలుగు మరియు తమిళ బిగ్ బాస్ షో లు దాదాపు ఒకేసారి ప్రారంభం అయ్యాయి. ఇప్పటి వరకు రెండు బిగ్ బాస్ లు కూడా ఏడు సీజన్ లు పూర్తి చేసుకున్నాయి. తెలుగు బిగ్‌ బాస్ కి ఎన్టీఆర్‌, నాని ఒక్కో సీజన్ కి హోస్టింగ్ చేయగా, మిగిలిన అయిదు సీజన్‌ లకు నాగార్జున హోస్టింగ్ చేసిన విషయం తెల్సిందే. త్వరలో ప్రారంభం కాబోతున్న 8వ సీజన్ కి కూడా నాగార్జున హోస్టింగ్‌ చేసేందుకు రెడీగా ఉన్నాడు. ఇటీవల ప్రోమో కూడా విడుదల అయ్యింది. అయితే తమిళ బిగ్ బాస్ విషయంలో కాస్త గందరగోళ పరిణామాలు చోటుచేసుకుంటున్నాయి.

తమిళ బిగ్ బాస్‌ సీజన్ 1 నుంచి మొదలుకుని సీజన్ 7 వరకు అన్ని సీజన్‌ లకు కూడా కమల్‌ హాసన్ హోస్టింగ్‌ చేయడం జరిగింది. అనారోగ్య కారణాల వల్ల స్టేజ్ పై చైర్‌ వేసుకుని మరీ షో ను నిర్వహించిన దాఖలాలు ఉన్నాయి. అలాంటి కమల్‌ హాసన్ బిగ్‌ బాస్‌ తమిళ్ సీజన్ 8 కి అందుబాటులో ఉండటం లేదు. తాను బిగ్ బాస్ కి గుడ్‌ బై చెప్పేయాలని నిర్ణయించుకున్నట్లుగా ప్రకటించాడు. అప్పటి నుంచి కూడా కొత్త తమిళ బిగ్‌ బాస్ ఎవరా అని అంతా ఆసక్తిగా ఎదురు చూస్తున్నారు. పలువురి పేర్లు ప్రస్తావనకు వచ్చిన విజయ్ సేతుపతి అంటూ పుకార్లు పెద్ద ఎత్తున వచ్చాయి.

సోషల్‌ మీడియాతో పాటు, తమిళ మీడియా లో కూడా విజయ్ సేతుపతి కచ్చితంగా బిగ్‌ బాస్‌ షో కి న్యాయం చేస్తాడు అనే అభిప్రాయం ను వ్యక్తం చేయడం జరిగింది. అధికారికంగా ఎలాంటి అప్‌డేట్‌ లేక పోవడంతో ఆ వార్తలు నిజం కాదేమో అనే అనుమానాలను కొందరు వ్యక్తం చేశారు. సోషల్‌ మీడియాలో వచ్చిన పుకార్లు నిజమే అన్నట్లుగా ఇటీవలే తమిళ బిగ్ బాస్ నిర్వాహకులు హోస్ట్‌ విజయ్‌ అన్నట్లుగా లీక్ ఇచ్చారు. షో నిర్వాహకులు అధికారికంగా ప్రకటించేందుకు కూడా ఏర్పాట్లు జరుగుతున్నాయి. కమల్‌ కి ఏమాత్రం తగ్గకుండా బిగ్ బాస్‌ ను విజయ్‌ సేతుపతి నిర్వహిస్తాడనే నమ్మకం వ్యక్తం అవుతోంది.

విజయ్ కి టెలివిజన్‌ షో కొత్త కాదు, గతంలో ఒక వంటల కార్యక్రమం కు హోస్టింగ్ చేశాడు. మాస్టర్‌ చెఫ్‌ ఇండియా - తమిళ్‌ సీజన్‌ 1 కి హోస్టింగ్‌ చేయడం ద్వారా బుల్లి తెర ప్రేక్షకులకు చేరువ అయ్యాడు. కనుక బిగ్‌ బాస్ ద్వారా మరింతగా దగ్గర అవ్వడం ఖాయం. అంతే కాకుండా షో ను చూసే ప్రేక్షకులకు వినోదాన్ని ఇవ్వడంతో పాటు, హౌస్‌ లో ఉండే వారితో చాలా కఠినంగా వ్యవహరిస్తాడు అనే అభిప్రాయం వ్యక్తం అవుతోంది. మొత్తానికి బిగ్‌ బాస్ తమిళ సీజన్‌ 8 కి విజయ్ సేతుపతి అంటూ ఇన్నాళ్లుగా వస్తున్న వార్తలు నిజమే అన్నట్టు కొత్త బాస్ ఆయనే అంటూ తమిళ మీడియాలో పెద్ద ఎత్తున కథనాలు వస్తున్నాయి.