కొత్త నిర్మాతలకు విశాల్‌ సలహా..!

సినిమా ఇండస్ట్రీలో సక్సెస్‌ రేటు చాలా తక్కువ. ప్రతి ఏడాది ఎంతో మంది నిర్మాతలు వస్తూ ఉంటారు. అందులో కొద్ది మంది నిర్మాతలు మాత్రమే తదుపరి ఏడాది కనిపిస్తారు. ఒకటి రెండు సినిమాలు చేసి కనిపించకుండా పోతున్న నిర్మాతలు చాలా మంది ఉంటారు. ఇండస్ట్రీలో సినిమాలు నిర్మించి కోట్లు లాభాలు పొందాలని అనుకునే నిర్మాతలకు వెంటనే అసలు విషయం తెలిసి వస్తుంది. ఒక్క సినిమాకు వచ్చిన నష్టం తో మళ్లీ ఇండస్ట్రీ వైపు తిరిగి చూసేందుకు భయపడే స్థాయికి వెళ్తాడు. అందుకే సినిమా ఇండస్ట్రీలో నిర్మాతగా అడుగు పెట్టే సమయంలో ఒకటికి రెండు మూడు సార్లు ఆలోచించుకోవాల్సిన అవసరం ఉందని హీరో విశాల్‌ చెప్పుకొచ్చాడు.

తాజాగా ఒక చిట్‌ చాట్‌లో విశాల్‌ మాట్లాడుతూ... సినిమా ఇండస్ట్రీలో సక్సెస్ రేటు చాలా తక్కువ. ఒక సినిమా రూపొందించాలంటే మినిమం గా రూ.5 కోట్లు కావాల్సిందే. ఆ డబ్బును మీ పిల్లల పేరు మీద పిక్స్‌డ్‌ డిపాజిట్‌ చేస్తే లేదంటే రియల్‌ ఎస్టేట్‌లో పెట్టుబడి పెడితే లాభం ఉంటుంది. అదే ఇండస్ట్రీలో పెడితే ఎక్కువ శాతం నష్టపోవాల్సి ఉంటుంది. ఇండస్ట్రీలో పరిస్థితులు ఏమాత్రం బాగాలేవు అన్నారు. ఇదే విషయాన్ని తాను గతంలోనే చెప్పాను అని, అప్పుడు నన్ను ఇండస్ట్రీలోని వారు కొందరు విలన్‌గా చూశారు. ఇండస్ట్రీకి నష్టం కలిగించే విధంగా నా మాటలు ఉన్నాయని కొందరు నన్ను విమర్శించారని విశాల్‌ అన్నాడు.

బాగా డబ్బున్న వారు సినిమాలను నిర్మించవచ్చు. కానీ వారు సినిమాలను నిర్మించేందుకు ఆసక్తి చూపించరు. ఎందుకంటే వారికి సినిమా ఇండస్ట్రీలో డబ్బు పెడితే వెనక్కి రాదని వారికి తెలుసు. అందుకే బిలియనీర్‌లు సినిమా ఇండస్ట్రీపై ఆసక్తి చూపించడం లేదు. కానీ మీడియం రేంజ్‌ ఉన్న వారు మాత్రమే సినిమాల నిర్మాణంపై ఆసక్తి చూపిస్తున్నారు. వారు తమ వద్ద ఉన్న డబ్బు మొత్తం పెట్టుబడిగా పెట్టి సినిమా తీస్తే చివరికి మిగిలేది నష్టాలు, అప్పులు. దాంతో వారు సినిమా ఇండస్ట్రీ నుంచి ఖాళీ చేతులతో వెనక్కి వెళ్లాల్సి వస్తుందని విశాల్‌ అభిప్రాయం వ్యక్తం చేశారు.

గత ఏడాది తమిళ సినిమా ఇండస్ట్రీ నుంచి వచ్చిన సినిమాల్లో కనీసం 10 శాతం సినిమాలు కూడా మినిమం ఆడలేదు. అందుకే నిర్మాతలు జాగ్రత్తగా ఉండాలని విశాల్ సున్నితంగా హెచ్చరించారు. ఇక విశాల్‌ హీరోగా నటించిన 'మదగజరాజా' సినిమా ఇటీవల పొంగల్‌ కానుకగా ప్రేక్షకుల ముందుకు వచ్చింది. కొన్ని కారణాల వల్ల 12 ఏళ్ల క్రితం షూటింగ్‌ పూర్తి చేసుకుని విడుదల వాయిదా పడుతూ వచ్చిన ఈ సినిమా ఎట్టకేలకు విడుదలై మంచి విజయాన్ని సొంతం చేసుకుంది. తమిళ్‌లో భారీ విజయాన్ని సొంతం చేసుకోవడంతో తెలుగులోనూ విడుదలకు ఏర్పాట్లు చేశారు. అంజలి, వరలక్ష్మి శరత్‌ కుమార్‌లు ఈ సినిమాలో విశాల్‌కి జోడీగా నటించారు.