ఆ 15 రోజులే ఇన్ స్టా.. విశ్వక్ కొత్త కండిషన్!

టాలీవుడ్ యంగ్ హీరో విశ్వక్ సేన్.. బ్యాక్ టు బ్యాక్ సినిమాలతో ఆడియన్స్ ను అలరిస్తున్న విషయం తెలిసిందే. ఇప్పటికే ఈ ఏడాది గామి, గ్యాంగ్స్ ఆఫ్ గోదావరి చిత్రాలతో ప్రేక్షకుల ముందుకు వచ్చిన మాస్ కా దాస్.. ఇప్పుడు వరుస సినిమాలను లైన్ లో పెట్టేశారు. చేతి నిండా సినిమాలతో బిజీగా గడుపుతున్నారు. కంటిన్యూగా షూటింగ్స్ లో పాల్గొంటున్నారు. దీపావళి కానుకగా మెకానిక్ రాకీ మూవీతో థియేటర్లలో సందడి చేయనున్నారు విశ్వక్ సేన్.

అయితే సోషల్ మీడియాలో ఎప్పుడూ యాక్టివ్ గా ఉండే విశ్వక్ సేన్.. సడెన్ గా దూరమైన విషయం తెలిసిందే. చిన్న బ్రేక్ అని చెప్పి.. ఇన్ స్టా అకౌంట్ డీయాక్టివేట్ చేశారు. ఇటీవల తానెందుకు సోషల్ మీడియాకు దూరంగా ఉంటున్నానో కూడా క్లారిటీ ఇచ్చారు. రీల్స్ ను చూస్తుండటం వల్ల బాగా టైమ్ అయిపోతుందని తెలిపారు. నైట్ నిద్ర వస్తున్నా కూడా రీల్స్ చూసుకుంటూ కూర్చుంటున్నానని అన్నారు. ఏం జరుగుతుందో అర్థం కాక ఇన్ స్టాగ్రామ్ తీసేశానని చెప్పారు.

సోషల్ మీడియా లేకుండా ఉంటే అదేదో తప్పు అయినట్టు చూస్తున్నట్లు తెలిపారు. కొన్ని రోజుల పాటు దూరంగా ఉందామని ఇన్ స్టా తీసినట్లు చెప్పారు. దీంతో ఫ్యాన్స్ మళ్లీ ఎప్పుడు వస్తారన్నా అంటూ అడగడం ప్రారంభించారు. ఈ విషయంపై మెకానిక్ రాకీ మూవీ గ్లింప్స్ రిలీజ్ ఈవెంట్ లో స్పందించారు. తన ఏజ్ కు తగ్గట్లుగా కాకుండా ఫోన్ ఎక్కువ సేపు వాడటం తనకే నచ్చలేదని విశ్వక్ తెలిపారు. అందుకే ఫోన్ పక్కనపెట్టి.. వర్క్ పై స్పెషల్ ఫోకస్ పెట్టానని చెప్పారు.

అయితే తాను నటించిన సినిమా రిలీజ్ కు ఒక వారం ముందు యాక్టివేట్ చేస్తానని చెప్పారు విశ్వక్. కానీ మూవీ రిలీజ్ అయిన వారం తర్వాత డీయాక్టివేట్ చేసేస్తానని వెల్లడించారు. ఇన్ స్టా అకౌంట్ డిలీట్ కు ఎవరూ కారణం కాదని తెలిపారు. ఏ నటి వల్ల కూడా చేయలేదని క్లారిటీ ఇచ్చారు. అభిమానుల కోసమే ఇన్ స్టాలో ఉన్నానని తెలిపారు. ఇప్పుడు డీయాక్టివేట్ చేయడానికి స్పష్టమైన కారణం కూడా ఉందన్నారు. ప్రస్తుతం విశ్వక్ కామెంట్స్ నెట్టింట తెగ చక్కర్లు కొడుతున్నాయి.

మరోవైపు, మెకానిక్ రాకీ మూవీతో పర్సనల్ గా కనెక్ట్ అయినట్లు చెప్పారు విశ్వక్. ఆ సినిమా స్టోరీ విన్నప్పుడు కొత్తగా అనిపించిందని తెలిపారు. లోకల్ కారు మెకానిక్ స్టోరీనే సినిమా అని పేర్కొన్నారు. తనను ఎలాంటి చిత్రాల్లో చూడాలని ఫ్యాన్స్ ఆశపడుతున్నారో.. అలాంటి ప్రాజెక్టులనే చేస్తున్నట్లు వెల్లడించారు. మరి మెకానిక్ రాకీ మూవీతో విశ్వక్ సేన్ ఎలాంటి హిట్ అందుకుంటారో వేచి చూడాలి.