వరుణ్ తేజ్- లావణ్య పెళ్లి వెన్యూ ఇదే
వరుణ్ తేజ్ - లావణ్య త్రిపాఠి సుదీర్ఘ ప్రేమాయ‌ణం గురించి తెలిసిందే. ఇటీవల ఇరువైపులా పెద్ద‌లను ఒప్పించి నిశ్చితార్థం చేసుకున్నారు.
By: Tupaki Desk | 8 Oct 2023 5:07 AM GMT
వరుణ్ తేజ్ - లావణ్య త్రిపాఠి సుదీర్ఘ ప్రేమాయ‌ణం గురించి తెలిసిందే. ఇటీవల ఇరువైపులా పెద్ద‌లను ఒప్పించి నిశ్చితార్థం చేసుకున్నారు. నవంబర్ మొదటి వారంలో ఈ జంట వివాహం జరగనుంది. నాలుగు రోజుల పాటు వివాహ వేడుకలు జరగనున్నాయి. తాజా స‌మాచారం మేర‌కు పెళ్లి వెన్యూని ఫైన‌ల్ చేసార‌ని తెలిసింది. ఇది డెస్టినేషన్ వెడ్డింగ్ కానుంది. అయితే పెళ్లి తేదీపై అధికారికంగా స్ప‌ష్ఠ‌త రావాల్సి ఉంది.
ఇటలీ-టస్కానీలోని ఓ లగ్జరీ రిసార్ట్‌లో వరుణ్- లావణ్య జంట పెళ్లి జరగనుంది. ఆ ఇద్ద‌రూ ఎప్పటి నుంచో యూరప్ లో పెళ్లి చేసుకోవాలని క‌ల‌లు గంటున్నారు. దీనికి మునుపు చాలా ప్రదేశాలను సందర్శించిన తర్వాత టుస్కానీ రిసార్ట్ ను వెన్యూగా పిక్స‌య్యార‌ని తెలిసింది. చాలా మంది హాలీవుడ్ సెలబ్రిటీలు ఇక్కడ పెళ్లి చేసుకున్నారు. భారీ ఈవెంట్ కి స‌క‌ల సౌక‌ర్యాలు, అధునాత‌న వ‌స‌తులు ఇక్కడ అందుబాటులో ఉన్నాయి. వరుణ్ తేజ్ -లావణ్య 2016 నుండి ప్రేమలో ఉన్నారు. మెగాస్టార్ చిరంజీవి ఇటీవల యువ ప్రేమికుల కోసం ప్రీ వెడ్డింగ్ పార్టీని నిర్వహించ‌గా ఆ ఫోటోలు అంత‌ర్జాలంలో వైరల్ అయ్యాయి.
పెళ్లి వేడుకలు ఘ‌నంగా..
కొణిదెల ఫ్యామిలీలో పెళ్లి సంబ‌రాలు ఇప్ప‌టికే మొదలయ్యాయి. వరుణ్- లావణ్య ప్రీ వెడ్డింగ్ వేడుకలతో మెగా ఇంట వాతావ‌ర‌ణం క‌న్నుల పండుగ‌గా మారింది. హైదరాబాద్‌లోని చిరంజీవి నివాసంలో శుక్రవారం రాత్రి జరిగిన తొలి ఈవెంట్‌కి సంబంధించిన ఫోటోలు ఇప్ప‌టికే ఇంటర్నెట్‌లో వైరల్ అవుతున్నాయి. చిరంజీవి స్వ‌యంగా ఈ ఫోటోల‌ను సోష‌ల్ మీడియాల్లో షేర్ చేసారు. వరుణ్ తేజ్ కూడా తన అధికారిక ఇన్‌స్టాగ్రామ్ ఖాతాలో ప్రీ-వెడ్డింగ్ వేడుకల నుండి ఫోటోల‌ను షేర్ చేయ‌గా వైరల్ అయ్యాయి. మెగా అల్లు కుటుంబాలు ఈ వేడుకలో పాల్గొన్నాయి.
వరుణ్ తేజ్ -లావణ్య జూన్‌లో ఒక సన్నిహిత వేడుకలో నిశ్చితార్థం చేసుకున్నారు. వీళ్లిద్దరూ పెళ్లి పీటలెక్కడం కోసం అభిమానులు ఆసక్తిగా ఎదురుచూస్తున్నారు. ఎట్ట‌కేల‌కు వెన్యూ గురించి వివ‌రాలు బ‌హిర్గ‌తం అయ్యాయి. అయితే మెగా కుటుంబం అధికారికంగా దీని గురించి వెల్ల‌డించాల్సి ఉంది. ఇటలీ ట‌స్క‌నీలో జ‌ర‌గ‌నున్న పెళ్లి వేడుక‌కు మెగాస్టార్ చిరంజీవి- రామ్ చ‌ర‌ణ్‌- అల్లు అర్జున్ - సాయిధ‌ర‌మ్ తేజ్ స‌హా ప‌లువురు మెగా హీరోలు అటెండ‌వుతార‌ని టాక్ వినిపిస్తోంది.
