కంగువా బాక్సాఫీస్.. టాలీవుడ్ లో సెంచరీ సాధ్యమేనా?

కోలీవుడ్ స్టార్ హీరో సూర్యకి 'గజినీ' మూవీ తర్వాత తెలుగులో విపరీతమైన క్రేజ్ పెరిగింది. అప్పటి నుంచి ఆయన నటించిన ప్రతి తమిళ్ మూవీ తెలుగులో డబ్బింగ్ అయ్యి విడుదల అవుతుంది. వీటిలో కొన్ని సినిమాలు తెలుగునాట మంచి ప్రేక్షకాదరణ సొంతం చేసుకున్నాయి. ముఖ్యంగా సూర్య పోలీస్ ఆఫీసర్ గా చేసిన 'సింగం' సిరీస్ తెలుగులో సక్సెస్ ఫుల్ ఫ్రాంచైజ్ లలో ఒకటిగా నిలిచింది. అలాగే 'జై భీమ్', 'ఆకాశం నీ హద్దురా' సినిమాలు డైరెక్ట్ ఓటీటీలో రిలీజ్ అయ్యాయి. వీటికి తెలుగులో మంచి ప్రేక్షకాదరణ లభించింది.

ఈ కారణంగా సూర్యకి తమిళ్ తో సమైనమైన క్రేజ్ తెలుగు ఇండస్ట్రీలో ఉంది. అయితే గత కొన్నేళ్లుగా ఆయన నుంచి వచ్చి థియేటర్స్ లో రిలీజ్ అయిన సినిమాలు ఆశించిన మేరకు సక్సెస్ కాలేదు. దీంతో కొంత మార్కెట్ డౌన్ అయ్యింది. అయితే 'కంగువా' సినిమాతో తెలుగులో సూర్య క్రేజ్ మరల పెరుగుతుందని సినీ విశ్లేషకులు అంచనా వేస్తున్నారు. పాన్ వరల్డ్ మూవీగా శివ దర్శకత్వంలో తెరకెక్కిన ఈ యాక్షన్ ఫిల్మ్ పై దేశ వ్యాప్తంగా మంచి హైప్ ఉంది.

కచ్చితంగా కోలీవుడ్ ఇండస్ట్రీకి 'కంగువా' తో 1000 కోట్లు కలెక్షన్స్ వస్తాయని అక్కడి సినీ అభిమానులు బలంగా నమ్ముతున్నారు. సినిమాపై బిజినెస్ కూడా భారీగానే జరిగింది. డిఫరెంట్ సినిమాటిక్ వరల్డ్ లో ఈ చిత్ర కథని దర్శకుడు శివ చెబుతున్నాడు. ఇప్పటికే ప్రేక్షకుల ముందుకొచ్చిన టీజర్ కి పాజిటివ్ రెస్పాన్స్ వచ్చింది. హై ఎక్స్ పెక్టేషన్స్ మధ్య నవంబర్ 14న రిలీజ్ కాబోయే ఈ సినిమా భారీ ఎత్తున రిలీజ్ అవుతోంది.

ఈ సినిమాకి తెలుగులో 100 కోట్ల కలెక్షన్స్ వచ్చే అవకాశాలు ఉన్నాయనే మాట వినిపిస్తోంది. కేజీఎఫ్ చాప్టర్ 2 డబ్బింగ్ సినిమాగా రిలీజ్ అయ్యి టాలీవుడ్ లో 136.85 కోట్ల కలెక్షన్స్ తో టాప్ ప్లేస్ లో ఉంది. రజినీకాంత్ జైలర్ మూవీ తెలుగులో 60 కోట్ల కలెక్షన్స్ సెకండ్ హైయెస్ట్ కలెక్షన్స్ అందుకున్న డబ్బింగ్ చిత్రంగా నిలిచింది. అయితే 'కంగువా' సినిమాకి ఉన్న క్రేజ్ చూస్తే తెలుగులో జైలర్ మూవీ కలెక్షన్స్ ని బ్రేక్ చేస్తుందని ట్రేడ్ పండితులు అంచనా వేస్తున్నారు.

సినిమాకి పాజిటివ్ టాక్ వస్తే లాంగ్ రన్ లో మాత్రం కచ్చితంగా 100 కోట్ల క్లబ్ లో చేరే అవకాశాలు ఉన్నాయని అంటున్నారు. మేకర్స్ కూడా 'కంగువా' సినిమాని తెలుగులో గట్టిగా ప్రమోట్ చేస్తున్నారు. హీరో సూర్య వరుస ఇంటర్వ్యూలు ఇస్తున్నారు. అలాగే ప్రీరిలీజ్ ఈవెంట్ కూడా నిర్వహించారు. యూవీ క్రియేషన్స్ కంగువా మూవీ నిర్మాణ భాగస్వామిగా ఉండటంతో తెలుగులో ఈ సినిమాని వీలైనంత స్ట్రాంగ్ గా జనాలకి చేరువ చేసే ప్రయత్నం చేస్తున్నారు. ఇవన్నీ వర్క్ అవుట్ అయితే 'కంగువా' భారీ కలెక్షన్స్ కొల్లగొట్టడం గ్యారెంటీ అనుకుంటున్నారు.