'విశ్వం'లోనైనా హిట్ కొట్టేనా..!

2018లో 'ఈ మాయ పేరేమిటో' సినిమాతో తెలుగు ప్రేక్షకులకు పరిచయం అయిన ముద్దుగుమ్మ కావ్య థాపర్‌. మొదటి సినిమా నిరాశ పరిచిన వెంటనే తమిళ్ మూవీలో నటించే అవకాశం దక్కింది. తెలుగు లో మరో అవకాశంగా 'ఏక్‌ మినీ కథ' లో నటించే అవకాశం దక్కింది. ఆ సినిమా పర్వాలేదు అనిపించుకోవడంతో టాలీవుడ్ లో వరుసగా ఆఫర్లు వచ్చాయి. హిందీ, తమిళ్ సినిమాల్లో నటించినా కూడా ఈమెకు ఎక్కువ ఆఫర్లు వచ్చింది మాత్రం టాలీవుడ్‌ లోనే అనే విషయంలో సందేహం లేదు. 2024 లో ఇప్పటి వరకు మూడు సినిమాలతో వచ్చిన కావ్య నాల్గవ సినిమాతో రెడీ అవుతోంది.

ఏక్‌ మినీ కథ తర్వాత కాస్త గ్యాప్‌ తీసుకుని హిందీ, తమిళ భాషల్లో సినిమాలు చేసిన కావ్య థాపర్ కి అక్కడ కూడా పెద్దగా కలిసి రాలేదు. దాంతో మళ్లీ టాలీవుడ్‌ లోనే ఈ అమ్మడు సినిమాలు చేసింది. రవితేజకు జోడీగా ఈగల్ సినిమాలో నటించడం ద్వారా టాలీవుడ్‌ లో స్టార్‌ హీరోయిన్‌ గా పేరు దక్కే అవకాశాలు ఉన్నాయని అంతా భావించారు. కానీ ఆ సినిమా నిరాశ పరచడం తో కావ్య థాపర్ కి మరో సినిమా కోసం వెయిట్‌ చేయాల్సి వచ్చింది. ఆ మధ్య ఊరు పేరు భైరవకోన సినిమాతో వచ్చిన కావ్య కు నిరాశే మిగిలింది. ఆ సినిమా హిట్ అయ్యి ఉంటే టాలీవుడ్ లో బిజీ స్టార్‌ హీరోయిన్ గా మారేది.

ఒకే ఏడాదిలో ఈగల్‌, ఊరు పేరు భైరవకోన సినిమాలతో ఫ్లాప్స్ చవి చూసిన కావ్య థాపర్ కి బంపర్‌ ఆఫర్‌ అన్నట్లుగా పూరి జగన్నాధ్ దర్శకత్వంలో రామ్‌ హీరోగా నటించిన డబుల్‌ ఇస్మార్ట్‌ సినిమాలో నటించే అవకాశం దక్కింది. ఆ సినిమా మంచి విజయాన్ని సొంతం చేసుకుంటే టాలీవుడ్‌ లో సెటిల్‌ అవుదామనుకున్న కావ్య కి మరోసారి నిరాశే మిగిలింది. డిజాస్టర్ గా నిలిచిన డబుల్‌ ఇస్మార్ట్‌ వల్ల కావ్య థాపర్ కి మినిమం గుర్తింపు కూడా రాలేదు. అసలు ఎందుకు ఈ పాత్రను కావ్య చేసిందో అన్నట్లుగా ఆమె సన్నిహితులు అసహనం వ్యక్తం చేశారు.

ప్రస్తుతం ఈ బ్యూటీ చేతిలో విశ్వం సినిమా మాత్రమే ఉంది. గోపీచంద్‌ హీరోగా రూపొందుతున్న ఈ సినిమాకు శ్రీను వైట్ల దర్శకత్వం వహిస్తున్నాడు. వచ్చే నెలలో ఈ సినిమా విడుదల అవ్వబోతుంది. హీరో గోపీచంద్‌ సాలిడ్‌ హిట్‌ కొట్టి చాలా కాలం అయ్యింది. ఇక దర్శకుడు శ్రీను వైట్ల గురించి ప్రత్యేకంగా చెప్పనక్కర్లేదు. ఆయన వరుసగా డిజాస్టర్స్ తో హ్యాట్రిక్‌ కొట్టాడు. దాంతో ఈ సినిమా వారిద్దరికి ఎంతో కీలకం. వారితో పాటు విశ్వం సినిమా ఇప్పుడు కావ్య థాపర్ కి కూడా కీలకంగా మారింది. ఈ సినిమా హిట్ అయితేనే కావ్య కి టాలీవుడ్‌ లో మళ్లీ ఆఫర్‌ దక్కే అవకాశాలు ఉన్నాయని సినీ విశ్లేషకులు అభిప్రాయం వ్యక్తం చేస్తున్నారు.