ఆ హీరోలు ఈసారి హిట్టు కొట్టకపోతే కష్టమేనా?

టాలీవుడ్ లో చాలా కాలంగా సరైన సక్సెస్ కోసం ఎదురుచూస్తున్న హీరోలు చాలా మందే ఉన్నారు. వరుస ప్లాపులతో ఢీలా పడిపోయిన హీరోలు కొందరు.. ఎలాగైనా ఒక్క హిట్టు కొట్టి, మళ్లీ సక్సెస్ ట్రాక్ ఎక్కాలని చూస్తున్నారు. అలాంటి వారిలో సందీప్ కిషన్, గోపీచంద్ కూడా ఉన్నారు. ఎన్నాళ్ళ నుంచో సాలిడ్ కంబ్యాక్ ఇవ్వాలని కష్టపడుతున్న ఈ ఇద్దరు.. ఇప్పుడు నెల రోజుల గ్యాప్ లో తమ అదృష్టాన్ని పరీక్షించుకోడానికి బాక్సాఫీస్ బరిలో దిగుతున్నారు.

'ప్రస్థానం' సినిమాతో సినీ ప్రస్థానం మొదలు పెట్టిన సందీప్ కిషన్.. 'వెంకటాద్రి ఎక్సప్రెస్' 'బీరువా' 'టైగర్' 'నిను వీడని నీడను నేను' వంటి చిత్రాలతో ఆడియెన్స్ ను అలరించారు. అయితే ఇటీవల కాలంలో యువ హీరో నటించిన సినిమాలేవీ పెద్దగా ఆడటం లేదు. ఎంతగా కష్టపడినా ఆశించిన విజయం మాత్రం అందడం లేదు. 'తెనాలి రామకృష్ణ బీఏబీఎల్' నుంచి 'మైఖేల్' వరకూ.. నాలుగు సినిమాలు నిరాశ పరిచాయి. ఈ నేపథ్యంలో ''ఊరి పేరు భైరవకోన'' సినిమాతో ప్రేక్షకుల ముందుకు రావడానికి రెడీ అయ్యారు.

వీఐ ఆనంద్ దర్శకత్వంలో సందీప్ కిషన్ హీరోగా నటించిన చిత్రం 'ఊరి పేరు భైరవకోన'. ఇది విభిన్నమైన కథాంశంతో తెరకెక్కిన సూపర్ నేచురల్ ఫాంటసీ సస్పెన్స్ థ్రిల్లర్. ఇందులో వర్ష బొల్లమ్మ, కావ్యా థాపర్ హీరోయిన్లుగా నటించారు. అనిల్ సుంకర సమర్పణలో రాజేశ్ దండా ఈ చిత్రాన్ని నిర్మించారు. ఇప్పటికే రిలీజైన ప్రమోషనల్ కంటెంట్ సినిమాపై ఆసక్తిని కలిగించింది. సినిమా కూడా చాలా బాగా వచ్చిందని ఇన్సైడ్ టాక్.

'ఊరి పేరు భైరవకోన' మూవీ ఫిబ్రవరి 16న ప్రపంచ వ్యాప్తంగా విడుదల కాబోతోంది. అంతకంటే ముందుగా వాలెంటైన్స్ డే స్పెషల్ గా ఫిబ్రవరి 14న పెయిడ్ ప్రీమియర్స్ వేస్తున్నారు. బుకింగ్స్ ఓపెన్ చేసిన అన్ని థియేటర్లు ఆల్మోస్ట్ హౌస్ ఫుల్ అయ్యాయి. టాక్ ఏ మాత్రం బాగున్నా ఈసారి సందీప్ కిషన్ సూపర్ హిట్ కొట్టడం ఖాయంగా కనిపిస్తోంది. రెండేళ్ల తమ కష్టానికి ఫలితం దక్కుతుందని సందీప్ భావిస్తున్నారు. ఈ మూవీ సక్సెస్ అవుతుందని చాలా కాన్ఫిడెన్ట్‌గా ఉన్నట్లు చెబుతున్నాడు.

మరోవైపు మ్యాచో స్టార్ గోపీచంద్ కూడా ఈసారి ఎలాగైనా హిట్టు కొట్టాలనే కసి మీద ఉన్నారు. మాస్ యాక్షన్ సినిమాలతో తనకంటూ ప్రత్యేకమైన గుర్తింపు తెచ్చుకున్న గోపీ.. 'ఆంధ్రుడు' 'గోలీమార్' 'లక్ష్యం' 'రణం' 'లౌక్యం' వంటి సూపర్ హిట్లు అందుకున్నారు. అయితే కొన్నేళ్లుగా గోపీ ఆశించిన సక్సెస్ సాధించలేకపోతున్నారు. మధ్యలో 'సీటీమార్' సినిమా కాస్త పర్వాలేదనిపించినా.. 'పక్కా కమర్షియల్' 'రామబాణం' చిత్రాలు ఫ్లాప్ అయ్యాయి. ఈ నేపథ్యంలో ''భీమా'' గా అలరించడానికి సిద్దమవుతున్నారు.

గోపీచంద్ హీరోగా కన్నడ దర్శకుడు హర్ష తెరకెక్కిస్తున్న యాక్షన్ ఎంటర్‌టైనర్ 'భీమా'. కేకే రాధామోహన్‌ నిర్మిస్తున్న ఈ సినిమాలో ప్రియా భవానీ శంకర్‌, మాళవిక శర్మ హీరోయిన్లుగా నటిస్తున్నారు. గోపీచంద్ చాలా గ్యాప్ తర్వాత పోలీస్ గా కనిపించనున్నారు. తనకు కలిసొచ్చిన ఖాకీ డ్రెస్ బ్లాక్ బస్టర్ అందిస్తుందని ధీమాగా ఉన్నారు. ఇప్పటికే వచ్చిన ఫస్ట్ లుక్, రీసెంట్ గా రిలీజైన ఫస్ట్ సాంగ్ కు మంచి రెస్పాన్స్ వచ్చింది. ఈ సినిమా శివరాత్రి సందర్భంగా మార్చి 8న విడుదల కాబోతోంది.

ఇలా సందీప్ కిషన్, గోపీచంద్ ఇద్దరూ తన కొత్త సినిమాలతో కంబ్యాక్ ఇవ్వాలని ఫిక్స్ అయ్యారు.. వీటి కోసం చాలా కష్టపడ్డారు. ఇవి హిట్టయితే మళ్లీ ట్రాక్ లోకి వస్తారు. ఒకవేళ ఫలితం కాస్త అటు ఇటు అయితే మాత్రం వీరిద్దరికీ ఇబ్బందులు ఎదురయ్యే అవకాశముంది. మరి బాక్సాఫీస్ వద్ద ఏం జరుగుతుందో చూడాలి.