నానీతో ఈసారి గట్టిగానే ప్లాన్ చేసినట్లున్నారుగా!

నేచురల్ స్టార్ నాని హీరోగా నటిస్తున్న లేటెస్ట్ మూవీ ''సరిపోదా శనివారం''. వివేక్ ఆత్రేయ దర్శకత్వంలో తెరకెక్కుతున్న ఈ చిత్రాన్ని డీవీవీ దానయ్య నిర్మిస్తున్నారు. ఇప్పటికే విడుదలైన ప్రచార చిత్రాలు, గ్లింప్స్, సాంగ్స్ ఆసక్తిని కలిగించాయి. ఈ మధ్య టీజర్ కాదు అంటూ వచ్చిన స్పెషల్ వీడియో ద్వారా సినిమా కథేంటనేది హింట్ ఇచ్చారు. ఇప్పటి వరకూ హీరోయిన్ ప్రియాంక మోహన్, విలన్ ఎస్‌జె సూర్య పాత్రలను మాత్రమే మేకర్స్ పరిచయం చేసిన మేకర్స్.. శనివారం సినిమాలో మిగతా ప్రధాన పాత్రధారులందరి క్యారక్టర్ పోస్టర్లు ఆవిష్కరించారు.

'సరిపోదా శనివారం' టైటిల్ గ్లింప్స్ లో శనివారం మాత్రమే శత్రువుల మీద తిరగబడే సూర్య పాత్రలో నానీని ప్రెజెంట్ చేసారు. టీజర్ లో నాని, ఎస్‌జె సూర్యలను పవర్ ఫుల్ గా చూపించారు. పురాణాల్లో మాదిరిగా శ్రీకృషుడు సత్యభామతో కలిసి నరకాసుర వధ కోసం బయలు దేరినట్లుగా చెప్పారు. ప్రజలను హింసించే క్రూరమైన పోలీసాఫీసర్ గా ఎస్.జె సూర్య, అతన్ని ఎదిరించే సాధారణ యువకుడు సూర్యగా నాని ఆకట్టుకున్నారు. అయితే సూర్య అన్ని అసమానతలకు వ్యతిరేకంగా నిలబడితే.. సోకులపాలెంలో అతని ఆశయాలకు వ్యతిరేకంగా నిలబడే కొందరు వ్యక్తులను, మద్దతుగా నిలిచే మరికొందరిని ఇప్పుడు పరిచయం చేసారు.

'సరిపోదా శనివారం' చిత్రంలో తమిళ నటి అదితి బాలన్ కీలక పాత్ర పోషిస్తోంది. అభిరామి, సాయి కుమార్, శుభలేఖ సుధాకర్, హర్ష వర్ధన్ ఇతర పాత్రల్లో నటించారు. అజయ్ ఘోష్, మురళీ శర్మ, అజయ్, సుప్రీత్ తదితరులు నెగెటివ్ రోల్స్ లో కనిపిస్తున్నారు. ప్రపంచం వారితో నిండి ఉన్నప్పుడు.. సూర్య అంటూ నాని తన పోస్టర్ ను షేర్ చేసారు. బ్రహ్మగా సరికొత్తగా సృష్టించిన లోకం చూడరా అని మేకర్స్ పేర్కొన్నారు. 'మార్ డాలా' అని రాసి ఉన్న ఈ పోస్టర్‌లో నాని ఇంటెన్స్ గా చూస్తున్నారు. ఇవన్నీ చూస్తుంటే వివేక్ ఏదో గట్టిగానే ప్లాన్ చేస్తున్నట్లు తెలుస్తోంది.

డైరెక్టర్ వివేక్ ఆత్రేయ అనగానే 'మెంటల్ మదిలో', 'బ్రోచేవారెవరురా', 'అంటే సుందరానికి' లాంటి క్లాస్ సినిమాలు గుర్తుకు వస్తాయి. కానీ ఈసారి మాత్రం దర్శకుడు తన పంధా మార్చి మాస్ యాక్షన్ చిత్రాన్ని తెరకెక్కిస్తున్నారు.. నానీని పవర్ ఫుల్ రోల్ చూపిస్తున్నారు. అది కూడా ఒక డిఫెరెంట్ కాన్సెప్ట్ తో రాబోతున్నట్లు ప్రమోషనల్ కంటెంట్ చూస్తే అర్థమవుతోంది. ఇప్పటి వరకూ శనివారం వచ్చే ప్రతీ అప్‌డేట్‌ ఫ్యాన్స్ ను ఉత్సాహ పరిచేలా ఉంది. మరి ఈ సినిమా బాక్సాఫీస్ వద్ద ఎలాంటి విజయాన్ని సాధిస్తుందో చూడాలి.

డివివి ఎంటర్‌టైన్‌మెంట్స్ బ్యానర్ పై రూపొందుతున్న 'సరిపోదా శనివారం' చిత్రానికి జేక్స్ బిజోయ్ సంగీతం సమకూరుస్తున్నారు. మురళి.జి సినిమాటోగ్రఫీ నిర్వహించగా.. కార్తీక శ్రీనివాస్ ఎడిటింగ్ చేస్తున్నారు. రామ్-లక్ష్మణ్ మాస్టర్స్ యాక్షన్ కొరియోగ్రఫీ చేసారు. భారీ బడ్జెట్ తో తెరకెక్కుతున్న ఈ యాక్షన్ థ్రిల్లర్ ను ఆగస్ట్ 29న తెలుగు, తమిళం, కన్నడ, మలయాళం, హిందీ భాషల్లో గ్రాండ్ గా రిలీజ్ చేయడానికి మేకర్స్ సన్నాహాలు చేస్తున్నారు.