సరిపోదా శనివారంకు సరిపోని షోలు.. నాని మార్కెట్ మామూలుగా లేదుగా..

పక్కింటి కుర్రాడిలా ఎంతో ఈజీగా యాక్షన్ చేస్తూ నాచురల్ స్టార్‌గా గుర్తింపు తెచ్చుకున్నాడు నాని. రొటీన్‌కి భిన్నంగా ఉన్న కథలను ఎంచుకుంటూ.. మెల్లిగా తన మార్కెట్ను పెంచుకుంటూ.. మిడ్ రేంజ్ స్టార్ నుంచి ఓ స్టార్ హీరోగా ఎదుగుతున్నాడు. దసరా వంటి ఊర మాస్ చిత్రం తర్వాత హాయ్ నాన్న లాంటి పక్కా క్లాస్ మూవీ‌తో ప్రేక్షకుల మనసులు దోచుకున్న నాని తనలోని నటుడు ఎంత స్ట్రాంగ్ అన్న విషయాన్ని బాగా ప్రూవ్ చేసుకున్నాడు సౌత్ లోనే కాక నానికి మెల్లిగా నార్త్‌లో కూడా గుర్తింపు వస్తోంది.

ఈసారి కూడా ఓ వైవిధ్యమైన కథాంశంతో సరిపోదా శనివారం అంటూ థియేటర్లలో సందడి చేయడానికి సిద్ధమవుతున్నాడు. ఈ మూవీతో మాస్ ప్రేక్షకులనే కాక క్లాస్ ఆడియన్స్‌ని కూడా అలరించబోతున్నాడు. మూవీ రిలీజ్ దగ్గర పడడంతో చిత్ర బృందం ప్రమోషన్స్‌పై జోరు పెంచింది. దీంతో మూవీ‌పై ప్రేక్షకులలో మంచి పాజిటివ్ రెస్పాన్స్ కనిపిస్తోంది. ప్రస్తుతం ప్రేక్షకులలో ఉన్న డిమాండ్ దృశ్య.. మూవీ సక్సెస్ అవ్వడం ఖాయం అన్న ధీమా చిత్ర బృందంలో బాగా కనిపిస్తోంది.

దీంతో ఇరు తెలుగు రాష్ట్రాలలో మూవీకి షోలు కూడా పెంచాలి అని భావిస్తున్నారు. ప్రస్తుతం ఉన్న షో టైమింగ్స్‌కి అడిషనల్.గా పొద్దుపొద్దున్నే షోలు వేయడానికి సన్నాహాలు జరుగుతున్నాయి. నిజానికి ఎర్లీ మార్నింగ్ షోస్ మనకు కొత్త ఏమీ కాదు. స్టార్ హీరోల సినిమాలు వచ్చిన ప్రతిసారి ఉదయం ఆరు గంటల నుంచి థియేటర్లలో సందడి మొదలవుతుంది. అయితే ఓ మిడ్ రేంజ్ హీరో సినిమాకి ఈ రేంజ్ హడావిడి రావడం సినీ వర్గాలలో పెద్ద సంచలనంగా మారింది.

చిన్న సినిమాలకు, మిడ్ హీరోల సినిమాలకు ఐదు షోలు పడడం దాదాపు ఇప్పటివరకు జరగలేదనే చెప్పాలి. అలాంటిది నాని సరిపోదా శనివారం చిత్రానికి మాత్రం ఐదు షోలు పడుతున్నాయి అంటే ప్రస్తుతం అతని మూవీపై ఉన్న హైట్ ఎలాంటిదో ఆలోచించండి. దీపం ఉన్నప్పుడే ఇల్లు చక్కబెట్టుకోవాలి అన్నట్లు.. బజ్ ఉన్నప్పుడే సినిమా వసూలు రాబట్టాలి అని భావిస్తున్నారు థియేటర్ యజమానులు.

అందుకే ఉన్న అవకాశాన్ని ఉపయోగించుకొని నాని సినిమాకు ఏకంగా ఐదు షోలకు అనుమతులు తెచ్చుకోవడానికి డిస్ట్రిబ్యూటర్లు డిసైడ్ అయ్యారట. ఈ చిత్రానికి సంబంధించిన బుకింగ్ సోమవారం నుంచి ప్రారంభమవుతుంది కాబట్టి రేపటికల్లా ఈ అనుమతుల విషయంలో ఓ క్లారిటీ వచ్చేస్తుంది. ఆగస్టు 29న గురువారం నాడు ఈ చిత్రం లాంగ్ వీకెండ్ అడ్వాంటేజ్ తో థియేటర్లలో విడుదల కాబోతోంది. భారీ స్థాయిలో ఓపెనింగ్స్ రాబట్టి నాని కెరీర్‌లోనే బిగ్గెస్ట్ ఓపెనర్‌గా ఈ చిత్రం నిలుస్తుంది అని అందరూ భావిస్తున్నారు.