షారుఖ్ అతిధి పాత్రపై స్పందించిన యష్

KGF2 సంచ‌ల‌న‌ విజయం తర్వాత అందరి దృష్టి రాకింగ్ స్టార్ య‌ష్ న‌టిస్తున్న `టాక్సిక్` మీద ఉంది. గీత మోహన్ దాస్ తెర‌కెక్కిస్తున్న ఈ చిత్రానికి సంబంధించిన పనులను య‌ష్ త్వ‌ర‌లో ప్రారంభించనున్నారు. తాజాగా జరిగిన ఓ ఈవెంట్‌లో య‌ష్ పై మీడియా ప్ర‌తినిధులు చాలా ప్రశ్నలు సంధించారు.

ఈ ఇంట‌ర్వ్యూలో ఇది పాన్-వరల్డ్ చిత్రమని య‌ష్‌ చెప్పారు. టాక్సిక్‌లో షారూఖ్ ఖాన్ అతిధి పాత్రలో నటించడం గురించి మాట్లాడారు. య‌ష్‌ టాక్సిక్ గురించి మాట్లాడుతూ-``ఇది పాన్-ఇండియా చిత్రాన్ని మించినది.. పాన్-వరల్డ్ ఫిల్మ్`` అని చెప్పాడు. గోవాలోని భారీ డ్రగ్స్ కార్టెల్ నేపథ్యంలో ఈ సినిమా తెరకెక్కిస్తున్న‌ట్లు తెలుస్తోంది. కరీనా కపూర్ ఖాన్ ఈ సినిమాలో అతని లేడీ లవ్ అని పుకార్లు వచ్చాయి.

టాక్సిక్‌లో షారుఖ్ ఖాన్ న‌టిస్తున్నార‌ని ప్ర‌చారం అయింది. అయితే ఈ సినిమాలో ఖాన్ భాగమా అని యశ్‌ను అడిగారు. దీనికి స‌మాధానంగా ఇప్పటి వరకు ఏదీ నిర్ధారణ కాలేదని అన్నారు. కాలక్రమేణా నటీనటుల ఎంపిక గురించి అందరికీ తెలుస్తుందన్నారు. తాను ఏదైనా చెబితే తప్ప ఎలాంటి రూమర్స్ నమ్మవద్దని అభిమానులకు యష్ చెప్పాడు. ప్ర‌స్తుతం ఈ మూవీకి సంబంధించిన

ప్రీ ప్రొడక్షన్ పనులు శరవేగంగా జరుగుతున్నాయి. జై హనుమాన్‌లో లార్డ్ హనుమంతుడిగా నటిస్తున్నాడు అంటూ వ‌స్తున్న పుకార్ల‌ను యష్ తోసిపుచ్చారు. నితేష్ తివారీ రామాయణంలో య‌ష్‌ రావణుడిగా న‌టిస్తున్నాడు. ఇది అధికారికం.

రామాయణంలో యష్?

నితేష్ తివారీ రామాయణంలో రావణుడిగా నటించడానికి యష్ తన ఆమోదం తెలిపినట్లు కూడా వార్తలు వచ్చాయి. అతను పాత్రను తిరస్కరించినట్లు గత సంవత్సరం పుకార్లు వచ్చినప్పటికీ ఈ ప్రాజెక్ట్‌లో ఉన్నట్లు క్లారిటీ వ‌చ్చింది. ఈ చిత్రంలో రణబీర్ కపూర్ రాముడిగా, సాయి పల్లవి సీతగా కనిపిస్తారని ప్రచారం జరుగుతోంది. దీని గురించి చిత్ర‌ బృందం, నటీనటులు ఇంకా అధికారిక ప్రకటన చేయవలసి ఉంది.

యష్ చివరిసారిగా ప్రశాంత్ నీల్ యొక్క KGF: చాప్టర్ 2లో కనిపించాడు. అతడు రాకీ భాయ్ పాత్రలో తిరిగి నటించాడు. వచ్చే ఏడాది ఏప్రిల్‌లో విడుదల కానున్న కన్నడ చిత్రం టాక్సిక్‌లో అత‌డు కనిపించనున్నారు. తన సినిమాలన్నింటికీ క్రియేటివ్ ప్రొడ్యూసర్‌గా వ్యవహరించిన య‌ష్ టాక్సిక్‌కు సహ నిర్మాతగా కూడా మారాడు. యష్ ఈ చిత్రాన్ని కెవిఎన్ ప్రొడక్షన్స్‌తో పాటు తన బ్యానర్ మాన్‌స్టర్ మైండ్ క్రియేషన్స్‌పై విడుదల చేయనున్నారు. ఇప్పటికే ఈ సినిమాకు సంబంధించిన అనౌన్స్‌మెంట్ వీడియో విపరీతమైన ఆసక్తిని రేపుతోంది.