హీరో ఛాన్స్ తో స‌ర్ ప్రైజ్ చేసిన రాజుగారు!

ఔత్సాహికుల్ని..ప్ర‌తిభావంతుల్ని ప్రోత్స‌హించ‌డంలో దిల్ రాజు ఎప్పుడూ ముందుంటారు. కొత్త వాళ్ల‌తో సినిమాలు చేసి హిట్లు అందుకోవ‌డం ఆయ‌న ప్ర‌త్యేక‌త‌. త‌న నిర్మాణ సంస్థ ద్వారా ఎంతో మంది కొత్త కళాకారుల్ని ప‌రిచ‌యం చేసిన ఘ‌న‌త ఆయ‌న సొంతం. న‌టులుతో పాటు సాంకేతిక నిపుణుల్ని ప‌రిచ‌యం చేసి ఇండ‌స్ట్రీలో త‌న‌కంటూ ఓ యూనిక్ స్టైల్ ని క్రియేట్ చేసుకున్నారు. 'బ‌లగం' విజ‌యంతో ఆ విష‌యం మ‌రోసారి గుర్తు చేసారు. ఈ సినిమా నిర్మాత‌లు త‌న అన్న‌ద‌మ్ములు బిడ్డ‌లైనా వెనుకండి చ‌క్రం తిప్పింది అంతా రాజుగారే.

తాజాగా య‌శ్ అనే నృత్య ద‌ర్శ‌కుడిని హీరోగా ప‌రిచ‌యం చేసే బాధ్య‌త కూడా దిల్ రాజ్ అండ్ కో తీసుకున్న‌ట్లు తెలుస్తోంది. 'ఆకాశం దాటివ‌స్తావా' అనే టైటిల్ తో శ‌శి కుమార్ ద‌ర్శ‌క‌త్వంలో హ‌ర్షిత్-హ‌న్షిత బ‌లంగా త‌ర్వాత నిర్మిస్తోన్న చిత్ర‌మిది. తొలి ప్ర‌య‌త్నం భారీ విజ‌యం సాధించ‌డంతో అదే ఉత్సాహంతో రెండ‌వ సినిమా చేస్తున్నారు. అయితే ఈ సినిమాలో హీరో అనుకోకుండా న‌టుడ‌య్యాడ‌ని తెలుస్తోంది.

ప‌లు సినిమాల‌కు నృత్య ద‌ర్శ‌కుడిగా ప‌నిచేసిన య‌శ్ సుప‌రిచితుడే. సోషల్ మీడియాలో ఇత‌నికి మంచి ఫాలోయింగ్ ఉంది. కాలేజ్ ఈవెంట్లు వంటివి నిర్వ‌హిస్తుంటాడు. ఆర‌కంగా యూత్ లో మంచి క్రేజ్ ఉంది.

అయితే ఈ సినిమాలో య‌శ్ న‌టించ‌డం యాదృశ్చికంగా జ‌రిగింది. య‌శ్ ని దిల్ రాజు ఆఫీస్ కి పిలిపించారుట‌. ఆయ‌న ఏదో తమ బ్యాన‌ర్ లో కొరియోగ్రఫీ ఛాన్స్ కోసం పిలిపించి ఉంటార‌ని క్యాజువ‌ల్ గా వెళ్లారుట‌. వెళ్ల‌గానే ఈసినిమాలో నువ్వే హీరో అనే స‌రికి య‌ష్ షాక్ అయ్యాడు.

మ‌న‌సులో నేను హీరో? ఏంటి అనుకున్నాడు. ఇది క‌ల‌? నిజ‌మా? అని ఫీల‌య్యాడు. ఎదురుగా దిల్ రాజు కూర్చుని అత‌ని హ‌వ‌భావాలు చూసి న‌వ్వుకున్నారు. అంతే కొరియోగ్రాఫ‌ర్ గా ఉన్న య‌శ్ హీరో అయ్యాడు.

దిల్ రాజు బ్యాన‌ర్ లో హీరోగా ప‌రిచ‌యం అవ్వ‌డం అంటే ఆషామాషీ కాదు. టాలీవుడ్ లో అగ్ర‌గామి నిర్మాణ సంస్థ‌ల్లో అదొక‌టి. ఇది ఆయ‌న సొంత బ్యాన‌ర్ కాక‌పోయినా బ్యాకెండ్ చ‌క్రం తిప్పేదంతా ఆయ‌నే.అలాంటి బ్యాన‌ర్ లో య‌శ్ కి అవ‌కాశం అంటే? న‌క్క తోక తొక్కిన వాడే.