ఎట్టకేలకు షురూ చేసిన రాకీ భాయ్‌

కన్నడ స్టార్‌ హీరో యశ్ కేజీఎఫ్ సినిమాతో ఒక్కసారిగా పాన్ ఇండియా సూపర్ స్టార్‌ ఇమేజ్ ని సొంతం చేసుకున్న విషయం తెల్సిందే. కేజీఎఫ్ 1 భారీ విజయం సాధించిన నేపథ్యంలో కేజీఎఫ్ 2 పై అంతకు మించి అన్నట్లుగా అంచనాలు పెరిగాయి. అంచనాలకు తగ్గట్లుగా కేజీఎఫ్ 2 ను దర్శకుడు ప్రశాంత్‌ నీల్‌ అద్భుతమైన యాక్షన్ సినిమాగా రూపొందించడంతో వెయ్యి కోట్లకు పైగా వసూళ్లు నమోదు అయ్యాయి. కేజీఎఫ్ 2 తర్వాత యశ్ నుంచి వచ్చే సినిమా ఏంటా అంటూ అంతా ఆసక్తిగా ఎదురు చూస్తున్న సమయంలో టాక్సిక్ ను ప్రకటించారు.

విభిన్న చిత్రాల దర్శకురాలిగా విమర్శకుల ప్రశంసలు దక్కించుకున్న గీతూ మోహన్‌ దాస్‌ దర్శకత్వంలో యశ్ సినిమాకి ఓకే చెప్పాడు. ఒక లేడీ దర్శకురాలి దర్శకత్వంలో సినిమాకు కమిట్‌ అయ్యి యశ్‌ అందరిని సర్‌ప్రైజ్ చేశాడు. ఎంతో మంది దర్శకులు చెప్పిన కథలు విన్న తర్వాత గీతూ మోహన్ దాస్ చెప్పిన కథకు యశ్‌ ఫిదా అయ్యాడని, అందుకే ఆమె దర్శకత్వంలో నటించేందుకు సిద్ధం అయ్యాడు అని ఆయన సన్నిహితులు కన్నడ మీడియా తో పలు సందర్భాల్లో చెప్పుకొచ్చారు.

గత కొన్ని నెలలుగా వీరి కాంబో మూవీకి సంబంధించిన ప్రీ ప్రొడక్షన్ వర్క్‌ జరిగింది. చివరకు ఈ సినిమా యొక్క పూజా కార్యక్రమాలు నేడు జరిగాయి. యశ్‌ కి 08 సెంటిమెంట్‌ ఉంది. ఆ సెంటిమెంట్‌ తోనే నేడు అంటే 08-08న షూటింగ్‌ ను అధికారికంగా ప్రారంభించారు. ఏమాత్రం ఆలస్యం చేయకుండా చకచక సినిమా షూటింగ్‌ జరిపి వచ్చే ఏడాది సమ్మర్‌ లోనే సినిమాను విడుదల చేయాలని దర్శకురాలు గీతూ మోహన్ దాస్‌ భావిస్తున్నారట.

యశ్‌ అనగానే కేజీఎఫ్ స్థాయి యాక్షన్ సినిమానే ప్రేక్షకులు ఆశిస్తారు. మరి గీతూ మోహన్‌ ఎలాంటి సినిమాను రూపొందిస్తుంది అనేది అందరిలో ఆసక్తి నెలకొంది. ఆకట్టుకునే కథ మరియు కథనంతో యశ్‌ సినిమా ఉంటుందని పదే పదే చెబుతున్న మేకర్స్ కాన్సెప్ట్‌ ఏంటి... జోనర్ ఏంటి అనే విషయంలో మాత్రం స్పష్టత ఇవ్వకుండా సినిమా పై అంచనాలు పెంచుతున్నారు. మరి సినిమాకు సంబంధించిన అధికారిక ప్రకటన రావడంతో ఇప్పటికి అయినా జోనర్ విషయంలో స్పష్టత వస్తుందేమో చూడాలి.