సలార్ లో మరో తెలుగోడు.. కిక్కిచ్చే రోల్!
పాన్ ఇండియా స్టార్ ప్రభాస్‌ హీరోగా నటించిన సినిమా సలార్. ప్రముఖ దర్శకుడు ప్రశాంత్‌ నీల్‌ తెరకెక్కిస్తున్నారు.
By: Tupaki Desk | 23 July 2023 12:44 PM GMT
పాన్ ఇండియా స్టార్ ప్రభాస్‌ హీరోగా నటించిన సినిమా సలార్. ప్రముఖ దర్శకుడు ప్రశాంత్‌ నీల్‌ తెరకెక్కిస్తున్నారు. రీసెంట్ గా రిలీజైన టీజర్‌ విశేషంగా ఆకట్టుకుని సినిమాపై భారీ అంచనాలను పెంచింది. హీరోను ఎలివేట్‌ చేస్తూ ప్రముఖ నటుడు టీనూ ఆనంద్‌ చెప్పిన సింపుల్‌ ఇంగ్లిష్‌ డైలాగ్స్‌, యాక్షన్‌ విజువల్స్‌ అభిమానులకు తెగ నచ్చేశాయి.
పవర్‌ఫుల్‌ యాక్షన్‌ ఎంటర్‌టైనర్‌గా తెరకెక్కుతున్న ఈ సినిమాలో ప్రభాస్‌ సరసన శ్రుతి హాసన్‌ నటిస్తోంది. జగపతిబాబు, ఈశ్వరీరావు, శ్రియారెడ్డి, మలయాళ స్టార్ యాక్టర్ పృథ్వీరాజ్ నటిస్తున్నారు. ఇప్పటివరకు వీరి పేర్లే వినిపించాయి. అయితే తాజాగా మరో తెలుగు నటుడు ఈ చిత్రంలో నటించబోతున్నారని తెలిసింది. ఈ విషయాన్ని ఆయనే స్వయంగా చెప్పారు.
ఇంతకీ ఆయన మరెవరో కాదు... తెలుగు చిత్రసీమలో తనకంటూ ప్రత్యేక గుర్తింపు తెచ్చుకున్న నటుడు బ్రహ్మాజీ. హీరోగా, విలన్ గా, క్యారెక్టర్‌ ఆర్టిస్ట్‌గా, కమెడియన్‌గా.. ఎన్నో వైవిధ్యమైన పాత్రలు పోషించారు. స్టార్ హీరోలతో పాటు, నేటి యువ హీరోలతోనూ స్క్రీన్ ను షేర్ చేసుకున్నారు.
ప్రస్తుతం ఆయన తనయుడు సంజయ్‌రావు కథానాయకుడిగా నటించిన చిత్రం స్లమ్‌ డాగ్‌ హస్బెండ్‌ త్వరలోనే రిలీజ్ కానుంది. ఏ.ఆర్‌.శ్రీధర్‌ దర్శకత్వంలో రూపొందిన ఈ సినిమాలో ప్రణవి మానుకొండ హీరోయిన్ గా నటించింది. ఇందులో ఓ శునకం కీలకపాత్రలో మెరిసింది. ఇప్పటికే అన్నీ కార్యక్రమాలు పూర్తి చేసుకున్న ఈ సినిమా ఈ నెల 29న రిలీజ్ కానుంది.
ఈ సందర్భంగా ప్రమోషన్స్ లో పాల్గొన్న బ్రహ్మాజీ.. సలార్ లో తాను నటించబోతున్నట్లు తెలిపారు. తాను గ్రే షేడ్ రోల్ పోషించబోతున్నట్లు తెలిపారు. అంటే స్వతహాగా ఆయన పాత్ర పాజిటివ్ అయినప్పటికీ.. కాస్త మాస్ గా నెగటివ్ షేడ్స్ ఉన్నట్లు కనిపించబోతున్నారని అర్థం. ఫస్ట్ పార్ట్ క్లైమాక్స్ లో కనిపిస్తానని చెప్పారు. ఇక ఈ విషయం తెలుసుకున్న సినీ ప్రియులు ఆయనకు అభినందనలు తెలుపుతున్నారు.
