సంచ‌ల‌న స్టార్ ఇలా షాకిచ్చాడేంటి?

విజ‌య్ సేతుప‌తి ఇప్ప‌టికే తెలుగు..త‌మిళ భాష‌ల్లో బిజీ న‌టుడు. ఓవైపు హీరోగా న‌టిస్తూనే ప్ర‌తినాయ‌కు డిగానూ స‌త్తా చాటుతున్నారు. హీరో కంటే గొప్ప విల‌న్ గా ప్రేక్ష‌కుల మ‌న్న‌ల‌ను అందుకుంటున్నాడు. స్టార్ హీరోల చిత్రాల్లో కీల‌క పాత్ర‌లు సైతం పోషించి ఇమేజ్ అనే చ‌ట్రంలో ఇరుకొక్కుండా సినిమాలు చేస్తోన్న‌ ఏకైక స్టార్ అత‌ను. ప్ర‌తిభ ఉంటే పాత్ర ఎలాంటిదైనా పేరొస్తుంది అన‌డానికి సేతుప‌తి ని ఓ ఇనిస్పేర‌ష‌న్ గా చెప్పొచ్చు.

'విక్ర‌మ్' లో సంతానం పాత్ర‌తో నార్త్ లో సైతం ఫేమ‌స్ అయ్యాడు. అందుకే బాద్ షా షారుక్ ఖాన్ త‌న సినిమా జ‌వాన్ లో ఏరికోరి మ‌రీ విల‌న్ గా ఎంపిక చేసాడు. ఈ సినిమా త‌ర్వాత సేతుప‌తి రేంజ్ బాలీవుడ్ లో కూడా మారిపోతుంద‌ని అంచ‌నాలున్నాయి. న‌టుడిగా అక్క‌డా స‌త్తా చాటుతాడ‌ని విశ్లేష‌కులు అంచ‌నా వేస్తున్నారు. అయితే తాజాగా సేతుప‌తి గురించి ఓ ఇంట్రెస్టింగ్ విష‌యం వెలుగులోకి వ‌చ్చింది.

'మేరి క్రిస్మ‌స్' టైటిల్ తో తెరెక్కుతోన్న సినిమాలో విజ‌య్ సేతుప‌తి లీడ్ రోల్ పోషిస్తున్నాడు. ఆయ‌న‌తో పాటు క‌త్రినా కైఫ్ కూడా సినిమాలో న‌టిస్తోంది. అయితే ఇది ముఖ్య‌పాత్ర అని కొంద‌రంటుంటే? కాదు హీరోయిన్ అని మ‌రికొంత మంది వాదిస్తున్నారు. దీంతో క‌త్రినా పాత్ర హీరోయిన్? కాదా? అన్న‌ది స‌స్పెన్స్ గా మారింది. ఈ చిత్రాన్ని జానీ గ‌ద్ద‌ర్..బ‌ద్లాపూర్.. అంధాదున్ లాంటి వైవిథ్య‌మైన చిత్రాలు తెర‌కెక్కించిన శ్రీరామ్ రాఘ‌వ‌న్ తెరకెక్కిస్తున్నారు.

కాగా ఈ చిత్రాన్ని హిందీ..త‌మిళ్ లో క్రిస్మ‌స్ ముందుగా ప్రేక్ష‌కుల ముందుకు తీసుకురానున్నారు. వాస్త‌వానికి ఈ సినిమా గురించి ఇంత‌వ‌ర‌కూ పెద్ద‌గా మీడియాలోనూ ప్ర‌చారంలోకి రాలేదు. దీంతో ఈ సినిమా ఇప్పుడిదేనా? లేక ఎప్పుడో మొద‌లైన సినిమాకి కొత్త హంగులు జోడిస్తున్నారా? అన్న సందేహాలు తెర‌పైకి వ‌స్తున్నాయి.

సినిమాకి సంబంధించిన పోస్ట‌ర్ తోనే ఈ సందేహం బ‌ల‌ప‌డుతుంది. నెట్టింట వైర‌ల్ అవుతోన్న పోస్ట‌ర్ మ‌రీ ఓల్డ్ గా క‌నిపిస్తోంది. అందులో పాత అంబాసిడ‌ర్ కారు...బ్యాక్ గ్రౌండ్..క‌త్రినా కైఫ్ ఆహార్యం అన్ని 20 ఏళ్ల క్రితం కాలానికి తీసుకెళ్తున్నాయి. మ‌రి అస‌లు సంగ‌తేంటి? అన్న‌ది తేలాలి.