మారుతితో ప్ర‌భాస్ సినిమా.. నిర్మాత ఏమ‌న్నారంటే?

పాన్ ఇండియా స్టార్ ప్ర‌భాస్ భారీ సినిమాల్లో న‌టిస్తూ క్ష‌ణం తీరిక లేకుండా ఉన్నాడు. ఇంత బిజీలోను అక‌స్మాత్తుగా మారుతి ద‌ర్శ‌క‌త్వంలో ఓ సినిమాని ప్రారంభించి ఆశ్చ‌ర్య‌ప‌రిచాడు. అయితే మారుతితో సినిమా గురించి ఇప్ప‌టివ‌ర‌కూ స‌రైన ప్ర‌చారార్భాటం లేద‌నే చెప్పాలి. ఈ సినిమా చిత్రీక‌ర‌ణ 40శాతం పూర్త‌యినా ఇప్ప‌టివ‌ర‌కూ ఎలాంటి అధికారిక‌ అప్ డేట్ లేదు. ఇంత‌కీ ఈ మూవీ ఉన్న‌ట్టా లేన‌ట్టా? అన్న సందేహాల్ని చాలా మంది వ్య‌క్తం చేస్తున్నారు. కొంద‌రు నెటిజ‌నులు ఈ సినిమా క్యాన్సిల్ అయిందంటూ ప్ర‌చారం కూడా చేశారు.

అయితే వీట‌న్నిటికీ తాజాగా పీపుల్స్ మీడియా అధినేత విశ్వ‌ప్ర‌సాద్ చాలా సింపుల్ గా చెక్ పెట్టారు. ప్ర‌భాస్ న‌టిస్తున్న భారీ చిత్రాల‌పై అభిమానుల ఫోక‌స్ ఉంది. వారంతా స‌లార్ గురించి మాట్లాడుతున్నారు. అందువ‌ల్ల మేం సైలెంట్ గా ఉన్నాం. త్వ‌ర‌లోనే మా సినిమా గురించి అధికారికంగా ప్ర‌క‌టిస్తాం. దాంతో మేం కూడా ఎంత పెద్ద ఎటెంప్ట్ చేస్తున్నామో అంద‌రికీ అర్థ‌మ‌వుతుంది.. అంటూ టి.జి.విశ్వ‌ప్ర‌సాద్ ఊహించ‌ని స‌మాధాన‌మిచ్చారు.

నిర్మాత టిజి విశ్వ‌ప్ర‌సాద్ కాన్ఫిడెన్స్ చూస్తుంటే ప్ర‌భాస్ - మారుతి సినిమా కూడా భారీ పాన్ ఇండియా సినిమా త‌ర‌హాలో అత్యంత భారీగా విడుద‌ల‌వుతుంద‌ని అర్థ‌మ‌వుతోంది. మారుతితో డార్లింగ్ సినిమా కంటెంట్ కూడా చాలా ప్ర‌త్యేకంగా ఉంటుంద‌న్న ధీమాను ఆయ‌న క‌న‌బ‌రిచారు. అస‌లు మీరు 40శాతం షూటింగ్ పూర్తి చేశాక కూడా ఎందుక‌ని ప్ర‌చారం చేయ‌డం లేదు? అస‌లు ప్రారంభించారో లేదో కూడా అభిమానుల‌కు తెలియ‌నివ్వ‌కుండా దీనిని పూర్తి చేసేస్తున్నారు! అంటూ పీపుల్స్ మీడియా అధినేత‌ను ప్ర‌శ్నించ‌గా.. అదేంటో తొంద‌ర్లో మీకు తెలుస్తుంది.. అధికారికంగా చెబుతాం! అంటూ దాట‌వేశారు. ఏదేమైనా మారుతి- ప్ర‌భాస్ క‌ల‌యిక‌లోని సినిమాపై నిర్మాత‌లు అయితే కాన్ఫిడెంట్ గా ఉన్నార‌ని అర్థ‌మ‌వుతోంది. ఈ సినిమా ఆగిపోయింది అన్న పుకార్లు కేవ‌లం ప్ర‌చారార్భాటం లేక‌పోవ‌డం వ‌ల్ల‌నేన‌ని కూడా అర్థ‌మ‌వుతోంది. త్వ‌ర‌లోనే ఈ సినిమా ఫ‌స్ట్ లుక్ టీజ‌ర్ కూడా విడుద‌ల కానున్నాయి.