ఆ రెండు సినిమాల సీక్వెల్ కోసం చిరంజీవితో అశ్వినీ దత్.. మరి అతిలోక సుందరి ఎవరో?

మెగాస్టార్ చిరంజీవి గురించి తెలుగు సినీ ఇండస్ట్రీలో ప్రత్యేకంగా పరిచయం చేయాల్సిన అవసరం లేదు. ఎటువంటి బ్యాగ్రౌండ్ లేకుండా ఇండస్ట్రీలోకి అడుగుపెట్టి తనకంటూ ఓ ప్రత్యేకమైన గుర్తింపు తెచ్చుకొని ఎందరికో ఆదర్శంగా నిలిచాడు మెగాస్టార్. చిరంజీవి కెరీర్‌లో ఎన్నో అద్భుతమైన సినిమాలు ఉన్నాయి కానీ వాటిలో కొన్ని మాత్రం ఎవర్ గ్రీన్‌గా మిగిలిపోయాయి. అలాంటి వాటిల్లో జగదేకవీరుడు అతిలోకసుందరి, ఇంద్ర లాంటి సినిమాలు ఉన్నాయి.

ఈ రెండు చిత్రాలను వైజయంతి బ్యానర్స్ పై అశ్విని దత్త నిర్మించారు. జగదేకవీరుడు అతిలోకసుందరి ఒక క్లాసిక్ మూవీ అయితే.. ఇంద్ర ఓ మాస్ ఫ్యాక్షనిస్టు మూవీ. ఎప్పటినుంచో ఈ రెండు చిత్రాలకు సీక్వెల్ తీయాలని చిరు అభిమానులు కోరుతూనే ఉన్నారు. అయితే ఇప్పటివరకు ఈ విషయంపై స్పందించని అశ్విని దత్ తాజాగా ఈ రెండు చిత్రాల సీక్వెల్‌పై ఓ చిన్న క్లారిటీ ఇచ్చారు.

ఆగస్టు 22న చిరంజీవి 69వ పుట్టినరోజు సందర్భంగా ఇంద్ర చిత్రాన్ని రి రీలీజ్‌ చేసిన విషయం తెలిసిందే. బాక్సాఫీస్ వద్ద రికార్డు బ్రేకింగ్ కలెక్షన్స్ రాబట్టి రి‌రీలీజ్‌లోనూ తన సత్తా చాటుకుంది ఇంద్ర చిత్రం. ఈ నేపథ్యంగా చిరంజీవి ఇంద్ర మూవీ యూనిట్ కోసం తన ఇంట్లో ఒక ఆత్మీయ సమావేశాన్ని ఏర్పాటు చేశారు. ఈ సమావేశానికి ప్రొడ్యూసర్ అశ్విని దత్, దర్శకుడు బి గోపాల్ , రచయితలు పరుచూరి బ్రదర్స్, మణిశర్మ తదితరులు హాజరయ్యారు.

ఈ సమావేశం అనంతరం మీడియాతో ముచ్చటిచ్చిన అశ్విని దత్.. ఇంద్ర సినిమాతో పాటుగా జగదేకవీరుడు అతిలోకసుందరి చిత్రానికి కూడా సీక్వెల్ చేయబోతున్నట్లు ప్రకటించారు. చాలా కాలంగా ఈ రెండు చిత్రాల సీక్వెల్ కోసం అభిమానులు ఎదురుచూస్తున్నారు అని పేర్కొన్న అశ్వినిత ఈ సీక్వెల్స్ ఇండస్ట్రీలోనే క్రేజీ హిట్గా నిలుస్తాయి అని పేర్కొన్నారు. ఇక ఈ చిత్రాలకు సంబంధించిన తదుపరి వివరాలు త్వరలోనే వెల్లడిస్తామని చెప్పారు.

ఇంద్ర సినిమాలో చిరంజీవితో పాటు సోనాలి బింద్రే, ఆర్తి అగర్వాల్ నటించారు. ఇప్పుడు ఆ ఇద్దరి పాత్రలు పోషించడానికి హీరోయిన్లు సులభంగానే దొరుకుతారు. అయితే సీక్వెల్స్ వస్తాయి అన్న మాట వినిపించిన తర్వాత ఎక్కువ డిస్కషన్ శ్రీదేవి నటించిన జగదేకవీరుడు అతిలోకసుందరి చిత్రం గురించే జరుగుతోంది. ఈ ఐకానిక్ సోషల్ ఫాంటసీ డ్రామాలో చిరంజీవి పాత్రతో సమానమైన నటన కనబరిచిన ఇంద్రజ పాత్ర శ్రీదేవిది.

అయితే ఇప్పుడు ఆమె పాత్రలో ఎవరు నటిస్తారు అనే విషయం ప్రశ్నార్ధకంగా మారింది. ఆమె కూతురు జాహ్నవి కపూర్ ఒక మంచి ఆప్షన్ అని కొందరు భావిస్తుంటే.. చిరంజీవికి జాన్వికి ఉన్న ఏజ్ గ్యాప్ దృశ్య ఆమె సెట్ కాకపోవచ్చు అని మరికొందరు అభిప్రాయపడుతున్నారు. మొత్తానికి ఈ మూవీ పై బజ్ మాత్రం భారీ రేంజ్ లో నెలకొని ఉంది. ఈ నేపథ్యంలో మెగా అభిమానులు సీక్వెల్స్ కి సంబంధించిన మరిన్ని అప్డేట్స్ కోసం ఎదురు చూస్తూ ఉన్నారు.