ఫోన్ ట్యాపింగ్ కేసులో షాకింగ్ నిజాలు!

దేశ వ్యాప్తంగా సంచలనంగా మారిన ఫోన్ ట్యాపింగ్ ఉదంతంలో విస్తుపోయే షాకింగ్ నిజం తాజాగా వెలుగు చూసింది. ట్యాపింగ్ లో భాగంగా ఇప్పటికే ఇద్దరు.. ముగ్గురు హైకోర్టు జడ్జిల ఫోన్ల మీద నిఘా పెట్టిన వైనం వెలుగు చూసినప్పటికీ.. అందుకు భిన్నంగా తాజా రిపోర్టు స్పష్టం చేస్తున్న అంశం ఏమంటే.. తెలంగాణ హైకోర్టుకు చెందిన 18 మంది న్యాయమూర్తుల ఫోన్లపై నిఘా ఉంచిన షాకింగ్ నిజం వెలుగు చూసింది. ట్యాపింగ్ కేసుకు సంబంధించిన నిందితుడి కంప్యూటర్ లో ఈ విషయాల్ని గుర్తించినట్లుగా తెలుస్తోంది.

ఇందులో ఐదుగురు మహిళా న్యాయమూర్తుల సమాచారం కూడా ఉన్నట్లుగా తేలినట్లుగా చెబుతున్నారు. ఫోన్ ట్యాపింగ్ అంశంపై తెలంగాణ స్పెషల్ ఇంటెలిజెన్స్ బ్రాంచ్ మాజీ ఓఎస్డీ ప్రభాకర్ రావు నాయకత్వంలోని టీంపై కేసు నమోదై.. దీని విచారణ కొన్ని నెలలుగా సాగుతోంది. ఈ కేసులో నిందితుల నుంచి స్వాధీనం చేసుకున్న ఫోన్లు.. వారు అధికారింగా వినియోగిస్తున్న కంప్యూటర్లను విశ్లేషించటానికి ఫోరెన్సిక్ సైన్స్ ల్యాబ్ కు పంపారు. ఈ కేసులో మూడో నిందితుడిగా ఉన్న భుజంగరావు కంప్యూటర్ హార్డ్డ్ డిస్కుకు సంబంధించి పోలీసులకు ఎఫ్ఎస్ఎల్ రిపోర్టు అందింది.

ఇందులో వివిధ రాజకీయ పార్టీలకు చెందిన నియోజకవర్గ నేతలు.. ఎమ్మెల్యే అభ్యర్థులు.. పలువురు న్యాయమూర్తుల ప్రొఫైళ్లు ఉన్నాయి. ఈ మధ్యన రిటైర్ అయిన ముగ్గురు ప్రొఫైళ్లతో పాటు మొత్తం 18 మంది హైకోర్టు జడ్జిల ప్రొఫైళ్లు ఉన్నాయి. అందులో ప్రమోషన్ లో భాగంగా సుప్రీంకోర్టుకు వెళ్లిన న్యాయమూర్తి సమాచారం ఉండటం గమనార్హం.

నిఘా ఉన్న హైకోర్టు న్యాయమూర్తుల్లో తెలంగాణ హైకోర్టు నుంచి ఇతర హైకోర్టులకు బదిలీ అయిన మరో ముగ్గురు జడ్జిల వివరాలూ ఉన్నట్లుగా తేలింది. హైకోర్టు న్యాయమూర్తులకే పరిమితం కాకుండా ఏసీబీ కోర్టుల్లోని ఒక కీలక జడ్జి ప్రొఫైల్ ఉన్నట్లుగా గుర్తించారు. ఈ ప్రొఫైళ్లలో వారి ఫోటోలు.. పుట్టుపూర్వోత్తరాలు.. విద్యాభ్యాసం.. ఉద్యోగ ప్రస్థానం.. కుటుంబ సభ్యుల వివరాలుఅందులో ఉన్నట్లుగా తెలిసింది. ఎఫ్ఎస్ఎల్ రిపోర్టు పూర్తి వివరాలు బయటకు వస్తే సంచలన అంశాలు మరిన్ని వెలుగు చేసే వీలుందని చెబుతున్నారు. అదే జరిగితే.. సంచలన పరిణామాలు చోటు చేసుకోవటం ఖాయం.