మరో 'తండేల్'... ఆ 22 మంది భారత జాలర్లకు గుడ్ న్యూస్!

ప్రస్తుతం భారతదేశానికి చెందిన సుమారు 180 మంది మత్స్యకారుల శిక్షా కాలం పూర్తైనప్పటికీ.. పాకిస్థాన్ జైళ్లలోనే మగ్గుతున్నారనే విషయం తీవ్ర కలకలం రేపుతోన్న సంగతి తెలిసిందే. వారి విడుదలకు పాక్ అధికారులు పలు కారణాలతో ఆలస్యం చేస్తూ వస్తున్నారని అంటున్నారు. ఈ సమయంలో ఓ ఆసక్తికర విషయం తెరపైకి వచ్చింది!

అవును... శిక్షాకాలం పూర్తైనప్పటికీ పాకిస్థాన్ జైల్లోనే మగ్గుతున్న భారతీయ మత్స్యకారుల విషయం ఇటీవల తెరపైకి వచ్చి తీవ్ర కలకలం రేపిన సంగతి తెలిసిందే. ఈ సమయంలో... పాకిస్థాన్ జైలు నుంచి 22 మంది మత్స్యకారులు విడుదలయ్యారు. వారి శిక్షాకాలం పూర్తవ్వడంతో కరాచీలోని మాలిర్ జైలు నుంచి బయటకువచ్చారని తెలుస్తోంది.

వీరందరినీ ఈ రోజు (శనివారం - ఫిబ్రవరి 22) భారత్ కు అప్పగించే అవకాశం ఉందని జాతీయ మీడియా కథనాలు వెల్లడించాయి. ఈ క్రమంలో... భారత జాలర్ లకు ‘ఈది’ ఫౌండేషన్ సహాయ సహకారాలు అందించిందని చెబుతున్నారు. ఇందులో భాగంగా.. వారు కరాచీ నుంచి లాహోర్ కు వెళ్లడానికి రవాణా సౌకర్యాలు ఏర్పాటు చేసిందని చెబుతున్నారు.

ఈ సమయంలో ఈది సంస్థే వీరందరికీ ప్రయాణఖర్చులు, కొంత నగదుతో పాటు కొన్ని బహుమతులు అందించిందని చెబుతున్నారు. ఈ సందర్భంగా స్పందించిన ‘ఈది’ ఫౌండేషన్ ఛైర్మన్ ఫైజల్ ఈది... ఎటువంటి దురుద్దేశం లేకుండా అంతర్జాతీయ జలాల సరిహద్దులను పొరపాటున దాటినవారిపై దయతో వ్యవహరించాలని అన్నారు.

ఈ మేరకు ఇరు దేశాల ప్రభుత్వాలను ఆయన అభ్యర్థించారు. ఇక.. ఈ రోజు అన్ని ప్రక్రియలు పూర్తిచేసిన అనంతరం వాఘా సరిహద్దు ద్వారా పాకిస్థాన్ అధికారులు ఈ మత్స్యకారులను భారత్ కు అప్పగిస్తారు. అనంతరం.. వారిని భారత అధికారులు వారి వారి స్వస్థలాలకు పంపిస్తారు.

కాగా... ఈ ఏడాది జనవరి 1న ఇరుదేశాల ఖైదీల జాబితా మార్పిడి జరిగిన సంగతి తెలిసిందే. ఈ సందర్భంగా... పాకిస్థాన్ జైళ్లలో 266 మంది భారత ఖైదీలు ఉండగా.. భారత జైళ్లలో పాకిస్థాన్ ఖైదీలు 462 మంది ఉన్నట్లు చెబుతున్నారు.