భారత్ కు వస్తున్న నౌక హైజాక్.. ఇజ్రాయల్ కు లింకేంటి?

ఎర్ర సముద్రంలో భారత్ కు వస్తున్న వాణిజ్య నౌక 'గెలాక్సీ లీడర్' హైజాక్ కు గురైంది. యెమెన్ కు చెందిన హౌతీ రెబల్స్ కు చెందిన కొందరు ఇజ్రాయల్ కు చెందిన నౌకను హైజాక్ చేసినట్లుగా ఆ దేశం ప్రకటించింది. తాజా పరిణామంతో ఇజ్రాయెల్.. హమస్ మధ్య ఉద్రిక్తతలు మరింత పెరుగాయని భావిస్తున్నారు. అయితే.. ఈ నౌకలో ఇజ్రాయెల్ పౌరులు ఎవరూ లేకపోవటం గమనార్హం. కేవలం ఈ నౌక ఇజ్రాయల్ కు చెందిన సంపన్నుడిది. ఈ నౌక బ్రిటన్ కంపెనీ యాజమాన్యంలో ఉండగా.. జపాన్ కు చెందిన కంపెనీ ఒకటి నిర్వహిస్తోంది.

అయితే.. ఈ నౌకకు యజమానిగా అబ్రహాం రామి ఉంగర్ అనే వ్యాపారిదిగా చెబుతున్నారు. ఇజ్రాయెల్ లో అత్యంత సంపన్నుడైన ఆయన.. తన నౌక హైజాక్ అయిన విషయాన్ని ధ్రువీకరించారు. ఇజ్రాయెల్ ప్రభుత్వం కూడా ఈ విషయాన్ని తెలియజేస్తూ.. తమ దేశానికి చెందిన పౌరులు ఎవరూ లేరని వెల్లడించింది. అంతేకాదు.. భారత్ కు చెందిన పౌరులు కూడా ఎవరూ లేకపోవటం గమనార్హం. నౌకలో బల్గేరియా.. ఫిలిప్పీన్స్.. మెక్సికో.. ఉక్రెయిన్కు చెందిన పాతిక మంది సిబ్బందితో ఈ నౌక ఇండియాకు వస్తోంది.

తాజా పరిణామం అంతర్జాతీయ సంక్షోభానికి దారి తీసే తీవ్ర చర్యగా ఇజ్రాయెల్ అభివర్ణించింది. ఈ చర్య ఇరానియన్ తీవ్రవాద చర్యగా ఇజ్రాయల్ ప్రధాని కార్యాలయం ఖండించింది. హైజాక్ చేసిన నౌకను తమ అధీనంలో ఉంచుకున్నట్లుగా హౌతీ రెబల్స్ ప్రకటించారు. ఈ చిక్కుముడి రానున్న రోజుల్లో మరింత ఉద్రిక్తతలకు కారణమవుతుందన్న అభిప్రాయం వ్యక్తమవుతోంది. మరేం జరుగుతుందో చూడాలి.