మామకు ఈ స్టార్‌ హీరో గెలుపు కట్టబెట్టగలరా?
ఇంత బిజీలోనూ అల్లు అర్జున్ తన మామ కోసం నల్గొండ జిల్లా నాగార్జునసాగర్‌ నియోజకవర్గానికి వచ్చాడు. అల్లు అర్జున్ మామ కంచర్ల చంద్రశేఖరరెడ్డి నిర్మించిన ఫంక్షన్‌ హాల్‌ ప్రారంభోత్సవంలో పాల్గొన్నాడు.
By: Tupaki Desk | 19 Aug 2023 10:14 AM GMT
ఐకాన్‌ స్టార్‌ అల్లు అర్జున్ ప్రస్తుతం వరుస విజయాల జోరు మీదున్నాడు. అల వైకుంఠపురంలో, పుష్ప బ్లాక్‌ బస్టర్‌ విజయాలతో ఈ హీరో కూడా పాన్‌ ఇండియా స్టార్‌ అయిపోయాడు. ప్రస్తుతం పుష్ప–2 సినిమా షూటింగులో అల్లు అర్జున్ బిజీగా ఉన్నాడు.
ఇంత బిజీలోనూ అల్లు అర్జున్ తన మామ కోసం నల్గొండ జిల్లా నాగార్జునసాగర్‌ నియోజకవర్గానికి వచ్చాడు. అల్లు అర్జున్ మామ కంచర్ల చంద్రశేఖరరెడ్డి నిర్మించిన ఫంక్షన్‌ హాల్‌ ప్రారంభోత్సవంలో పాల్గొన్నాడు.
తెలంగాణలో వచ్చే అసెంబ్లీ ఎన్నికల్లో అల్లు అర్జున్ మామ కంచర్ల చంద్రశేఖరరెడ్డి పోటీ చేయడానికి సిద్ధంగా ఉన్నారు. ఆయన నాగార్జున సాగర్‌ నియోజకవర్గం నుంచి పోటీ చేయాలని భావిస్తున్నారు. ప్రస్తుతం నాగార్జున సాగర్‌ నుంచి బీఆర్‌ఎస్‌ తరఫున నోముల భరత్‌ ఎమ్మెల్యేగా ఉన్నారు. అయితే ఈసారి ఆయనకు సీటు దక్కదని ప్రచారం సాగుతోంది.
ఇప్పటికే అల్లు అర్జున్ సతీమణి స్నేహా రెడ్డి తండ్రియిన కంచర్ల చంద్రశేఖరరెడ్డి కంచర్ల ఫౌండేషన్‌ పేరుతో నాగార్జున సాగర్‌ నియోజకవర్గంలో భారీ ఎత్తున సేవా కార్యక్రమాలు నిర్వహిస్తున్నారు. ఆయనకు హైదరాబాద్‌ లో సాగర్‌ రోడ్డులో ఇంజనీరింగ్‌ కాలేజీలు కూడా ఉన్నాయి. ఇప్పుడు తాజాగా కంచర్ల కన్వెన్షన్‌ పేరుతో నాగార్జున సాగర్‌ నియోజకవర్గంలో పెద్దవూర మండలం భట్టుగూడ వద్ద ఫంక్షన్‌ హాల్‌ నిర్మించారు.
ఈ ఫంక్షన్‌ హాల్‌ ప్రారంభోత్సవానికి అల్లు అర్జున్ వచ్చారు. దీంతో ఆ ప్రాంతంలో తెలంగాణ సీఎం కేసీఆర్, ఆయన తనయుడు మంత్రి కేటీఆర్‌ భారీ కటౌట్లతోపాటు అల్లు అర్జున్, ఆయన మామ కంచర్ల చంద్రశేఖరరెడ్డి భారీ కటౌట్‌ లు ఏర్పాటు చేశారు.
ఊరికి మంచి చేయాలనే ఉద్దేశంతో ఎన్నో మంచి కార్యక్రమాలు చేస్తోన్న తన మామకు అల్లు అర్జున్ ధన్యవాదాలు చెప్పారు. అనంతరం అభిమానులను ఉద్దేశిస్తూ.. తాను వారిని ఎప్పటికీ ప్రేమిస్తూనే ఉంటానన్నార
అల్లు అర్జున్ తమ ప్రాంతానికి రావడం పట్ల అభిమానులు ఆనందం వ్యక్తం చేశారు. బైక్‌ ర్యాలీ నిర్వహించారు. గజమాలతో స్వాగతం పలికారు. దీనికి సంబంధించిన పలు వీడియోలు నెట్టింట వైరల్‌గా మారాయి.
కాగా 2014లో టీఆర్‌ఎస్‌ తరఫున ఇబ్రహీంపట్నం నుంచి పోటీ చేసిన కంచర్ల చంద్రశేఖరరెడ్డి ఓటమి పాలయ్యారు. ఆ ఎన్నికల్లో అల్లు అర్జున్ తన మామ తరఫున ప్రచారం చేయలేదు. అయితే వచ్చే ఎన్నికల్లో మాత్రం అల్లు అర్జున్ తన ప్రచారానికి వస్తారని కంచర్ల చంద్రశేఖరరెడ్డి చెబుతున్నారు. ఈసారి నాగార్జున సాగర్‌ లో ఘనవిజయం సాధిస్తానంటున్నారు.
కాగా గత ఎన్నికల్లో ఆంధ్రాలో నంద్యాల అసెంబ్లీ ఎన్నికల్లో శిల్పా రవికిశోర్‌ రెడ్డి తరఫున అల్లు అర్జున్ ప్రచారం చేశారు. శిల్పా రవి, అల్లు అర్జున్ ఇద్దరూ మంచి మిత్రులు. శిల్పా రవి వైసీపీ తరఫున ప్రచారం చేసినప్పటికీ అల్లు అర్జున్ ఆయన ప్రచారానికి రావడం విశేషం. 2019 ఎన్నికల్లో అల్లు అర్జున్ ప్రచారం కలిసి వచ్చి శిల్పా రవి విజయం సాధించారు.
ఈ నేపథ్యంలో ఈసారీ అదృష్టాన్ని పరీక్షించుకుంటున్న తన మామ కంచర్ల చంద్రశేఖరరెడ్డికి ఈ ఐకాన్‌ స్టార్‌ విజయాన్ని కట్టబెట్టగలరో, లేదో వేచిచూడాల్సిందే.
