మధ్యాహ్నం 12 గంటల వరకు ఏపీలో హైఅలెర్టు

సార్వత్రిక ఎన్నికలతో పాటు జరుగుతున్న అసెంబ్లీ ఎన్నికలు జరుగుతున్న రాష్ట్రాల్లో హైఓల్టేజ్ రాజకీయాలకు నెలవుగా మారింది ఆంధ్రప్రదేశ్. ఎన్నికల్లో గెలుపు కోసం అధికార.. విపక్షాలు ఎంతలా శ్రమించాయో ప్రత్యేకంగా చెప్పాల్సిన అవసరం లేదు. దీనికి తోడు.. ఈ ఎన్నికల్ని ఎవరికి వారు ప్రతిష్ఠాత్మకంగా తీసుకోవటం.. ప్రజల్లోనూ చీలిక స్పష్టంగా కనిపిస్తున్న పరిస్థితి. తాము మద్దతు ఇస్తున్న పార్టీ విజయం కోసం తీవ్రంగా శ్రమించారు. ఈ కారణంతోనే గతానికి భిన్నంగా పోలింగ్ తర్వాత పెద్ద ఎత్తున హింస చోటు చేసుకుంది.

ఈ నేపథ్యంలో రాజకీయ పార్టీలన్ని మరింత అలెర్టు అవుతున్నాయి. పోలింగ్ అనంతరం ఊహించని పరిణామాలు చోటు చేసుకున్న నేపథ్యంలో.. ఓట్ల లెక్కింపు సందర్భంగా అన్ని విధాలుగా సిద్ధంగా ఉండాలన్నట్లుగా వ్యవహరిస్తున్నాయి. రెగ్యులర్ గా సమీకరించే బలాలకు మించిన బలాల్ని ఏ పార్టీకి ఆ పార్టీ సిద్ధమవుతున్నాయి. ఓట్ల లెక్కింపు వేళ.. మెజార్టీ స్వల్పంగా ఉన్న వేళలో ఏమైనా జరగొచ్చని.. ఆ సందర్భంగా తమ వాదనల్ని వినిపించేందుకు వీలుగా ఏ పార్టీకి ఆ పార్టీ వ్యూహాల్ని సిద్ధం చేసుకుంటున్నాయి. దీంతో.. ఎప్పుడు ఎలాంటి పరిణామాలుచోటు చేసుకుంటాయా? అన్నది ఏపీ పోలీసులకు అంతుపట్టటం లేదు.

దీంతో.. పెద్ద ఎత్తున బలగాల్ని మొహరిస్తున్నారు. రాజకీయ వర్గాల నుంచి అందుతున్న సమాచారం ప్రకారం ఓట్ల లెక్కింపు వేళ హైటెన్షన్ నెలకొని ఉంటుందని.. ఓట్ల లెక్కింపు మొదలైన తర్వాత మధ్యాహ్నం పన్నెండు గంటల వరకు మరింత అప్రమత్తంగా ఉండాలన్న విషయాన్ని పార్టీ క్యాడర్ కు స్పష్టం చేస్తున్నట్లు తెలుస్తోంది. ఎందుకంటే.. మధ్యాహ్నం పన్నెండు గంటల వేళకు.. ఎవరు అధికారంలోకి వస్తారన్న దానిపై ఒక అంచనా రావటంతో పాటు.. ఓటర్ల ోటింగ్ సరళి ఏ రీతిలో ఉందన్న దానిపై అవగాహన వచ్చేస్తుందని.. దీంతో పరిస్థితుల్లో కాసింత మార్పు రావొచ్చని చెబుతున్నారు.

ఫలితాలు ఏకపక్షంగా ఉంటే జరిగే పరిణామాలు ఒకలా ఉంటాయని.. ఒకవేళ ఫలితాలు సైతం పోటాపోటీగా వస్తుంటే మాత్రం పరిస్థితులు ఇబ్బందికరంగా మారతాయన్న అభిప్రాయం వ్యక్తమవుతోంది. ఉదయం ఓట్ల లెక్కింపు మొదలైనంతనే.. పోస్టల్ ఓట్ల లెక్కింపులోనే పలు పంచాయితీలు తెర మీదకు వస్తాయని.. ఆ ఇష్యూస్ ఒక కొలిక్కి వచ్చిన తర్వాత.. ఫలితం ఓపక్కకు వొంగిపోతే ఫర్లేదు కానీ.. అందుకు భిన్నంగా ఒక రౌండ్ లో ఒకరికి అధిక్యత.. మరో రౌండ్ లో వారి ప్రత్యర్థులకు అధిక్యత వస్తే మాత్రం అక్కడి వాతావరణం మరింత టెన్షన్ గా మారుతుందని చెప్పాలి.

అంతేకాదు.. ఓట్ల లెక్కింపులో ఇరువురు అభ్యర్థుల మధ్య అధిక్యత స్వల్పంగా ఉంటే మాత్రం పరిస్థితి మరింత ఇబ్బందికరంగా మారటం ఖాయమంటున్నారు. అలాంటి చోట్ల మెరుపువేగంతో అదనపు బలగాలతో మొహరించటంతో పాటు.. ఓట్ల లెక్కింపు చోటు సైతం అధికారులు మరింత అప్రమత్తంగా ఉండాల్సిన అవసరం ఉంది. ఏమైనా.. ఓట్ల లెక్కింపు మొదలైన తర్వాత మధ్యాహ్నం పన్నెండు గంటల వరకు మాత్రం అన్ని రాజకీయ పార్టీలకు అత్యంత క్లిష్ట సమయంగా చెప్పక తప్పదు.