బీఆర్ఎస్ టార్గెట్టంతా కులాలేనా ?

తెలంగాణాలో ఎన్నికల తేది దగ్గరపడేకొద్దీ అధికార బీఆర్ఎస్ కులసంఘాలపైన ఎక్కువగా దృష్టిపెట్టినట్లు అర్ధమవుతోంది. ప్రతి నియోజకవర్గంలోను అభ్యర్ధులు, ఇన్చార్జిలు, సీనియర్ నేతలు ఎక్కువగా వివిధ సామాజికవర్గాల్లోని నేతలను బుజ్జగించటంపైనే ఎక్కువ సమయాన్ని కేటాయిస్తున్నారు. అభ్యర్ధులు, నేతలు ప్రచారానికి వెళ్ళినపుడు చాలా చోట్ల జనాలు ఎదురుతిరుగుతున్నారు. సంక్షేమపథకాలు అర్హులకు అందలేదని కొన్ని గ్రామాల్లోను, అభివృద్ధి జరగలేదని మరికొన్ని గ్రామాల్లోను జనాలు నిలదీస్తున్నారు. భూకబ్జాలు పెరిగిపోయాయని, అవినీతి ఆకాశానికి చేరుకుందని కూడా జనాలు నిలదీస్తున్నారు.

జనాలు నిలదీస్తుండటంతో అభ్యర్ధులు, నేతల్లో టెన్షన్ పెరిగిపోతోంది. అందుకనే ఒకవైపు నిలదీతలను ఎదుర్కొంటునే మరోవైపు చాపకింద నీరులాగ కులసంఘాల పెద్దలతో మీటింగులు పెట్టుకుంటున్నారు. ఆత్మీయ సమావేశాల పేరుతో కులసంఘాల సమావేశాలు నిర్వహిస్తున్నారు. బీసీలు, ఎస్సీ, ఎస్టీల్లోని వర్గాలతో ప్రత్యేకంగా సమావేశాలు నిర్వహిస్తున్నది. వివిధ వర్గాలను బీఆర్ఎస్ అభ్యర్ధుల గెలుపుకు సహకరించేట్లుగా ఏకతాటిపైకి తీసుకొచ్చే బాధ్యతలను కేసీయార్ కొందరు మంత్రులకు అప్పగించినట్లు పార్టీ వర్గాల సమాచారం.

ఈ సమావేశాలు ఏ స్ధాయిలో జరుగుతన్నాయంటే కేసీయార్ పోటీచేస్తున్న గజ్వేలు, కామారెడ్డిలో కూడా జరుగుతున్నాయి. అంటేనే ఓట్లు పడే విషయంలో బీఆర్ఎస్ అభ్యర్ధులు, నేతల్లో ఏ స్ధాయిలో టెన్షన్ పెరిగిపోతోందో అర్ధమవుతోంది. ఆత్మీయ సమ్మేళనాల్లో హామీలిచ్చేటపుడు ప్రభుత్వం ఇప్పటివరకు కులాలకు చేసిన మేళ్ళని సంఘాల్లోని పెద్దలతో చెప్పిస్తున్నారు. పనిలోపనిగా సదరు పెద్దలకు ప్రత్యేకంగా ప్యాకేజీలు కూడా ఆఫర్ చేస్తున్నట్లు చెప్పుకుంటున్నారు. ఇప్పటివరకు ఎస్సీల్లో మాదిగ, గిరిజన, ముస్లిం మైనారిటిల్లోని సామాజికవర్గాలతో మీటింగులు పెట్టినట్లు సమాచారం.

ఇదే సమయంలో న్యాయవాదులు, ఉద్యమకారులు, కళాకారులు, మేథావులు, విద్యార్ధి సమ్మేళనాలకు కూడా శ్రీకారం చుడుతున్నది. అంటే గెలుపుకు అందుబాటులో ఉన్న ఏ ఒక్క అవకాశాన్ని కూడా బీఆర్ఎస్ వదులుకోవాలని అనుకోవటంలేదు. మేడ్చల్ జిల్లాలోని శామీర్ పేటలో గిరిజన ఆత్మీయ సమేళనాన్ని బీఆర్ఎస్ నిర్వహించబోతున్నది. మంత్రులు కేటీయార్, హరీష్ రావు, సత్యవతీ రాథోడ్ హాజరవుతున్నారు. తండాలను గ్రామపంచాయితీలుగా మార్చటం, పోడు భూములకు గిరిజనులకే పట్టాలు ఇవ్వటం, గిరిజన పండుగులను రాష్ట్ర పండుగలుగా గుర్తించటం లాంటి అంశాలను వివరించబోతున్నారు. మరి చివరకు ఏమవుతుందో చూడాలి.