త్వరలో భూమా మౌనికా రెడ్డి పొలిటికల్ ఎంట్రీ ...?

అంతా ప్రచారంలో అనుకున్నట్లుగానే జరిగింది అనిపిస్తోంది. టీడీపీ అధినేత చంద్రబాబుతో హీరో మంచు మనోజ్ ఆయన భార్య భూమా మౌనికా రెడ్డి భేటీ అయిన విషయం రాజకీయంగా సంచలనం రేపింది. మౌనికా రెడ్డి రాజకీయాల్లోకి వస్తున్నారు అని ప్రచారం ఊపందుకున్న వేళ చంద్రబాబుని కలసి బయటకు వచ్చిన మంచు మనోజ్ మీడియాతో మాట్లాడుతూ ఆ సస్పెన్స్ ని మరికొంచెం పెంచేశారు.

పొలిటికల్ ఎంట్రీ పై త్వరలో నిర్ణయం ఉంటుందని మనోజ్ మీడియాకు చెప్పారు. ఆ విషయాన్ని మౌనికా రెడ్డి తానే స్వయంగా చెబుతారు అని కూడా హింట్ ఇచ్చారు. అంటే మౌనికా రెడ్డి ఆళ్ళగడ్డ ఎమ్మెల్యే రేసులో ఉన్నారన్న సమాచారాన్ని మాత్రం మంచు మనోజ్ చెప్పకనే చెప్పారా అన్న చర్చ వస్తోంది. మరో వైపు చూస్తే రాజకీయ భేటీ కాదు ఇది అంటూనే మంచు హీరో ఆ విషయం త్వరలో అని సినీ ఫక్కీలో చెప్పడం మీదనే చర్చ సాగుతోంది.

మౌనికారెడ్డి అక్క అఖిలప్రియ ప్రాతినిధ్యం వహిస్తున్న ఆళ్ళగడ్డ నుంచి మౌనికారెడ్డి పోటీ చేస్తారా లేక నంద్యాల నుంచి టికెట్ అడుగుతారా అన్నది కూడా మరో చర్చగా ఉంది. ఎందుకంటే ఆళ్ళగడ్డ భూమా శోభా నాగిరెడ్డి సీటు అయితే నంద్యాల భూమా నాగిరెడ్డి సీటు. ఈ రెండూ భూమా కుటుంబానివే అని అఖిలప్రియ పొలిటికల్ గా క్లెయిం చేస్తున్న నేపధ్యంలో అక్కకు పోటీకి వెళ్లకుండా నంద్యాల సీటు అడుగుతారా అన్నది కూడా చర్చగా ఉంది.

మరో వైపు చూస్తే అఖిలప్రియ సీటుకు చెల్లెలు నుంచే పోటీ ఉందని అంటున్నారు. రాజకీయాల మీద మనోజ్ అయితే ఎక్కడా ఖండించకుండా తొందరలోనే మౌనిక చెబుతుంది అనడంతో కచ్చితంగా మౌనిక రాజకీయ రంగ ప్రవేశం ఉంటుంది అని అంటున్నారు. ఇంకో వైపు చూసుకుటే తమ పెళ్ళి అయిన తరువాత ఫస్ట్ టైం చంద్రబాబుని కలవడానికి వచ్చామని మనోజ్ మీడియాకు చెప్పారు.

అంతే కాదు, రేపు మా బాబు పుట్టినరోజు బ్లెస్సింగ్ కోసం వచ్చామని కూడా అన్నారు. ఇక తమ పెళ్లయిన తర్వాత ఎప్పటినుంచో చంద్రబాబుని కలవాలని అనుకున్నామని, అది ఈరోజు కుదిరిందని మనోజ్ చెప్పారు. అలా చంద్రబాబుని జస్ట్ కర్టెసీ గానే కలవడానికి వచ్చామని భేటీని లైట్ చేసి చెప్పారు.

అయితే మీడియా మాత్రం రాజకీయాల గురించి ప్రశ్నించడంతో తొందరలోనే అంటూ మౌనికే చెబుతుంది ఆ విషయం అనడం ద్వారా మంచు హీరో ప్రచారంలో ఉన్న వార్తల వేడిని ఇంకా పెంచేశారు. మరి భూమా ఫ్యామిలీలో కొత్త పోటీయా లేక అక్క చెల్లెళ్ళు ఇద్దరికీ టికెట్లు ఇస్తారా అన్నది చూడాలని అంటున్నారు. ఇంతకీ మంచు హీరో పోటీకి దిగుతారా లేక మౌనికా అన్నది కూడా చూడాలని అంటున్నారు. మంచు హీరో పోటీ అంటే చంద్రగిరి సీటు మీద కూడా కన్ను వేయవచ్చు అన్నది మరో మాటగా ఉంది.