ఆ బొకే విషయం దేశంలో చాలా ట్రోల్ అవుతుంది!

ఈ రోజుల్లో సెలబ్రెటీలు ఎవరైనా చిన్నపాటి పొరపాటు చేసినా నెట్టింట ట్రోలింగ్ బారిన పడుతున్న సంగతి తెలిసిందే. ఏమాత్రం అవకాశం దక్కినా నెటిజన్లు ఒక ఆటాడేసుకుంటారు. తాజాగా “చంద్రబాబు - అమిత్ షా - నడ్డా - ఓ బొకే” అనే అంశం నెట్టింట వైరల్ గా మారింది. దీనికి సంబంధించిన వీడియోను కాంగ్రెస్స్ పార్టీ పోస్ట్ చేయగా.. ఈ వీడియో కింద కామెంట్లు హల్ చల్ చేస్తున్నాయి.

వివరాళ్లోకి వెళ్తే... ఏపీలో కూటమి అధికారంలోకి రావడంతో చంద్రబాబు ముఖ్యమంత్రిగా ప్రమాణస్వీకారం చేసిన సంగతి తెలిసిందే. ఈ కార్యక్రమంలో ప్రధాని నరేంద్ర మోడీ, అమిత్ షా, జేపీ నడ్డా తో పాటు పలువురు బీజేపీ కీలక నేతలు, కేంద్రమంత్రులు పాల్గొన్నారు. ఈ కార్యక్రమం బుధవారం జరగగా.. దీనికోసం మంగళవారం సాయంత్రమే ఢిల్లీ నేతలు ఏపీలో దిగారు.

ఈ క్రమంలో... గన్నవరం ఎయిర్ పోర్ట్ లో వారందరికీ నారా లోకేష్, దగ్గుబాటి పురందేశ్వరి స్వాగతం పలికారు. అనంతరం వారు బస చేసే హోటల్ వద్ద అమిత్ షా, జేపీ నడ్డాలకు స్వయంగా చంద్రబాబే స్వాగతం పలికారు. ఈ సందర్భంగా చోటు చేసుకున్న ఘటనకు సంబంధించిన ఓ వీడియో క్లిప్ ఇప్పుడు సోషల్ మీడియాలో వైరల్ గా మారింది. దీనిపై సెటైర్లు పేలుతున్నాయి.

అవును... అమిత్ షా ను రిసీవ్ చేసుకునే సమయంలో చంద్రబాబు నమస్కరించారు. ఈ సమయంలో ప్రతినమస్కారం చేసిన అమిత్ షా... సెక్యూరిటీ ఇచ్చిన బొకేను చంద్రబాబు ఇచ్చారు. అనంతరం తిరిగి ఎవరైతే తనకు ఇచ్చారో అతనికే తిరిగి ఆ బొకేను అమిత్ షా ఇచ్చేశారు. కట్ చేస్తే... అనంతరం అదే బొకేను మరో సెక్యూరిటీ సిబ్బంది.. జేపీ నడ్డాకు ఇచ్చారు.

దీంతో జేపీ నడ్డా కూడా అమిత్ షా ఇచ్చిన బొకేనే తిరిగి చంద్రబాబు చేతిలో పెట్టారు. మళ్లీ తిరిగి ఆ బొకేను అమిత్ షా ప్రయాణించి వచ్చిన కారులోకే చేరుతున్నట్లు కనిపించింది! దీంతో... “ఒకే బొకే - ముగ్గురు నేతలు” అంటూ నెట్టింట ట్రోలింగ్స్ మొదలైపోయాయి. బొకే లేకపోతే నమస్కరించి మమ అనిపించాలి కానీ.. ఇలాంటి పనులు చేస్తే కెమెరా కళ్లు ఊరుకుంటాయా అంటూ నెటిజన్లు కామెంట్లు చేస్తున్నారు.