బోరుగడ్డపై పోలీసుల ప్రేమ తగ్గలేదు..తాజా వైరల్ వీడియో

ఏపీ సీఎం చంద్రబాబు, ఏపీ డిప్యూటీ సీఎం పవన్ కల్యాణ్‌, మంత్రి నారా లోకేష్, వారి కుటుంబ సభ్యులను వైసీపీ నేత బోరుగడ్డ అనిల్ అసభ్య పదజాలంతో దూషించిన సంగతి తెలిసిందే. వారిపై సోషల్ మీడియాలో అసభ్యకరమైన పోస్టులు పెట్టిన కేసులో బోరుగడ్డ అనిల్ అరెస్టయ్యారు. అయితే, బోరుగడ్డకు రాచమర్యాదలు కల్పిస్తున్న పోలీసుల తీరుపై విమర్శలు వస్తున్నా వారి తీరు మారడం లేదు. తాజాగా మరో పోలీస్ స్టేషన్ లో బోరుగడ్డ దర్జాగా కుర్చీలో కూర్చని పోలీసులతో మాట్లాడుతున్న వీడియో వైరల్ గా మారింది.

నా మేనల్లుడు నా బావమరిది కొడుకు అంటూ ఓ కుర్రాడిని తన పక్కన కుర్చీలో కూర్చోబెట్టుకొని బోరుగడ్డ ముచ్చట్లు చెబుతున్న వీడియో వైరల్ గా మారింది. ఆ తర్వాత అక్కడకు ఒక పోలీసుల అధికారి వచ్చినా బోరుగడ్డ కుర్చీలో కూర్చొని వారితో మాట్లాడుతున్న వైనంపై విమర్శలు వస్తున్నాయి. రౌడీ షీటర్ అయిన బోరుగడ్డకు ఇలా రాచమర్యాదలు చేయడంపై ట్రోలింగ్ జరుగుతోంది. బోరుగడ్డ పోలీసులకు ఆదేశాలు ఇస్తున్నట్లు కనిపించిని వైనంపై చర్చ జరుగుతోంది. బోరుగడ్డ కంప్యూటర్ ఎదుట ఉన్న కుర్చీలో కూర్చోగా పోలీసులు నిలబడి మాట్లాడుతున్నారు. వారితో బోరుగడ్డ ఏదో చెపుతుంటే అందరూ ఆసక్తిగా వింటూ ఉన్నారు.

అంతకుముందు ఖైదీగా ఉన్న బోరుగడ్డ అనిల్ కుమార్‌తో కలిసి.. పోలీసులు ఓ హోటల్‌లో బిర్యానీలు తినడంపై విమర్శలు వచ్చిన సంగతి తెలిసిందే. ఆ ఘటన నేపథ్యంలో ఏడుగురు పోలీసులను డీజీపీ ద్వారకా తిరుమల రావు సస్పెండ్ చేశారు. అయినా సరే పోలీసుల తీరులో మార్పు రాలేదు. గుంటూరు ఆరండల్ పోలీస్ స్టేషన్‌ లో బోరుగడ్డ పడుకునేందుకు ఓ టేబుల్ పై దుప్పటి, దిండు వేయడం సంచలనం రేపింది.