కొత్తగూడెంలాగే గద్వాలలో కూడా.. ఎమ్మెల్యే కేసులో సుప్రీంలో స్టే

తెలంగాణలో ఇటీవలి కాలంలో ఇద్దరు ఎమ్మెల్యేల ఎన్నిక చెల్లదంటూ సంచలన తీర్పులు వచ్చాయి. అవి వెలువడినప్పడు ఎంత సంచలనం రేపాయో.. అనంతరం అందులో అనేక మలుపులు చోటుచేసుకున్నాయి. తెలంగాణ రాష్ట్రానికి ఈ చివరన ఉండే గద్వాల, ఆ చివరన ఉండే కొత్తగూడెం ఎమ్మెల్యేలు బండ్ల కృష్ణమోహన్‌రెడ్డి, వనమా వెంకటేశ్వరావు అనర్హత వేటుకు గురైనట్లే గురయి మళ్లీ ఊరట పొందారు.

కొత్తగూడెంలో అలా..

భద్రాద్రి కొత్తగూడెం జిల్లా కేంద్రం కొత్తగూడెంలో సీనియర్ ఎమ్మెల్యే వనమా ఎన్నికను జూలైలో హైకోర్టు కొట్టివేసింది. ఆయన చేతిలో ఓడిన బీఆర్ఎస్ అభ్యర్థి జలగం వెంకట్రావును ఎమ్మెల్యేగానూ ప్రకటించింది. దీనిపై వనమా సుప్రీం కోర్టుకు వెళ్లి స్టే పొందారు. అఫిడవిట్ లో తప్పుడు సమాచారం ఇచ్చినందుకు వనమాపై జలగం కేసు వేశారు. అచ్చం ఇలానే గద్వాలలో ఎమ్మెల్యే బండ్ల కృష్ణ మోహన్‌ రెడ్డిపై ఆయన చేతిలో ఓడిన కాంగ్రెస్ అభ్యర్థి డీకే అరుణ (ప్రస్తుతం బీజేపీలో ఉన్నారు) కోర్టులో కేసు వేశారు. విచారణ అనంతరం కృష్ణమోహన్‌రెడ్డి ఎన్నిక చెల్లదంటూ తెలంగాణ హైకోర్టు కొన్ని రోజుల కిందట తీర్పు చెప్పింది. డీకే అరుణను ఎమ్మెల్యేగానూ ప్రకటించింది. దీనిపై కృష్ణమోహన్‌రెడ్డి సుప్రీం కోర్టుకు వెళ్లారు. తెలంగాణ హైకోర్టు ఇచ్చిన తీర్పుపై సోమవారం సుప్రీం స్టే విధించింది.

ఈ కేసులో ప్రతివాదులకు నోటీసులు జారీ చేస్తూ.. రెండు వారాల్లోగా వివరణ ఇవ్వాలని ఆదేశించింది. కృష్ణమోహన్‌రెడ్డి పిటిషన్ ను జస్టిస్ సూర్యకాంత్, జస్టిస్ దీపాంకర్ దత్తా నేతృత్వంలోని ధర్మాసనం విచారించింది. తెలంగాణ హైకోర్టు తీర్పుపై స్టే విధిస్తూ తదుపరి విచారణను నాలుగు వారాలకు వాయిదా వేసింది. కాగా, బ్యాంకు ఖాతాల వివరాలు చెప్పకపోవడం తన తప్పని కృష్ణమోహన్ రెడ్డి ఒప్పుకొన్నారు. ఆ ఖాతాలు తన భార్యవని, సేవింగ్స్‌ ఖాతాలని ఆయన తరపు న్యాయవాది వాదించారు.. వ్యవసాయ భూమిని 2018 ఎన్నికలకు ముందే అమ్మానని, దానివల్ల ఎన్నికలపై ఎలాంటి ప్రభావం పడలేదని కోర్టుకు విన్నవించారు. అయితే.. వివరాలు వెల్లడించకపోవడం కచ్చితంగా చట్ట ఉల్లంఘన అని డీకే అరుణ తరఫున న్యాయవాది వాదించారు.

ఇంతకూ ఎమ్మెల్యే ఎవరు?

కొత్తగూడెంలో వనమాను అనర్హుడిగా ప్రకటించినా.. జలగం చేత ఎమ్మెల్యేగా ప్రమాణం చేయించలేదు. ఈలోగా వనమా సుప్రీంకు వెళ్లి స్టే పొందారు. ఇప్పుడు గద్వాల విషయంలోనూ ఇంతే జరిగింది. అరుణను ఎమ్మెల్యేగా గుర్తిస్తూ కేంద్ర ఎన్నికల సంఘం (సీఈసీ) నోటిఫికేషన్ కూడా జారీ చేసింది. ఈ కేసులో అరుణ కేవియట్ పిటిషన్ కూడా దాఖలు చేశారు. సుప్రీం తీర్పు నేపథ్యంలో ఇంతకూ ఎమ్మెల్యే ఎవరనేది తేలాల్సి ఉంది.