ఆ మంత్రిపై చంద్రబాబు సీరియస్ అయ్యారా?

ఏపీలో టీడీపీ, జనసేన, బీజేపీల కూటమి ప్రభుత్వం అఖండ మెజారిటీతో అధికారంలోకి వచ్చిన సంగతి తెలిసిందే. ఈ క్రమంలోనే గతానికి భిన్నంగా సీట్లు పోర్ట్ ఫోలియోల పంపకంపై చంద్రబాబు ప్రత్యేకంగా దృష్టి సారించారు. రాజకీయాల్లో యువతకు పెద్దపీట వేయాలి అన్న ఉద్దేశంతో తొలిసారి ఎమ్మెల్యేగా గెలిచిన కొందరికి కూడా తన పార్టీ తరఫున మంత్రి పదవి ఇచ్చారు. అయితే కొందరు మంత్రుల పనితీరు బాగోలేదన్న విమర్శలు రావడంతో నేరుగా సీఎం చంద్రబాబు రంగంలోకి దిగారు.

ఈ క్రమంలోనే తన పార్టీకి చెందిన జూనియర్ మంత్రి వాసంశెట్టి సుభాష్ పై చంద్రబాబు అసంతృప్తిగా ఉన్నట్టు తెలుస్తోంది. సదరు మంత్రి ప్రోగ్రెస్ బాగోలేదని, దాంతోపాటు టీడీపీ సభ్యత్వ నమోదు కార్యక్రమంలో కూడా ఆయన చురుగ్గా పాల్గొనడం లేదని చంద్రబాబు అసంతృప్తి వ్యక్తం చేసినట్లుగా తెలుస్తోంది. చంద్రబాబు, సుభాష్ ల మధ్య జరిగిన ఫోన్ కాల్ ఆడియో లీక్ అంటూ ఓ ఆడియో క్లిప్ సోషల్ మీడియాలో వైరల్ గా మారింది.

కోనసీమ జిల్లా రామచంద్రపురం నియోజకవర్గం నుండి తొలిసారి ఎమ్మెల్యేగా వాసంశెట్టి సుభాష్ గెలుపొందారు. అయితే యువకుడైన సుభాష్ కు చంద్రబాబు తొలిసారి మంత్రి పదవిని ఆఫర్ చేశారు. కానీ, ఇప్పటివరకు ఆయన పనితీరుతో చంద్రబాబు సంతృప్తికరంగా లేరని తెలుస్తోంది. తన టార్గెట్ లో కేవలం 29 శాతం పూర్తి చేసిన సుభాష్ కు చంద్రబాబు నేరుగా ఫోన్ చేసి క్లాస్ పీకినట్లు ఆడియో కాల్ వైరల్ గా మారింది. తొలిసారి ఎమ్మెల్యేగా గెలిచిన సుభాష్ ను తొలిసారిగా మంత్రిని చేశానని ఇంకా రాజకీయాలపై పూర్తిగా అవగాహన రాలేదని చంద్రబాబు ఆ ఆడియో క్లిప్ లో అన్నట్టుగా తెలుస్తోంది.

నీ నియోజకవర్గంలో ఎంత శాతం సభ్యత్వ నమోదైందో చూసుకున్నావా అంటూ సుభాష్ ను చంద్రబాబు ప్రశ్నించినట్టుగా ఆడియో క్లిప్ లో ఉంది. ‘‘ఫస్ట్ టైం వచ్చావు, ఎంతో గౌరవించింది పార్టీ..కనీసం ఆ పట్టుదల లేకపోతే ఎట్లా...సీరియస్ నెస్ ఉండాలి..మీ అంధరినీ ఇది చేస్తున్నానని అనుకోవద్దు. నా బాధ్యత నేను చేస్తున్నా..మీ బాధ్యత మీరు చేయండి..ఎమ్మెల్యేలు ప్రూవ్ చేసుకోవాలి..లేకుంటా ఆల్టర్నేటివ్ ఆలోచించుకోవాల్సి ఉంటుంది...అంచనాలకు తగ్గట్లుగా పని చేయండి..95 సీఎం ను చూస్తారు అని చెబుతూనే ఉన్నా చాలా రోజుల నుండి...ఇకపై సీరియస్ గా ఉండండి...’’ అని చంద్రబాబు అన్నట్లు ఉన్న ఆడియో క్లిప్ వైరల్ గా మారింది.

అయితే, ఈ ఆడియో క్లిప్ ఒరిజినలా లేక ఫేకా అన్నది తేలాల్సి ఉంది. ఒకవేళ ఒరిజినల్ అయితే, ఈ సంభాషణ ఎలా లీక్ అయింది అన్నది ఆసక్తికరంగా మారింది. సుభాష్ అంటే గిట్లని వారు ఈ ఆడియో క్లిప్ లీక్ చేశారని ప్రచారం జరుగుతోంది.