ఒక్క రూపాయి అంత పని చేసింది... వీడియో వైరల్!

సాధారణంగా వందలు, వేలు లంచాలు తీసుకుంటూ ఏసీబీ అధికారులకు రెడ్ హ్యాండెడ్ గా దొరికిపోయిన చాలా మంది అధికారుల వ్యవహారం తెరపైకి వస్తుంటున్న సంగతి తెలిసిందే! అయితే తాజాగా తీసుకొవాల్సిన రూపాయి కంటే మరో రూపాయి ఎక్కువ వసూల్ చేశాడనే ఆరోపణలపై ఓ ఉద్యోగిని ప్రభుత్వం విధుల నుంచి తొలగించిన వ్యవహారం తాజాగా తెరపైకి వచ్చింది.

అవును... కమ్యునిటీ హెల్త్ సెంటర్ లో ఓ రోగి నుంచి రూ.1 అధికంగా వసూల్ చేశాడనే ఆరోపణలు తెరపైకి వచ్చాయి. దీంతో రంగంలోకి దిగిన ఎమ్మెల్యే సదరు కాంట్రాక్ట్ ఉద్యోగిపై నిప్పులు చెరిగారు.. ఈ సమయంలో అతడిని విధుల నుంచి తొలగించారు. ఈ సమయంలో ఎమ్మెల్యే ఫైరవుతూ మాట్లాడుతున్న వీడియో ఇప్పుడు నెట్టింట హల్ చల్ చేస్తోంది.

వివరాళ్లోకి వెళ్తే... ఉత్తరప్రదేశ్, మహారాజ్ గంజ్ జిల్లాలోని జగదౌర్ గ్రామ కమ్యునిటీ హెల్త్ సెంటర్ లో సిబ్బంది అలక్ష్యంగా వ్యవహరిస్తున్నారంటూ ఆరోపణలు వెల్లువెత్తుతున్నాయి. ఈ నేపథ్యంలో... సివ్వా ఎమ్మెల్యే, బీజేపీ నేత ప్రేమ్ సాగర్ పటేల్.. స్థానిక గ్రామంలోని కమ్యునిటీ హెల్త్ సెంటర్ లో ఆకస్మిక తనిఖీలు చేపట్టారు. ఈ సందర్భంగా ఆయనకు ఓ వ్యక్తి నుంచి ఫిర్యాదు అందింది.

ఇందులో భాగంగా... ఆస్పత్రిలోని ఫార్మసిస్ట్ తన వద్ద నుంచి ఒక రూపాయి అధికంగా వసూల్ చేశాడంటూ ఓ రోగి, ఎమ్మెల్యే ప్రేమ్ సాగర్ పటేల్ కు ఫిర్యాదు చేశాడు. దీంతో సదరు ఫార్మసిస్ట్ పై ఎమ్మెల్యే ఆగ్రహం వ్యక్తం చేశారు. అనంతరం ఈ విషయాన్ని జిల్లా వైద్యారోగ్యశాఖ ఉన్నతాధికారుల దృష్టికి తీసుకెళ్లడంతో.. వారు స్పందించి సదరు కాంట్రాక్ట్ ఉద్యోగిని విధుల నుంచి తొలగించారు.

ఈ సమయంలో ఒక రూపాయి ఎక్కువగా వసూల్ చేసిన కాంట్రాక్ట్ ఉద్యోగిని ఎమ్మెల్యే నిలదీస్తున్న వీడియో నెట్టింట వైరల్ గా మారింది.