ఉత్తరాంధ్రా వైపు చిన్నమ్మ చూపు !

బీజేపీ రాష్ట్ర అధ్యక్షురాలు దగ్గుబాటి పురంధేశ్వరి ఉత్తరాంధ్రా వైపు చూస్తున్నారు. ఆమె రెండు రోజుల ఉత్తరాంధ్రా టూర్ కి ప్లాన్ చేస్తున్నారు. ఈ నెల 24 నుంచి రెండు రోజుల పాటు మూడు జిల్లాలలో పర్యటిస్తారు ఉత్తరాంధ్రాకు చివరన ఉన్న శ్రీకాకుళం నుంచి పురంధేశ్వరి టూర్ మొదలవుతుంది. విశాఖ అనకాపల్లి జిల్లాల పర్యటనతో టూర్ ముగుస్తుంది. బీజేపీకి ఉత్తారాంధ్రాలో బలం పెంచడానికి పటిష్టం చేయడానికే ఈ టూర్ అని పార్టీ వర్గాలు అంటున్నాయి.

గతంలో సోము వీర్రాజు కూడా పార్టీ ప్రెసిడెంట్ గా ఈ ప్రాంతంలో పర్యటించారు. కానీ పెద్దగా ఫలితం లేకుండా పోయింది. అయితే పురంధేశ్వరి ఎన్టీయార్ కుమార్తె కావడంతో ఏమైనా ఆకర్షించగలరా అన్నది చర్చగా ఉంది.

ఉత్తరాంధ్రాలో బీజేపీకి విశాఖ సిటీలోనే ఎక్కువగా బలం ఉంది. ఆ తరువాత కొంత అనకాపల్లి ప్రాంతంలో ఉంది. విజయనగరం, శ్రీకాకుళంలో కీలక నేతలు గతంలో చేరినా కూడా తరువాత వారు తప్పుకున్నారు. మాజీ మంత్రి పడాల అరుణ లాంటి వారు బీజేపీ వైపు మొగ్గు చూపినా ప్రస్తుతం జనసేనను ఎంచుకున్నారు.

ఒక దశలో మాజీ మంత్రి కిమిడి కళా వెంకటరావునే బీజేపీలోకి చేరమని పార్టీ కోరింది. అలాగే అధికార వైసీపీలో మంత్రి పదవి రాలేదని ఆవేదన చెందిన ఒక సీనియర్ ఎమ్మెల్యేని శ్రీకాకుళంలో ఆహ్వానించినట్లుగా వార్తలు వచ్చాయి.

ఇక విజయనగరంలో కూడా టీడీపీ వైసీపీ అసంతృప్తులకు గేలం వేయాలని చూశారు. అలా చీపురుపల్లి మాజీ ఎమ్మెల్యే గద్దే బాబూరావు బీజేపీలో చేరారు. కానీ ప్రస్తుతం ఆయన రాజకీయంగా చురుకుగా లేరు. ఇలా బీజేపీకి ఉత్తరాంధ్రా ఎపుడూ ఊరిస్తూనే ఉంది తప్ప కచ్చితమైన భరోసా ఇవ్వడంలేదు

రానున్న ఎన్నికల్లో పొత్తులతో పోటీ చేసినా లేక విడిగా పోటీ చేసినా అవసరం అయిన బలం ఉండాలి అన్నది బీజేపీ పెద్దల ఆలోచన. అందుకే పురంధేశ్వరి చేత పర్యటనలు చేయిస్తున్నారు అని అంటున్నారు. బీజేపీ ప్రెసిడెంట్ అయ్యాక ఒక పర్యాయం విశాఖ వచ్చిన పురంధేశ్వరి స్థానికంగా జరిగిన పార్టీ కార్యక్రమాలలో పాల్గొన్నారు.

ఈసారి పూర్తి స్థాయిలో ఉత్తరాంధ్రా టూర్ పెట్టుకున్నారు. ఆమె వైసీపీ ప్రభుత్వ విధానాలను గట్టిగానే విమర్శిస్తున్నారు. ఇక రాజకీయంగా చూస్తే 2024 ఎన్నికల్లో విశాఖ నుంచి ఎంపీగా ఆమె పోటీ చేయాలని అనుకుంటున్నారు అని తెలుస్తోంది.

దాంతో ఆమె ఈ ప్రాంతం మీద ఫోకస్ పెట్టారని అంటున్నారు. పురంధేశ్వరి ఉత్తరాంధ్రా టూర్ లో వైసీపీ మీద ఏ రకమైన విమర్శలు చేస్తారు. ఆమె టూర్ వెనక వ్యూహాలు ఏంటి అన్నది చూడాల్సి ఉంది.