క్యాబ్ లో దారుణం... "నిన్ను రే*ప్ చేస్తే.. మీ అమ్మ వచ్చి కాపాడుతుందా?"

ప్రధానంగా రాత్రి సమయాల్లో ప్రయాణించే మహిళల భద్రతపై నిత్యం చర్చ జరుగుతూనే ఉంటున్న సంగతి తెలిసిందే. క్యాబ్ ఎక్కితే డ్రైవర్ ఏమి చేస్తాడో అని, బైక్ పై వెళ్తే రోడ్లపై ఆకతాయిల అల్లర్ల గురించి భయం, మెట్రో అవకాశం ఉండదు... ఈ క్రమంలో జాబ్ ముగించుకుని రాత్రి పూట ఇంటికి వెళ్తున్న ఆడపిల్లలకు గడి గడి గండంలా పరిస్థితి ఉంటుందని చెబుతుంటారు.

కంటికి కనిపించని భయం, గుండెకు మాత్రమే వినిపించే ఆందోళన వారిని ఆ సమయంలో ఉక్కిరిబిక్కిరి చేసేస్తుంటుంది. తాజాగా దేశ రాజధాని ఢిల్లీలో 10 దాటిన తర్వాత డిన్నర్ ముగించుకుని ఉబర్ ట్యాక్సీలో ఇంటికి బయలుదేరిన ఓ యువతికి ఇలాంటి భయంకరమైన అనుభవమే ఎదురైంది. ఆ విషయాని ఆమె రెడిట్ పోస్ట్ లో వివరించింది.

అవును... దేశ రాజధాని ఢిల్లీలో క్యాబ్ లో ప్రయాణిస్తున్న ఓ మహిళకు చేదు అనుభవం ఎదురైంది. రాత్రి ఒంటరిగా క్యాబ్ లో వెళ్తుండగా.. ఈ సమయంలో 'నీపై అత్యాచారం చేస్తే.. మీ అమ్మ వచ్చి కాపాడుతుందా?" అని ఆ క్యాబ్ డ్రైవర్ ప్రశ్నిస్తూ బెదిరించాడని 24 ఏళ్ల మహిళ రెడిట్ పోస్ట్ లో పంచుకుంది.

అయితే... ఈ పోస్ట్ కు సంబంధించిన కామెంట్ సెక్షన్ లో అనూహ్యంగా మరికొంతమంది తమ ఇలాంటి అనుభవాలను పంచుకోవడం గమనార్హం. ఈ సమయంలో తన భయానక అనుభవాన్ని పంచుకున్న సదరు మహిళ... తనను అద్దంలో నుంచి క్యాబ్ డ్రైవర్ పదేపదే చూస్తుండటం తాను గమనించినట్లు తెలిపింది.

ఈ సమయంలో... "ఇంత రాత్రి వరకూ ఏమి చేస్తున్నావు"?.. "నువ్వు మగాడివి అయ్యి ఉంటే అస్సలు ట్యాక్సీలో ఎక్కనిచ్చేవాడినే కాదు".. " ఎందుకంటే.. మీరు రేప్ కి గురైతే మమ్మల్ని అంటారు" అని మాట్లాడసాగాడని యువతి పేర్కొంది. ఈ సమయంలో ముందుజాగ్రత్తగా... తన రైడ్ లొకేషన్ ని తల్లికి పంపించింది యువతి.

ఆ విషయం గమనించాడో ఏమో కానీ... "ఐదు నిమిషాల్లో నేను నిన్ను ఏదైనా చేస్తే.. రేప్ చేస్తే.. మీ అమ్మ వచ్చి సహాయం చేస్తుందని అనుకుంటున్నావా?" అని డ్రైవర్ తనతో అన్నాడని ఆ యువతి వెల్లడించింది. అయితే... అదృష్టవశాత్తు ఆమె సేఫ్ గా ఇంటికి చేరుకుందని ఉబర్ కస్ట్ మర్ కేర్ సర్వీసెస్ తెలిపింది.