శునకములయందు ఈ "మానవ శునకం" వేరయా... వీడియో వైరల్!

జిహ్వకో రుచి.. పుర్రెకో బుద్దీ అంటారు! అలాగే ఆలోచించారో ఏమో కానీ... తాజాగా శునకంగా మారి ఆనందం పొందారు ఒక వ్యక్తి. ఏకంగా కుక్కలు కూడా ఈర్ష్యపడే స్థాయిలో ఫెర్మార్మెన్స్ చేశాడన్నా అతిశయోక్తి కాదేమో! కాకపోతే లక్షణంగా మనిషి పుట్టుక పుట్టాక.. వీదుల్లో అలా శునకంగా తిరగాలనే ఆలోచన ఎందుకు వచ్చిందనేది ఆసక్తిగా మారింది.

అవును... జపాన్‌ కి చెందిన వ్యక్తి కుక్కలా మారాలనుకున్న వెర్రి ఆలోచన వ్యవహారం గతంలో తెరపైకి వచ్చింది. ఓ ప్రముఖ ఛానెల్‌ కి ఇచ్చిన ఇంటర్వ్యూలో తన మనసులో ఉన్న కోరికను వెల్లడించాడు. దీనికోసం దాదాపు రూ. 12 లక్షల దాక ఖర్చు పెడుతున్నట్లు కూడా చెప్పాడు. తనను కుక్కలా మార్చేందుకు ఓ జపాన్‌ కంపెనీ ముందుకొచ్చిందన్నాడు.

ఆ రూ. 12 లక్షలు కూడా అధికంగా కుక్కలా కనిపించేలా దుస్తులు తయారు చేయించుకోవడానికే అవుతుందని.. అవి వేసుకుంటే తాను అచ్చం కుక్కలానే కనిపిస్తానని చెప్పుకొచ్చాడు. అనంతరం ఆ విషయాన్ని చాలా మంది లైట్ తీసుకున్నారు. ఇదేదో పిచ్చిలా ఉందని సరిపెట్టుకున్నారు.

అయితే తాజాగా ఆ మనిషి అన్నంతపనీ చేశాడు. చెప్పినట్లుగానే కుక్కలా మారిపోయాడు.. అలా అని జాతరలో కుక్క వేషం వేసినట్లు రెడీ అయ్యాడనుకుంటే పొరపాటే... అచ్చుగుద్దినట్లు కుక్కలానే ఉన్నాడు.. కుక్కలానే నడిచాడు.. కుక్కలాగానే ప్రవర్తించాడు. వీదుల్లో కుక్కలా తిరిగాడు.

ఈ సమయంలో ఈ కుక్కమనిషో, మనిషికుక్కో... అతడిని చూసేందుకు జనాలు ఎగబడుతున్నారు. వీడియోలు, ఫోటోలు తీసుకుంటున్నారు. కాకపోతే అతగాడి కుక్క రూపాన్ని చూస్తూన్న వీధి కుక్కలు, పెంపుడు కుక్కలు మాత్రం భయంతో దూరంగా వెళ్లిపోతుండటం గమనార్హం.

సంబంధించిన వీడియోని "ఐ వాంట్‌ టు బీ ఏ యానిమల్‌" అనే పేరుతో సోషల్‌ మీడియాలో అప్ లోడ్‌ చేశాడు! ప్రస్తుతం ఆ వీడియో నెట్టింట వైరల్ అవుతోంది. ఆ వ్యక్తి "నేను పూర్తి స్థాయిలో కోలీ అనే కుక్కలా మారిపోయానోచ్చ్‌" అని సంబరపడిపోతుండటం కొసమెరుపు!