బీజేపీలో హరీష్ చేరికను ఈటల సంగం కన్ఫాం చేసినట్లేనా?

గత ఏడాది జరిగిన అసెంబ్లీ ఎన్నికల అనంతరం తెలంగాణలో బీఆరెస్స్ పరిస్థితి దయణీయంగా మారిపోయిన సంగతి తెలిసిందే! తెలంగాణ ప్రత్యేక రాష్ట్రంగా ఏర్పడిన తర్వాత వరుసగా రెండు పర్యాయాలు అధికారంలో ఉన్న ఆ పార్టీ.. గడిచిన అసెంబ్లీ ఎన్నికల్లో 39 సీట్లకు పరిమితమై ప్రధాన ప్రతిపక్ష హోదా దక్కించుకుంది. అయితే కాలక్రమేణా ఆ సంతోషం కూడా లేకుండా పోతోందని అంటున్నారు.

అయితే అనంతరం రేవంత్ రెడ్డి ఆపరేషన్ ఆకర్ష స్టార్ట్ చేశారనే చర్చ తెరపైకి వచ్చిన నేపథ్యలో.. ఆయన బీఆరెస్స్ నేతల కోసం తలుపులు బార్లా తెరిచారనే చర్చ బలంగా వినిపించింది. ఆ చర్చను నిజం చేస్తూ బీఆరెస్స్ ఎమ్మెల్యేలు వరుసగా కాంగ్రెస్ కండువాలు కప్పుకొవడం మొదలుపెట్టారు. ఇటీవల ఒకేసారి ఆరుగురు బీఆరెస్స్ ఎమ్మెల్సీలు కాంగ్రెస్ లో చేరిపోయారు. త్వరలో మరో ఆరుగురు ఎమ్మెల్యేలు అనే కామెంట్లు వినిపిస్తున్నాయి.

ఇక ఈ ఏడాది జరిగిన లోక్ సభ ఎన్నికల ఫలితాల సంగతి సరేసరి. ఒక్క సీటు కూడా గెలుచుకోకుండా సున్నాకు పరిమితమైపోయింది. ఈ సమయంలో హరీష్ రావు సైతం బీజేపీ వైపు చూస్తున్నారనే చర్చ తెరపైకి వచ్చింది. ఇప్పుడు ఈ అంశం తెలంగాణ రాజకీయాల్లో హాట్ టాపిక్ గా మారింది. ఈ సమయంలో బీజేపీలో హరీష్ చేరికపై ఈటల రాజేందర్ ఆల్ మోస్ట్ క్లారిటీ ఇచ్చేశారు!!

అవును... ప్రస్తుతం తెలంగాణలో బీఆరెస్స్ పరిస్థితి అత్యంత దయణీయంగా మారిపోయిందని అంటున్న వేళ.. బీజేపీతో దోస్తీకి ప్రయత్నాలు ముమ్మరం చేసిందనే మాటలు వినిపిస్తున్నాయి. ఈ మేరకు కేటీఆర్, హరీష్ లు హస్తినలో అదేపనిలో ఉన్నారని చెబుతున్నారు. అయితే ఈ కలయికకు దక్షిణాదిలోని బీజేపీ కీలక నేతలు అడ్డుతగులుతున్నరనే ప్రచారం జరుగుతుంది.

ఈ పరిస్థితుల్లో... బీఆరెస్స్ తో దోస్తీకి బీజేపీ నుంచి సానుకూల స్పందన రానిపక్షంలో... తనదారి తాను చూసుకుని, తాను మాత్రం బీజేపీలో చేరిపోయే ఆలోచనలో హరీష్ రావు ఉన్నారని, ప్రస్తుతం ఆ పనుల్లో ఆయన బిజీగా ఉన్నరని, ఈ మేరకు హస్తినలో కాషాయ పెద్దలతో మంతనాలు జరుపుతున్నారనే చర్చ తెలంగాణ రాజకీయాల్లో బలంగా వినిపిస్తుంది.

ఈ సమయంలో బీజేపీలో హరీష్ చేరికపై తెలంగాణలో ఆ పార్టీ కీలక నేత ఈటల రాజేందర్ స్పందించారు. ఇందులో భాగంగా... బీజేపీలో చేరే విషయంపై హరీష్ ఆలోచన చేస్తుండవచ్చని, ఈ మేరకు అవకాశాలున్నాయని వ్యాఖ్యానించారు! ఇదే సమయంలో... రాజకీయాల్లో ఏదైనా జరగొచ్చని.. అయితే ఈ విషయంపై ఇప్పుడున్న పరిస్థితుల్లో తానేమీ కామెంట్ చేయలేనని ఈటల అన్నారు. దీంతో... ఈ విషయంపై సంగం క్లారిటీ వచ్చినట్లే అని అంటున్నారు పరిశీలకులు.