ప్రముఖ గాయకుడు గోరటి వెంకన్న పోటీ ఇక్కడి నుంచే!
తెలంగాణ అసెంబ్లీ ఎన్నికల్లో కాంగ్రెస్‌ పార్టీ చేతిలో చిత్తయిన బీఆర్‌ఎస్‌ పార్టీ మరో మూడు నెలల్లో జరగనున్న లోక్‌ సభ ఎన్నికల్లో మెరుగయిన ఫలితాలు సాధించాలని ఉవ్విళ్లూరుతోంది.
By: Tupaki Desk | 3 Jan 2024 6:37 AM GMT
తెలంగాణ అసెంబ్లీ ఎన్నికల్లో కాంగ్రెస్‌ పార్టీ చేతిలో చిత్తయిన బీఆర్‌ఎస్‌ పార్టీ మరో మూడు నెలల్లో జరగనున్న లోక్‌ సభ ఎన్నికల్లో మెరుగయిన ఫలితాలు సాధించాలని ఉవ్విళ్లూరుతోంది. ఇందులో భాగంగా రాష్ట్రవ్యాప్తంగా జిల్లాలవారీగా సమీక్ష సమావేశాలు నిర్వహిస్తోంది. లోక్‌ సభ ఎన్నికల్లో గట్టి అభ్యర్థులను నిలపడానికి ప్రణాళిక రచించుకుంటోంది.
తెలంగాణలో మొత్తం 17 ఎంపీ స్థానాలు ఉన్నాయి. వీటిలో అత్యధిక సీట్లను గెలుచుకోవడంపై బీఆర్‌ఎస్‌ దృష్టి పెట్టింది. ఇందులో భాగంగా గెలిచే అవకాశం ఉన్న అభ్యర్థులను కాచి వడపోస్తోంది. స్థానిక పరిస్థితులు, ఆయా లోక్‌ సభ నియోజకవర్గాల్లో ప్రత్యర్థి పార్టీల బలాబలాలు, సామాజిక సమీకరణాలు, అభ్యర్థుల ఆర్థిక స్థోమత ఇలా వివిధ అంశాలను బేరీజు వేసుకుంటోంది.
కాగా ఉమ్మడి మహబూబ్‌ నగర్‌ జిల్లాలో నాగర్‌ కర్నూలు నుంచి తెలంగాణ వాగ్గేయకారుడిగా పేరున్న ప్రముఖ గాయకుడు గోరటి వెంకన్న పోటీ చేసే అవకాశం ఉందని చర్చ జరుగుతోంది. ప్రస్తుతం ఆయన ఎమ్మెల్సీగా ఉన్నారు. వచ్చే ఎన్నికల్లో నాగర్‌ కర్నూలు ఎంపీ స్థానం నుంచి బీఆర్‌ఎస్‌ తరఫున గోరటి వెంకన్నను బరిలోకి దింపాలని ఆ పార్టీ యోచిస్తోంది.
ఈ మేరకు బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌.. గోరటి వెంకన్నకు సీటు కేటాయించే విషయంలో స్థానిక నేతల అభిప్రాయం తీసుకున్నట్టు తెలుస్తోంది.
నాగర్‌కర్నూల్‌ పార్లమెంట్‌ నియోజకవర్గం పరిధిలో ఏడు అసెంబ్లీ సెగ్మెంట్ల బీఆర్‌ఎస్‌ ఇంచార్జీలు అందరూ గోరటి వెంకన్నకే ఎంపీ టికెట్‌ ఇవ్వాలని కేటీఆర్‌ కు సూచించినట్టు తెలిసింది. అలాగే పలువురు మాజీ ఎమ్మెల్యేలు కూడా గోరటి వెంకన్న అభ్యర్థిత్వానికే జైకొట్టారని సమాచారం.
కాగా ప్రస్తుతం నాగర్‌ కర్నూల్‌ ఎంపీగా ప్రస్తుతం బీఆర్‌ఎస్‌ పార్టీకి చెందిన పి.రాములు ఉన్నారు. అయితే జడ్పీ చైర్‌పర్సన్‌ ఎంపిక విషయంలో ఆయనకు, జిల్లాలోని కొందరు ఎమ్మెల్యేలకు మధ్య విభేదాలు ఏర్పడ్డాయి. తన కుమారుడికి జెడ్పీ చైర్మన్‌ పదవి దక్కకుండా అచ్చంపేట మాజీ ఎమ్మెల్యే గువ్వల బాలరాజు తదితరులు వ్యతిరేకంగా పనిచేశారని ఆయన కినుక వహించారు. అంతేకాకుండా కేసీఆర్‌ కు సైతం ఫిర్యాదు చేశారు. ఈసారి రాములు బీజేపీలోకి వెళ్తారని ప్రచారం సాగుతోంది.
మరోవైపు, ఎంపీ టికెట్‌ ను ఈసారి పి.రాములుకు కేటాయించవద్దని గువ్వల బాలరాజుతోపాటు మరో ముగ్గురు మాజీ ఎమ్మెల్యేలు బీఆర్‌ఎస్‌ అధిష్టానానికి విన్నవించినట్టు చెబుతున్నారు. దీంతో మధ్యేమార్గంగా గోరటి వెంకన్న పేరు తెరపైకి వచ్చింది.
మరోవైపు అధికార కాంగ్రెస్‌ పార్టీ తరఫున మాజీ ఎంపీ మల్లు రవి బరిలోకి దిగే అవకాశం ఉంది. దీంతో ఆయన సామాజికవర్గానికే చెందిన గోరటి వెంకన్నను బరిలోకి దింపాలని కేసీఆర్‌ నిర్ణయించినట్టు సమాచారం
స్థానిక అంశాల మీద అవగాహనతో పాటు కవులు, కళాకారులతో ఉన్న పరిచయాలు, ప్రజలతో ఉన్న అనుబంధం వంటివి గోరటి వెంకన్నకు ప్లస్‌ ప్లాయింట్స్‌ అని బీఆర్‌ఎస్‌ లెక్కలు వేసుకుంటోంది.
