యూఎస్ లో యాక్సిడెంట్.. హైదరాబాద్ యువకుడు దుర్మరణం

ఉన్నత విద్య కోసం అమెరికాకు వెళుతున్న భారతీయుల సంఖ్య అంతకంతకూ ఎక్కువ అవుతున్న సంగతి తెలిసిందే. యూఎస్ వెళుతున్న భారత యువత తరచూ ఏదో ఒక ప్రమాదంలో ప్రాణాలు కోల్పోతున్న విషాద ఉదంతాలు ఇటీవల కాలంలో ఎక్కువ అవుతున్నాయి. తాజాగా అమెరికాలోని ఒహోయోలో జరిగిన రోడ్డు ప్రమాదంలో హైదరాబాద్ యువకుడు ప్రాణాలు కోల్పోయిన వైనం కాస్త ఆలస్యంగా వెలుగు చూసింది.

బెంగాల్ రాష్ట్రానికి చెందిన రాం ఆశీష్ ఫ్యామిలీ హైదరాబాద్ లోని కుత్బుల్లాపూర్ లో స్థిరపడింది. దశాబ్దాల క్రితమే హైదరాబాద్ కు వచ్చేసిన వారికి ఇద్దరు కొడుకులు. చిన్న కొడుకు 21 ఏళ్ల సందీప్ కుమార్ యాదవ్.. రెండేళ్ల క్రితం ఎంఎస్ చేసేందుకు అమెరికాకు వెళ్లారు. ఒహాయోలో ఆయన చదువుకుంటున్నారు. అమెరికా కాలమానం ప్రకారం ఈ నెల 16న తన స్నేహితుడితో కలిసి మరో స్నేహితుడ్ని కలిసేందుకు కారులో బయలుదేరారు.

ఈ క్రమంలో వీరు ప్రయాణిస్తున్న కారుకు ఎదురుగా వచ్చిన మరో వాహనం బలంగా వీరి కారును గుద్దేసింది. అమితమైన వేగంతో జరిగిన ఈ రోడ్డు ప్రమాదంలో సందీప్ ఘటనాస్థలంలోనే ప్రాణాలు కోల్పోయారు. అతడితో ఉన్న స్నేహితుడు స్వల్ప గాయాలతో బయటపడ్డాడు. రోడ్డు ప్రమాదంలో కొడుకు మరణించిన విషయాన్ని తెలుసుకున్న వారి తల్లిదండ్రులు కన్నీరుమున్నీరు అవుతున్నారు.

ఉన్నత విద్య కోసం అమెరికాకు వెళ్లిన తమ చిన్న కొడుకు ఇంకెప్పటికి తిరిగి రాలేదంటూ వారు వేదన చెందుతున్న వైనం.. అక్కడి వారిని కంటితడి పెట్టేస్తుంది. తమ కొడుకు మ్రతదేహాన్ని హైదరాబాద్ కు తీసుకొచ్చేందుకు సాయం చేయాలంటూ వేడుకుంటున్నారు. దీనిపై ప్రభుత్వం స్పందించాల్సి ఉంది.