రంగంలో నాగబాబు : నర్సాపురమా... అనకాపల్లినా...?

జనసేన అధినేత పవన్ కళ్యాణ్ సోదరుడు, సీనియర్ నేత నాగబాబు వచ్చే ఎన్నికల్లో ఎంపీగా పోటీ చేయాలని అనుకుంటున్నారని తెలుస్తోంది. నాగబాబు 2019లో నర్సాపురం నుంచి పోటీ చేసి పెద్ద ఎత్తున ఓట్లు తెచ్చుకున్నారు. ఆ ఎన్నికల్లో ఆయనకు రెండున్నర లక్షల ఓట్లు పడ్డాయి. ఆ ఎన్నికల్లో టీడీపీ విడిగా పోటీ చేసింది. ఆ పార్టీకి నాలుగు లక్షల పదిహేను వేల పైగా ఓట్లు వచ్చాయి.

ఈసారి పొత్తు ఉంటుంది కాబట్టి ఈ రెండు ఓట్లూ కూడితే ఆరు లక్షన్నర ఓట్లు వస్తాయని లెక్క కడుతున్నారు. దాంతో మరోసారి నాగబాబు నర్సాపురం నుంచి ఎంపీగా పోటీ చేస్తే కనుక నేరుగా లోక్ సభకు నెగ్గుతారు అని జనసైనికులు అంటున్నారు. నాగబాబు సైతం రీయాక్టివ్ అయ్యారు. ఆయనను ఎంపీగా పంపించాలని పవన్ కి ఉంది అంటున్నారు.

తాను ఏపీ రాజకీయాలలో ఉంటూ అన్నను ఢిల్లీ రాజకీయాలలో ఉంచాలని జనసేనాని ప్లాన్ ని కూడా చెబుతున్నారు. అయితే నర్సాపురంలో ఒక చిక్కు ఉంది. ఇక్కడ నుంచి బీజేపీ 2014లో గెలిచింది. ఆ పార్టీకి కొంత బలం ఉంది. వచ్చే ఎన్నికలలో బీజేపీ కూడా పొత్తుకు వస్తే మాత్రం నర్సాపురం సీటుని ఇవ్వక తప్పదని అంటున్నారు.

అలా వైసీపీ రెబెల్ ఎంపీ రఘురామ క్రిష్ణం రాజు నర్సాపురం నుంచి పోటీ చేస్తారు అని అంటున్నారు. అపుడు నాగబాబు సంగతేంటి అన్నది ఒక చర్చగా ఉంది. అయితే ఈసారి పవన్ గోదావరి జిల్లాల నుంచి ఒక సీటు ను ఎంచుకుని పోటీ చేస్తారని అంటున్నారు.

అందువల్ల ఉత్తరాంధ్రాలో తన అన్నయ్య నాగబాబుని ఎంపీగా పోటీ చేయిస్తారు అని ప్రచారం జోరుగా సాగుతోంది. అనకాపల్లి నుంచి ఎంపీగా నాగబాబు పోటీ చేస్తారు అని కూడా అంటున్నారు గతంలో పలు మార్లు నాగబాబు విశాఖ రూరల్ లో విస్తృతంగా పర్యటించారు కూడా.

ఇక అనకాపల్లి లోక్ సభ సీటు విషయం తీసుకుంటే ఇక్కడ టీడీపీకి ఎంపీ క్యాండిడేట్ వెతకాల్సి ఉంది. మరో వైపు చూస్తే కాపులు గవరల ప్రాధాన్యత ఉన్న సీటు ఇది. ఇక్కడ నుంచి కాపు నేతలు గెలిచిన సందర్భాలు ఉన్నాయి. దాంతో నాగబాబుకు పొత్తులో భాగంగా ఈ సీటు ఇస్తే కనుక అనకాపల్లి పరిధిలోని మొత్తం ఏడు అసెంబ్లీ సీట్ల మీద ఆ ప్రభావం పడి గెలుపు అవకాశాలు ఉంటాయని జనసేన టీడీపీ నాయకులు ఆలోచిస్తున్నారు అంటున్నారు.

ఇంకో ఆప్షన్ కూడా నాగబాబుకు ఉంది అంటున్నారు. అది కాకినాడ ఎంపీ సీటు. అనకాపల్లి కాకపోతే కాకినాడ లోక్ సభ నుంచి ఆయన పోటీ చేయవచ్చు అంటున్నారు. టీడీపీతో పొత్తులో భాగంగా మూడు ఎంపీ సీట్లు జనసేనకు దక్కవచ్చు అంటున్నారు. మొత్తానికి నాగబాబు ఈసారి ఎంపీగా గెలిచి ఢిల్లీలో అడుగు పెట్టాలని చూస్తున్నారు అంటున్నారు.